ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ຫ້ອງວ່າການສໍານັກງານນາຍົກລັດຖະມົນຕີ
ເລກທີ 279/ຫສນຍ
ນະຄອນຫຼວງວຽງຈັນ, ວັນທີ 18.03.2021
ແຈ້ງການ
ຮຽນ: - ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ທີ່ເຄົາລົບ.
- ທ່ານ ລັດຖະມົນຕີກະຊວງໂຍທາທິການ ແລະ ຂົນສົ່ງ ທີ່ນັບຖື.
- ທ່ານ ລັດຖະມົນຕີກະຊວງພະລັງງານ ແລະ ບໍ່ແຮ່ ທີ່ນັບຖື.
- ທ່ານ ເຈົ້າແຂວງວຽງຈັນ ທີ່ນັບຖື.
ເລື່ອງ: ທິດຊີ້ນໍາຕໍ່ການສະເໜີເປີດດ່ານທ້ອງຖິ່ນບ້ານວັງ, ເມືອງໝື່ນ, ແຂວງວຽງຈັນ ເພື່ອສົ່ງອອກແຮ່ບາລິດ ໄປປະເທດໄທ.
- ອີງຕາມ ດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຫ້ອງວ່າການສໍານັກງານ ນາຍົກລັດຖະມົນຕີ ສະບັບເລກທີ 93/ນຍ, ລົງວັນທີ 03 ມີນາ 2017;
- ອີງຕາມໜັງສືສະເໜີ ສະບັບເລກທີ 19/ຈຂ.ວຈ, ລົງວັນທີ 03 ມີນາ 2021 ຂອງແຂວງວຽງຈັນ;
- ອີງຕາມຜົນກອງປະຊຸມກອງເລຂາ ຄະນະສະເພາະກິດ ຮ່ວມກັບພາກສ່ວນກ່ຽວຂ້ອງ ໃນວັນທີ 10 ມີນາ 2021 ທີ່ຫ້ອງວ່າການສໍານັກງານນາຍຍົກລັດຖະມົນຕີ;
- ອີງຕາມການຕົກລົງ ແລະ ຊີ້ນໍາຂອງທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ COVID-19 ໃນວັນທີ 18 ມີນາ 2021.
ຫ້ອງວ່າການສໍານັກງານນາຍົກລັດຖະມົນຕີຂໍຖືເປັນກຽດແຈ້ງການຕົກລົງ ແລະ ຊີ້ນໍາຂອງທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ມາຍັງທ່ານຊາບ ດັ່ງນີ້: ເຫັນດີອະນຸມັດໃຫ້ເປີດດ່ານທ້ອງຖີ່ນບ້ານວັງ, ເມືອງໝື່ນ, ແຂວງວຽງຈັນ ເພື່ອໃຫ້ບໍລິສັດ ຫຸ້ນສ່ວນຂຸດຄົ້ນຄໍາ ແຂວງບໍລິຄໍາໄຊ ຈໍາກັດ ຂົນສົ່ງແຮ່ບາລິດ ຜ່ານດ່ານດັ່ງກ່າວ ໄປຫາດ່ານບ້ານຄົກໄຜ່, ເມືອງປາກຊົມ, ແຂວງເລີຍ, ປະເທດໄທ ຕາມການສະເໜີ. ມອບໃຫ້ແຂວງວຽງຈັນ ເປັນໃຈກາງສົມທົບກັບຂະແໜງພາສີ ແລະ ຂະແໜງການກ່ຽວຂ້ອງ ຄວບຄຸມການສົ່ງອອກໃຫ້ຮັດກຸມ, ຮັບປະກັນບໍ່ໃຫ້ມີຊ່ອງຫວ່າງສວຍໂອກາດ ແລະ ຫາງສຽງຈາກສັງຄົມ, ທັງປະຕິບັດມາດຕະການປ້ອງກັນ ແລະ ຄວບຄຸມການລະບາດຂອງພະຍາດ COVID-19 ຕາມຄະນະສະເພາະກິດຂັ້ນສູນກາງ ໄດ້ກໍານົດ ຢ່າງເຂັ້ມງວດ.
ໝາຍເຫດ: ໄດ້ມີເອກະສານກ່ຽວຂ້ອງ ຄັດຕິດມາພ້ອມນີ້.
ດັ່ງນັ່້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ.
ເຊັນແທນລັດຖະມົນຕີ,
ຫົວໜ້າຫ້ອງການວ່າການສໍານັກງານນາຍົກລັດຖະມົນຕີ
ຄໍາລາວັນ ຈັນທະລາວັນ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.