ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງອຸດສາຫະກຳ ແລະ ການຄ້າ
ກົມການຄ້າຕ່າງປະເທດ
ເລກທີ 4922/ກຄຕ
ນະຄອນຫຼວງວຽງຈັນ, ວັນທີ 04 ທັນວາ 2024
ໜັງສືແຈ້ງເຕືອນ
ຮຽນ : ບັນດາບໍລິສັດນຳເຂົ້າ-ສົ່ງອອກສິນຄ້າ ແລະ ບໍລິການ.
ເລື່ອງ: ການຈັດຕັ້ງປະຕິບັດຂໍ້ຕົກລົງວ່າດ້ວຍການລົງທະບຽນຜູ້ນຳເຂົ້າ ແລະ ສົ່ງອອກສິນຄ້າ.
- ອີງຕາມ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ກົມການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ ເລກທີ 2080/ອຄ, ລົງວັນທີ 15 ພະຈິກ 2023;
- ອີງຕາມ ຂໍ້ຕົກລົງວ່າດ້ວຍການລົງທະບຽນຜູ້ນຳເຂົ້າ ແລະ ສົ່ງອອກສິນຄ້າ ເລກທີ 0752/ອຄ, ລົງວັນທີ 23 ພຶດສະພາ 2023;
- ອີງຕາມ ແຈ້ງການດັດສົມຜູ້ນຳເຂົ້າ ແລະ ສົ່ງອອກສິນຄ້າ ເລກທີ 2972/ຫອຄ, ລົງວັນທີ 31 ຕຸລາ 2024.
ກົມການຄ້າຕ່າງປະເທດ (ກຄຕ), ກະຊວງອຸດສາຫະກໍາ ແລະ ການຄ້າ ຂໍຖືເປັນກຽດແຈ້ງມາຍັງທ່ານຊາບວ່າ ຜ່ານການຕິດຕາມ-ກວດກາ ໃບຢັ້ງຢືນການລົງທະບຽນຜູ້ນຳເຂົ້າ-ສົ່ງອອກສິນຄ້າ ແລະ ບໍລິການ ກົມ ຄຕ ເຫັນວ່າໃບຢັ້ງຢືນຂອງຫຼາຍບໍລິສັດ ທີ່ໄດ້ມີການລົງທະບຽນຈຳນວນໜຶ່ງແມ່ນໄດ້ໝົດອາຍຸ ແລະ ຈຳນວນໜຶ່ງແມ່ນກຳລັງຈະໝົດອາຍຸ. ສະນັ້ນ, ກົມ ຄຕ ຈຶ່ງອອກໜັງສືແຈ້ງເຕືອນມາຍັງບໍລິສັດ ທີ່ມີລາຍຊື່ຄັດຕິດມານີ້ ໃຫ້ຮີບຮ້ອນມາຕໍ່ອາຍຸ ກ່ອນວັນທີ 13 ທັນວາ 2024 ເພື່ອໃຫ້ສືບຕໍ່ດຳເນີນການນຳເຂົ້າສົ່ງອອກໄດ້ປົກກະຕິ.
ການຕໍ່ອາຍຸ ສາມາດດໍາເນີນໃນລະບົບການລົງທະບຽນຜູ້ນໍາເຂົ້າ ແລະ ສົ່ງອອກສິນຄ້າ ແລະ ບໍລິການ ຜ່ານເວບໄຊສ໌ຂອງກົມການຄ້າຕ່າງປະເທດ https://imex-enterprise.Laoconnect.la/auth/login ໂດຍເອ ກະສານ ແລະ ເງື່ອນໄຂ ຂອງການຕໍ່ອາຍຸແມ່ນອີງໃສ່ແຈ້ງການດັດສົມຜູ້ນຳເຂົ້າ ແລະ ສົ່ງອອກສິນຄ້າ ເລກທີ 2972/ຫອຄ, ລົງວັນທີ 31 ຕຸລາ 2024. ຖ້າບໍລິສັດໃດບໍ່ໄດ້ເຂົ້າລົງທະບຽນຕໍ່ອາຍຸຜ່ານລະບົບດັ່ງກ່າວຕາມກຳນົດເວລາທີ່ໄດ້ລະບຸໄວ້ ແມ່ນທາງກົມ ຄຕ ຈະໄດ້ດຳເນີນການລົບລ້າງຂໍ້ມູນບໍລິສັດ ແລະ ຈະດຳເນີນການມາດຕະການເພີ່ມເຕີມ ຕາມລະບຽບທີ່ ກຄຕ ວາງອອກ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຈັດຕັ້ງປະຕີບັດຢ່າງເຂັ້ມງວດ.
(ຮອງ)ຫົວໜ້າກົມ
ວ່າງໃຈ ວ່າງ
ຕິດຕໍ່ພົວພັນ
ກົມການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ
ພະແນກຄຸ້ມຄອງການນໍາເຂົ້າ ແລະ ສົ່ງອອກ
ທ່ານ ນາງ ປະລິດາພອນ ພຸດທະວົງ, ເບີໂທ 020 28008333
| # | ຫົວຂໍ້ | ດາວໂຫຼດ |
|---|---|---|
| 1 | ແຈ້ງເຕືອນ ກ່ຽວກັບການຈັດຕັ້ງປະຕິບັດຂໍ້ຕົກລົງວ່າດ້ວຍການລົງທະບຽນຜູ້ນໍາເຂົ້າ ແລະ ສົ່ງອອກສິນຄ້າ, ເລກທີ 4922/ກຄຕ, ລົງວັນທີ 04 ທັນວາ 2024. |  PDF |
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.
You can provide comment/feedback on draft legislation to relevant government agencies for improvement before entering into force.