ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ

 

ທະນາຄານເເຫ່ງ ສປປ ລາວ

ເລກທີ 323/ກຄງຕ

ກົມຄຸ້ມຄອງເງິນຕາຕ່າງປະເທດ

ນະຄອນຫຼວງວຽງຈັນ, ວັນທີ: 28 ສິງຫາ 2023

 

 

- ອີງຕາມກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສະບັບເລກທີ 15/ສພຊ, ລົງວັນທີ 7 ກໍລະກົດ 2022;

- ອີງຕາມຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມຄຸ້ມຄອງເງິນຕາຕ່າງປະເທດ ສະບັບເລກທີ 420/ທຫລ, ລົງວັນທີ 23 ພຶດສະພາ 2023;

- ອີງຕາມຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ່້າ-ສົ່ງອອກສິນຄ້າ ແລະ ການບໍລິການ ສະບັບເລກທີ 677/ທຫລ, ລົງວັນທີ 24 ກໍລະກົດ 2023.

 

ເພື່ອຜັນຂະຫຍາຍບາງມາດຕາຂອງຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ່້າ-ສົ່ງອອກສິນຄ້າ ເເລະ ການບໍລິການ (ສະບັບເລກທີ 677/ທຫລ, ລົງວັນທີ 24 ກໍລະກົດ 2023) ກ່ຽວກັບການເປີດ ຫຼື ຫັນເເລະ ການນໍາໃຊ້ບັນຊີເງິນຝາກກ່ຽວກັບການນໍາເຂົ້າ-ສົ່ງອອກ, ການຕິດຕາມການກວດ ເເລະ ລາຍງານການເຄື່ອນໄຫວຂອງບັນຊີຝາກດັ່ງກ່າວ ເພື່ອຮັບປະກັນການນໍາໃຊ້ບັນຊີເງິນຝາກໃຫ້ຖືກຕ້ອງຕາມວັດຖຸປະສົງ. ສະນັ້ນ, ກົມຄຸ້ມຄອງເງິນຕາຕ່າງປະເທດ (ກຄງຕ) ຈຶ່ງໄດ້ອອກບົດເເນະນໍາ ໃຫ້ບັນດາທະນາຄານທຸລະກິດ ເພື່ອປະຕິບັດ ດັ່ງນີ້:

 

1. ທະນາຄານທຸລະກິດ ມີໜ້າທີ່ເປີດ ຫຼື ຫັນບັນຊີເງິນຝາກເກົ່າມາເປັນ ບັນຊີເງິນຝາກກ່ຽວກັບການນໍາເຂົ້າ-ສົ່ງອອກໃນນາມວິສາຫະກິດ ປະເພດກະເເສລາຍວັນ ສະກຸນເງິນຕາຕ່າງປະເທດ ໂດຍອີງໃສ່ໜັງສືການລົງທະບຽນຜູ້ນໍາເຂົ້າ ເເລະ ສົ່ງອອກທີີ່ໄດ້ຮັບອະນຸຍາດຈາກ ກະຊວງອຸດສາຫະກໍາ ເເລະ ການຄ້າ, ໃບຢັ້ງຢືນການເເຈ້ງລົງທະບຽນຜູ້ນໍາເຂົ້າ ເເລະ ສົ່ງອອກສິນຄ້າ ເເລະ ການບໍລິການ ຈາກ ທະນາຄານເເຫ່ງ ສປປ ລາວ ເເລະ ເອກະສານອື່ນຕາມລະບຽບການຂອງທະນາຄານທຸລະກິດ; ສໍາລັບການກໍານົດເລກໝາຍບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ເເມ່ນໃຫ້ອີງໃສ່ໜັງສືເເຈ້ງການຂອງ ກົມບັນຊີເເລະການເງິນ ສະບັບເລກທີ 0058/ກບງ, ລົງວັນທີ 08 ສິງຫາ 2023 (ສໍາລັບບັນຊີເງິນຝາກສະເພາະຂອງບໍລິສັດຂຸດຄົ້ນເເຮ່ທາດ ເພື່ອສົ່ງອອກເເບບທົດລອງ ຕາມເເຈ້ງການຂອງກົມນະໂຍບາຍເງິນຕາ ສະບັບເລກທີ 1120/ກນງ, ລົງວັນທີ 16 ກັນຍາ 2021 ກໍ່ໃຫ້ຫັນມານໍາໃຊ້ເລກໝາຍບັນຊີເງິນຝາກໃໝ່ທັງໝົດ);

2. ໃຫ້ທະນາຄານທຸລະກິດເປັນເຈົ້າການເເຈ້ງຫາລູກຄ້າຂອງຕົນທີ່່ເປັນບໍລິສັດນໍາເຂົ້າ-ສົ່ງອອກ ຊຶ່ງຍັງບໍ່ທັນໄດ້ລົງທະບຽນກັບ ກະຊວງອຸດສາຫະກໍາ ເເລະ ການຄ້າ ເເລະ ໄດ້ນໍາໃຊ້ບັນຊີເງິນຝາກອື່ນຮອງຮັບການຊໍາລະ-ຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ ກ່ອນ ຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ (ສະບັບເລກທີ 677/ ທຫລ, ລົງວັນທີ 24 ກໍລະກົດ 2023) ເພື່ອເປີດ ຫຼື ຫັນບັນຊີເງິນຝາກເກົ່າມາເປັນບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ພາຍໃນ 3 ເດືອນ ນັບຈາກບົດເເນະນໍາສະບັບນີ້. ທະນາຄານທຸລະກິດສາມາດໃຫ້ບໍລິການຊໍາລະ ເເລະ ຮັບຊໍາລະຄ່າສິນຄ້າເເລະ ການບໍລິການ ໃຫ້ເເກ່ລູກຄ້າຜູ້ນໍາເຂົ້າ-ສົ່ງອອກ ໂດຍນໍາໃຊ້ບັນຊີເງິນຝາກທີ່ມີຢູ່ໃນປັດຈຸບັນຈົນກວ່າຈະສໍາເລັດການເປີດ ຫຼື ຫັນບັນຊີເງິນຝາກເກົ່າມາເປັນ ບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ເເຕ່ບໍ່ເກີນໄລຍະ 3 ເດືອນນັບເເຕ່ວັນອອກບົດເເນະນໍາສະບັບນີ້. ກໍລະນີ ບໍລິສັດມີພັນທະຜູກພັນກັບຄູ່ຄ້າຢູ່ຕ່າງປະເທດ ເເລະ ຈໍາເປັນທີ່ຕ້ອງນໍາໃຊ້ບັນຊີເງິນຝາກເກົ່າເກີນ 3 ເດືອນ ເເມ່ນໃຫ້ບໍລິສັດຂໍອະນຸຍາດນໍາ ກຄງຕ.

3. ການນໍາໃຊ້ບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ສາມາດປະຕິບັດໄດ້ດັ່ງນີ້:

- ການນໍາໃຊ້ບັນຊີເງິນຝາກກັບຕ່າງປະເທດ: ເພື່ອຊໍາລະ ເເລະ ຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດເທົ່ານັ້ນ (ສໍາລັບການໂອນເງິນທຶນ, ໂອນກໍາໄລ, ເງິນກູ້ຢືມ, ເງິນປັນຜົນ ເເລະ ທຸລະກໍາອື່ນລະຫວ່າງປະເທດ ເເມ່ນອີງໃສ່ລະບຽບການທີ່ກ່ຽວຂ້ອງ);

- ການນໍາໃຊ້ບັນຊີເງິນຝາກພາຍໃນປະເທດ: ເເມ່ນສາມາດເຄື່ຶອນໄຫວຄືກັນກັບບັນຊີເງິນຝາກກະເເສລາຍວັນທົ່ວໄປ. ສໍາລັບເງື່ອນໄຂໃນການນໍາເນີນທຸລະກໍາເເມ່ນໃຫ້ປະຕິບັດຕາມລະບຽບການທີ່ກ່ຽວຂ້ອງ.  

4. ທະນາຄານທຸລະກິດ ຕ້ອງເປັນເຈົ້າການຕິດຕາມກວດກາການເປີດ ຫຼື ຫັນບັນຊີເງິນຝາກ, ຕິດຕາມການເຄື່ອນໄຫວບັນຊີເງິນຝາກຂອງຜູ້ນໍາເຂົ້າ-ສົ່ງອອກ ພ້ອມທັງລາຍງານໃຫ້ ກຄງຕ ຕາມລະບອບລາຍງານທີ່ລະບຸໄວ້ໃນຂໍ້ 4 ຂອງ ມາດຕາ 9 ຂອງຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ. ສະເພາະໃນໄລຍະ 3 ເດືອນ ພາຍຫຼັງນັບເເຕ່ອອກບົດເເນະນໍາສະບັບນີ້ ໃຫ້ທະນາຄານທຸລະກິດລາຍງານປະຈໍາອາທິດໃນທຸກໆວັນຈັນຂອງອາທິດຕໍ່ໄປ.

5. ສໍາລັບການຕິດຕາມການເຄື່ອນໄຫວບັນຊີເງິນຝາກຂອງຜູ້ນໍາເຂົ້າ-ສົ່ງອອກ ທະນາຄານທຸລະກິດຕ້ອງປະຕິບັດດັ່ງນີ້:

5.1 ການສົ່ງອອກ: ທະນາຄານທຸລະກິດ ຕ້ອງເປັນເຈົ້າການໃນການຕິດຕາມລາຍຮັບຈາກການສົ່ງອອກ ໂດຍການປະສານສົມທົບກັບລູກຄ້າຂອງຕົນທີ່ເປັນຜູ້ສົ່ງອອກ ເມື່ອມີທຸລະກໍາເງິນໂອນເຂົ້າບັນຊີເງິນຝາກດັ່ງກ່າວຂອງລູກຄ້າ ທຸກຄັ້ງ ເພື່ອຮຽກເກັບເອກະສານຕາມກໍານົດໃນມາດຕາ 11 ຂອງຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ. ພ້ອມນີ້,ທະນາຄານທຸລະກິດຕ້ອງກວດກາ ເເລະ ສົມທຽບຈໍານວນເງິນໂອນເຂົ້າບັນຊີເງິນຝາກຂອງຜູ້ສົ່ງອອກ ກັບມູນຄ່າເເຈ້ງພາສີສົ່ງອອກ (ກຄງຕ ຈະສະໜອງໃຫ້ໃນເເຕ່ລະໄລຍະ) ພ້ອມທັງລາຍງານມາຍັງ ກຄງຕ ທຸກໆວັນຈັນຂອງອາທິດຕໍ່ໄປ ໃນໄລຍະລໍຖ້າການພັດທະນາມີລະບົບຂໍ້ມູນຕິດຕາມໃນມໍ່ໆນີ້.

5.2 ການນໍາເຂົ້າ:  ທະນາຄານທຸຸລະກິດ ຕ້ອງເປັນເຈົ້່່າການກວດກາຄວາມຖືກຕ້ອງເອກະສານກ່ຽວກັບການຊໍາລະຄ່າສິນຄ້າ ແລະ ບໍລິການກັບຕ່າງປະເທດ ທີ່ໄດ້ກໍານົດໃນມາດຕາ 10 ຂອງຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ແລະ ການບໍລິການ. ພ້ອມທັງ ຕ້ອງຕິດຕາມການຊື້-ຂາຍເງິນຕາຕ່າງປະເທດ ເພື່ອຊໍາລະຄ່າສິນຄ້າ ເເລະ ບໍລິການກັບຕ່າງປະເທດ.

6. ທະນາຄານທຸລະກິດຕ້ອງລາຍງານມາຍັງ ກຄງຕ ພາຍໃນ 7 ວັນລັດທະການ ກໍລະນີທີ່ລູກຄ້າຂອງທະນາຄານມີການປະພຶດທີ່ລະເມີດຂໍ້ຫ້າມທີ່ລະບຸໄວ້ໃນມາດຕາທີ 13 (ຂໍ້ 1 ຫາ ຂໍ້ 5) ຂອງຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ ຫຼັງຈາກ ໄລຍະເວລາ 3 ເດືອນ ຕາມຂໍ້ກໍານົດໃນ ຂໍ້ 2 ຂອງບົດແນະນໍາສະບັບນີ້ ເພື່ອເປັນຂໍ້ມູນໃຫ້ເເກ່ ກຄງຕ ໃນການປະຕິບັດມາດຕະການຕໍ່ຜູ້ລະເມີດຕາມລະບຽບການ.

7. ເອກະສານທີ່ທະນາຄານທຸລະກິດຕ້ອງລາຍງານຫາກົມຄຸ້ມຄອງເງິນຕາຕ່າງປະເທດ ມີຄືດັ່ງນີ້:

1) ຕາຕະລາງລາຍງານການເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກຂອງລູກຄ້າ                          (ຕາມເເບບຟອມລາຍງານທີ 1);

2) ຕາຕະລາງຕິດຕາມການເຄື່ອນໄຫວບັນຊີເງິນຝາກຂອງບໍລິສັດນໍາເຂົ້າ-ສົ່ງອອກ                                         (ຕາມເເບບຟອມລາຍງານທີ 2);

3) ຕາຕະລາງຕິດຕາມການນໍາລາຍຮັບເຂົ້າບັນຊີເງິນຝາກຂອງບໍລິສັດສົ່ງອອກ                                         (ຕາມເເບບຟອມລາຍງານທີ 3);

4) ຕາຕະລາງລາຍງານການຊື້-ຂາຍເງິນຕາຕ່າງປະເທດຂອງບໍລິສັດນໍາເຂົ້່າ-ສົ່ງອອກ                                        (ຕາມແບບຟອມລາຍງານທີ 4);

ບົດເເນະນໍາສະບັບນີ້ ແມ່ນໃຫ້ຈັດຕັ້ງປະຕິບັດໃຫ້ໄດ້ຮັບຜົນດີ. ໃນກໍລະນີ ການຈັດຕັ້ງປະຕິບັດຕົວຈິງຫາກບໍ່ສອດຄ່ອງ ເເມ່ນຈະມີການປັບປຸງໃນແຕ່ລະໄລຍະ.

ດັ່ງນັ້ນ, ຈຶ່ງເເຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດບົດແນະນໍາສະບັບນີ້ເປັນຢ່າງດີ.

 

 

 

 

#	ຫົວຂໍ້	ດາວໂຫຼດ
1	Instruction on the Decision of managing import-export goods and the service of foreign exchange, No. 323/DFEM, dated 28 August 2023.	PDF
2	ບົດແນະນໍາການຈັດຕັ້ງປະຕິບັດຂໍ້ຕົກລົງວ່າດ້ວຍການຄຸ້ມຄອງ ເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ແລະ ການບໍລິການ, ເລກທີ 323/ກຄງຕ, ລົງວັນທີ 28 ສິງຫາ 2023.	PDF