ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ, ກົມພາສີ ເລກທີ 1242/ກພສ
ນະຄອນຫລວງວຽງຈັນ, ວັນທີ 06 ເມສາ 2010
ໜັງສືທາງລັດຖະການ
ເຖິງ: ບັນດາຫົວໜ້າພະແນກອ້ອມຂ້າງກົມພາສີ, ຫົວໜ້າພາສີປະຈຳເຂດ, ຫົວໜ້າດ່ານພາສີຊາຍແດນ ໃນຂອບເຂດທົ່ວປະເທດ.
ເລື່ອງ: ການຂົນສົ່ງສິນຄ້າຜ່ານແດນສາກົນ.
- ອີງຕາມ ກົດໝາຍພາສີ ສະບັບເລກທີ 05/ສພຊ, ລົງວັນທີ 20 ພຶດສະພາ 2005;.
- ອີງຕາມ ບົດແນະນຳວ່າດ້ວຍການຈັດຕັ້ງປະຕິບັດກົດໝາຍ ແລະ ດຳລັດຈັດຕັ້ງປະຕິບັດ ກົດໝາຍວ່າດ້ວຍພາສີສະບັບເລກທີ 0491/ກງ, ລົງວັນທີ 12 ມີນາ 2009;
- ອີງຕາມ ມະຕິກອງປະຊຸມກ່ຽວກັບວຽກງານພາສີປະຈຳງວດ I ແລະ ທິດທາງປະຈຳງວດ II ສະບັບເລກທີ 0787/ກພສ, ລົງວັນທີ 21 ມັງກອນ 2010;
- ອີງຕາມ ແຈ້ງການຂອງກົມພາສີ ວ່າດ້ວຍການຈັດຕັ້ງປະຕິບັດການຂົນສົ່ງຜ່ານແດນສາກົນ ສະບັບເລກທີ 543/ກພສ, ລົງວັນທີ 8 ມີຖຸນາ 2009;
- ອີງຕາມ ຂໍ້ຕົກລົງວ່າດ້ວຍການຂົນສົ່ງສິນຄ້າ ແລະ ຜູ້ໂດຍສານຜ່ານແດນ ຂອງອະນຸພາກພື້ນລຸ່ມແມ່ນ້ຳຂອງ(GMS-CBTA).
ເພື່ອເຮັດໃຫ້ການຈັດຕັ້ງປະຕິບັດ ລະບຽບການຂົນສົ່ງສິນຄ້າຜ່ານແດນສາກົນ ໃຫ້ໄປຕາມເປົ້າໝາຍ, ຮັບປະກັນໃຫ້ມີຄວາມເຂົ້າໃຈເປັນເອກະພາບ ໃນຂອບເຂດທົ່ວປະເທດ ແລະ ສົ່ງເສີມການອຳນວຍຄວາມສະດວກທາງດ້ານການຄ້າ ໃຫ້ມີປະສິດທິພາບ.
ກົມພາສີ ມີໜັງສືທາງລັດຖະການ ກ່ຽວກັບ ການຂົນສົ່ງສິນຄ້າຜ່ານແດນສາກົນ ດັ່ງນີ້:
- ໃນປະຈຸບັນ ກົມພາສີ ໄດ້ເຊັນອະນຸສັນຍາການຂົນສົ່ງສິນຄ້າຜ່ານແດນສາກົນ ໃນກອບຂອງຂໍ້ຕົກລົງບັນດາປະເທດອະນຸພາກພື້ນລຸ່ມແມ່ນ້ຳຂອງ (GMS); ເຊິ່ງໃນສັນຍາດັ່ງກ່າວ ໄດ້ກຳນົດເສັ້ນທາງ ເລກ 9, ຕາມແລວເສດຖະກິດຕາເວັນອອກ-ຕາເວັນຕົກ (EWEC); ສະເພາະເສັ້ນທາງ A3 ແມ່ນຈະໄດ້ສືບຕໍ່ຈັດຕັ້ງປະຕິບັດຕາມຮູບແບບດຽວກັນ;
- ສຳລັບ ບັນດາເສັ້ນທາງທີ່ບໍ່ໄດ້ກຳນົດໄວ້ໃນກອບ GMS, ແມ່ນໃຫ້ປະຕິບັດເປັນການນຳເຂົ້າເພື່ອສົ່ງອອກຕາມຂໍ້ຕົກລົງ 0462/ກງ, ລົງວັນທີ 14/3/2003;
- ສິນຄ້າທີ່ຢູ່ໃນລະບອບຂົນສົ່ງຜ່ານແດນສາກົນ ຕ້ອງຫຸ້ມຫໍ່ໃຫ້ໄດ້ຕາມມາດຕະຖານ ຫຼື ຕ້ອງບັນຈຸໃນຕູ້ສີນຄ້າຕາມເງື່ອນໄຂທີ່ກຳນົດໄວ້ ໃນບົດແນະນຳຂອງລັດຖະມົນຕີວ່າການກະຊວງການເງິນ ສະບັບເລກທີ 0491/ກງ, ລົງວັນທີ 12 ມີນາ 2009;
- ຫ້າມບໍ່ໃຫ້ບໍລິສັດຂາອອກ-ຂາເຂົ້າ ເຮັດການບໍລິການຂົນສົ່ງສິນຄ້າຜ່ານແດນສາກົນ ເຖິງແມ່ນວ່າໄດ້ຮັບການມອບສິດຈາກຜູ້ຊື້ກັບຜູ້ຂາຍ ແລ້ວກໍ່ຕາມ;
- ຫ້າມບໍ່ໃຫ້ທຳການຄ່ຽນຖ່າຍສິນຄ້າ ຢູ່ໃນດິນແດນແຫ່ງ ສປປ ລາວ ເກີນໜຶ່ງເທື່ອ, ເວັ້ນເສຍແຕ່ຈະປ່ຽນຫົວລົດລາກ ຫຼື ຫາກເກີດອຸບັດຕິເຫດ ຫຼື ເຫດການເໜືອວິໃສ;
- ສຳລັບບັນດາບໍລິສັດ ທີ່ຈະສາມາດເຮັດການຂົນສົ່ງເປັນຫຼາຍເສັ້ນທາງ ກົມພາສີ ຈະແຈ້ງເປັນອັນສະເພາະ, ສ່ວນສັນຍາທີ່ໄດ້ອະນຸມັດໄປແລ້ວ, ແມ່ນໃຫ້ມີການກວດກາເພື່ອໃຫ້ສອດຄ່ອງ ຕາມບົດແນະນຳຂອງລັດຖະມົນຕີວ່າການກະຊວງການເງິນ ສະບັບເລກທີ 0491/ກງ, ລົງວັນທີ 12 ມີນາ 2009;
- ສ່ວນລາຍລະອຽດ ກ່ຽວກັບລະບຽບການ, ເງື່ອນໄຂການຂົນສົ່ງສິນຄ້າຜ່ານແດນສາກົນ, ມາດຕະການຕໍ່ຜູ້ດຳເນີນການບໍລິການຂົນສົ່ງສິນຄ້າຜ່ານສາກົນ, ທາງກົມພາສີ ຈະອອກແຈ້ງການເພີ່ມເຕີມ ເພື່ອເຮັດໃຫ້ການຈັດຕັ້ງປະຕິບັດ ການບໍລິການຂົນສົ່ງສິນຄ້າຜ່ານແດນສາກົນ ໃຫ້ເປັນໄປຕາມລະບຽບການສາກົນ ພ້ອມທັງອຳນວຍຄວາມສະດວກ ໃຫ້ແກ່ການຄ້າໃນຂົງເຂດພາກພື້ນມີຄວາມວ່ອງໄວ, ງ່າຍດາຍ ແລະ ເປັນເອກະພາບກັບບັນຫາປະເທດຄູ່ສັນຍາໃນກອບ(GMS).
ມອບໃຫ້ບັນດາພະແນກອ້ອມຂ້າງກົມພາສີ, ພາສີປະຈຳເຂດ, ດ່ານພາສີຊາຍແດນໃນຂອບເຂດທົ່ວປະເທດ ຈົ່ງພ້ອມກັນຈັດຕັ້ງປະຕິບັດຢ່າງເຂັ້ມງວດ. ຖ້າພົບຄວາມຫຍຸ້ງຍາກໃນການຈັດຕັ້ງປະຕິບັດ ໃຫ້ລາຍງານຂໍທິດຊີ້ນຳຈາກກົມພາສີໂດຍດ່ວນ.
ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ພ້ອມກັນຈັດຕັ້ງປະຕິບັດ.
ເຊັນແທນ ຫົວໜ້າກົມພາສີ
[ ເຊັນ ແລະ ປະທັບກາ ]
ບຸນໂຈມ ອຸບົນປະເສີດ ເທິງ
| # | ຫົວຂໍ້ | ດາວໂຫຼດ |
|---|---|---|
| 1 | Official Letter on International Transit of Goods No. 1242/CD |  PDF |
| 2 | ໜັງສືທາງລັດຖະການ ການຂົນສົ່ງສິນຄ້າ ຜ່ານແດນສາກົນ ເລກທີ 1242/ກພສ |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.