ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
 
ລັດຖະບານ
ເລກທີ 298/ລບ
ນະຄອນຫຼວງວຽງຈັນ, ວັນທີ 05 ມິຖຸນາ2024
 
ດໍາລັດ
ວ່າດ້ວຍທ່າບົກ (ສະບັບປັບປຸງ)
- ອີງຕາມ ກົດໝາຍ ວ່າດ້ວຍລັດຖະບານ ສະບັບເລກທີ 03/ສພຊ, ລົງວັນທີ 16 ພະຈິກ 2021;
- ອີງຕາມ ກົດໝາຍ ວ່າດ້ວຍການສົ່ງເສີມການລົງທຶນ ສະບັບເລກທີ 14/ສພຊ, ລົງວັນທີ 17 ພະຈິກ 2016;
- ອີງຕາມ ກົດໝາຍ ວ່າດ້ວຍການຂົນສົ່ງຫຼາຍຮູບແບບ ສະບັບເລກທີ 28/ສພຊ, ລົງວັນທີ 18 ທັນວາ 2012;
- ອີງຕາມ ໜັງສືສະເໜີຂອງ ກະຊວງໂຍທາທິການ ແລະ ຂົນສົ່ງ ສະບັບເລກທີ 102/ຍທຂ, ລົງວັນທີ 26 ກຸມພາ 2024
 
ລັດຖະບານ ອອກດຳລັດ:
 
ໝວດທີ 1
ບົດບັນຍັດທົ່ວໄປ
ມາດຕາ 1 ຈຸດປະສົງ
ດໍາລັດສະບັບນີ້ ກຳນົດ ຫຼັກການ, ລະບຽບການ ແລະ ມາດຕະການ ໃນການຄຸ້ມຄອງ ແລະ ຕິດຕາມ ກວດກາ ທ່າບົກ ເພື່ອເຮັດໃຫ້ການນຳເຂົ້າ-ສົ່ງອອກ ສິນຄ້າ ລະຫວ່າງປະເທດ ແລະ ຜ່ານແດນ ລວມທັງການເຄື່ອນຍ້າຍສິນຄ້າ ມີປະສິດທິພາບ ແລະ ປະສິດທິຜົນ, ການບໍລິການດ້ານຄົມມະນາຄົມ-ຂົນສົ່ງ ມີຄວາມ ສະດວກ, ວ່ອງໄວ, ປອດໄພ, ໂລ່ງລ່ຽນ, ທັນສະໄໝ ແລະ ເປັນມິດຕໍ່ສິ່ງແວດລ້ອມ ແນໃສ່ດຶງດູດ ແລະ ສົ່ງເສີມການລົງທຶນພາຍໃນ ແລະ ຕ່າງປະເທດ, ຮັບປະກັນການເຊື່ອມໂຍງ, ເຊື່ອມຈອດກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງຊາດ.
ມາດຕາ 2 (ປັບປຸງ) ທ່າບົກ
ທ່າບົກ ຊື່ພາສາສາກົນ ເອີ້ນວ່າ “Dry Port ” ແມ່ນ ສູນໂລຊິດສະຕິກໜຶ່ງ ທີ່ມີການເຊື່ອມຕໍ່ກັບໜຶ່ງ ຫຼື ຫຼາຍຮູບແບບການຂົນສົ່ງ ເພື່ອການຮັບ-ສົ່ງ, ເຕົ້າໂຮມ, ເກັບຮັກສາ, ຍົກຍໍ, ຄ່ຽນຖ່າຍ, ແຈກຢາຍ ແລະ ມີການກວດກາການເຄື່ອນຍ້າຍ ສິນຄ້າ ໂດຍເຈົ້າໜ້າທີ່ພາສີ ແລະ ເຈົ້າໜ້າທີ່ອື່ນທີ່ກ່ຽວຂ້ອງ ໃນຂະບວນການຄ້າສາກົນ ໂດຍສອດຄ່ອງກັບ ກົດໝາຍ, ສົນທິສັນຍາ ທີ່ ສປປ ລາວ ເປັນພາຄີ ແລະ ສັນຍາສາກົນ ທີ່ກ່ຽວຂ້ອງ.
ມາດຕາ 3 (ປັບປຸງ) ການອະທິບາຍຄຳສັບ
ຄຳສັບທີ່ນຳໃຊ້ໃນດຳລັດສະບັບນີ້ ມີຄວາມໝາຍ ດັ່ງນີ້:
1. ໂລຊິດສະຕິກ (Logistics) ໝາຍເຖິງ ລະບົບການຄຸ້ມຄອງບໍລິຫານ ຂະບວນການເຄື່ອນຍ້າຍສິນຄ້າ
ທີ່ມີການວາງແຜນ, ຄວບຄຸມ, ເກັບຮັກສາ, ຫຸ້ມຫໍ່, ຄ່ຽນຖ່າຍ, ຂົນສົ່ງ, ບໍລິການ ແລະ ສະໜອງຂໍ້ມູນຂ່າວສານ ທີ່ກ່ຽວຂ້ອງ ທີ່ມີປະສິດທິພາບ ແລະ ປະສິດທິຜົນ ຈາກຕົ້ນທາງໄປຍັງປາຍທາງ ຕາມຄວາມຕ້ອງການ
ຂອງລູກຄ້າ ຢ່າງເປັນຕ່ອງໂສ້;
2. ສິນຄ້າ ໝາຍເຖິງ ວັດຖຸ, ສິ່ງຂອງ, ພືດ, ສັດ, ສັດນ້ຳ, ຜະລິດຕະພັນອື່ນ ເພື່ອຕອບສະໜອງຄວາມຕ້ອງການ ຫຼື ຄວາມຈໍາເປັນຂອງຜູ້ຊົມໃຊ້ ຊຶ່ງມີຄຸນຄ່າທາງດ້ານເສດຖະກິດ;
3. ການຄ້າສາກົນ (International Trade) ໝາຍເຖິງ ການນໍາເອົາສິນຄ້າ ເຂົ້າມາ ຫຼື ສົ່ງອອກຈາກ ສປປ ລາວ ລວມທັງການນໍາເຂົ້າຊົ່ວຄາວ, ການສົ່ງອອກຊົ່ວຄາວ ແລະ ການຜ່ານແດນ;
4. ລານຕູ້ສິນຄ້າ (Container Yard) ໝາຍເຖິງ ສະຖານທີ່ເກັບຮັກສາ ແລະ ສ້ອມແປງຕູ້ສິນຄ້າ;
5. ຜູ້ພັດທະນາ ໝາຍເຖິງ ນິຕິບຸກຄົນ ທີ່ໄດ້ຮັບອະນຸຍາດລົງທຶນໃຫ້ພັດທະນາທ່າບົກ ຕາມກົດໝາຍ ວ່າດ້ວຍການສົ່ງເສີມການລົງທຶນ ແລະ ກົດໝາຍອື່ນທີ່ກ່ຽວຂ້ອງ;
6. ຜູ້ລົງທຶນກິດຈະການ ໝາຍເຖິງ ນິຕິບຸກຄົນ ທີ່ໄດ້ຮັບອະນຸຍາດລົງທຶນກິດຈະການໃດໜຶ່ງ ຢູ່ພື້ນທີ່ໃນຂອບເຂດຂອງທ່າບົກ ຕາມກົດໝາຍວ່າດ້ວຍການສົ່ງເສີມການລົງທຶນ ແລະ ກົດໝາຍອື່ນ ທີ່ກ່ຽວຂ້ອງ.
ມາດຕາ 4 ນະໂຍບາຍຂອງລັດກ່ຽວກັບວຽກງານທ່າບົກ
ລັດ ເອົາໃຈໃສ່ພັດທະນາວຽກງານທ່າບົກ ດ້ວຍການສ້າງບຸກຄະລາກອນ, ສ້າງໂຄງລ່າງພື້ນຖານ,       ສະໜອງງົບປະມານ ແລະ ວັດຖູປະກອນທີ່ຈຳເປັນ ພ້ອມທັງສ້າງເງື່ອນໄຂ ແລະ ອຳນວຍຄວາມສະດວກໃຫ້ວຽກງານດັ່ງກ່າວ ດຳເນີນໄປຢ່າງມີປະສິດທິພາບ ແລະ ປະສິດທິຜົນ.
ລັດ ສົ່ງເສີມນິຕິບຸກຄົນ ລົງທຶນເຂົ້າໃນການພັດທະນາທ່າບົກ ແລະ ກິດຈະການ ຢູ່ພື້ນທີ່ໃນຂອບເຂດຂອງທ່າບົກ ໃຫ້ມີການຂະຫຍາຍຕົວ ແນໃສ່ຊຸກຍູ້ການຜະລິດ ແລະ ການຂົນສົ່ງສິນຄ້າໃຫ້ ເຊື່ອມໂຍງ ແລະ ເຊື່ອມຈອດກັບພາກພື້ນ ແລະ ສາກົນ.
ລັດ ສ້າງເງື່ອນໄຂ ແລະ ອຳນວຍຄວາມສະດວກ ໃຫ້ຜູ້ພັດທະນາ ແລະ ຜູ້ລົງທຶນກິດຈະການ ສາມາດ  ເຂົ້າເຖິງແຫຼ່ງທຶນທັງພາຍໃນ ແລະ ຕ່າງປະເທດ ເພື່ອສ້າງຄວາມເຂັ້ມແຂງ ໃນການພັດທະນາການຂົນສົ່ງ ແລະ ໂລຊິດສະຕິກ.
ລັດ ປົກປ້ອງ ສິດ ແລະ ຜົນປະໂຫຍດຂອງຜູ້ພັດທະນາ ແລະ ຜູ້ລົງທຶນກິດຈະການ ຕາມທີ່ກຳນົດໄວ້ໃນດຳລັດສະບັບນີ້ ແລະ ກົດໝາຍ ວ່າດ້ວຍການສົ່ງເສີມການລົງທຶນ.
ມາດຕາ 5 ຫຼັກການກ່ຽວກັບວຽກງານທ່າບົກ
ການເຄື່ອນໄຫວວຽກງານທ່າບົກ ໃຫ້ປະຕິບັດຕາມຫຼັກການ ດັ່ງນີ້:
1. ສອດຄ່ອງກັບ ກົດໝາຍ, ແຜນພັດທະນາເສດຖະກິດ-ສັງຄົມແຫ່ງຊາດ, ຍຸດທະສາດການພັດທະນາໂລຊິດສະຕິກຂົນສົ່ງສິນຄ້າ ຂອງ ສປປ ລາວ, ສົນທິສັນຍາ ທີ່ ສປປ ລາວ ເປັນພາຄີ ແລະ ສັນຍາສາກົນ ທີ່ກ່ຽວຂ້ອງ;
2. ຮັບປະກັນການບໍລິການ ໃຫ້ມີຄວາມສະດວກ, ວ່ອງໄວ, ປອດໄພ, ໂລ່ງລ່ຽນ, ທັນສະໄໝ, ໂປ່ງໃສ, ກວດສອບໄດ້, ໄດ້ມາດຕະຖານສາກົນ ແລະ ເປັນມິດກັບສິ່ງແວດລ້ອມ;
3. ປະສານສົມທົບກັບ ຂະແໜງການ, ອົງການປົກຄອງທ້ອງຖິ່ນ ແລະ ຄູ່ຮ່ວມພັດທະນາ ໃນການຄຸ້ມຄອງວຽກງານທ່າບົກ.
ມາດຕາ 6 ຂອບເຂດການນໍາໃຊ້
ດຳລັດສະບັບນີ້ ນຳໃຊ້ສຳລັບ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ພົວພັນ ແລະ ເຄື່ອນໄຫວ      ກ່ຽວກັບວຽກງານທ່າບົກ ຢູ່ ສປປ ລາວ.
 
 
ມາດຕາ 7 ການຮ່ວມມືສາກົນ
ລັດ ສົ່ງເສີມການພົວພັນ, ຮ່ວມມືກັບຕ່າງປະເທດ, ພາກພື້ນ ແລະ ສາກົນ ກ່ຽວກັບວຽກງານທ່າບົກ ດ້ວຍການແລກປ່ຽນບົດຮຽນ, ຂໍ້ມູນຂ່າວສານ, ວິທະຍາສາດ, ເຕັກນິກ, ເຕັກໂນໂລຊີ ແລະ ປະສົບການໃນການພັດທະນາ ແລະ ຄຸ້ມຄອງທ່າບົກ ໂດຍສອດຄ່ອງກັບ ສົນທິສັນຍາ ທີ່ ສປປ ລາວ ເປັນພາຄີ ແລະ ສັນຍາສາກົນ ທີ່ກ່ຽວຂ້ອງ.
ໝວດທີ 2 
ການກໍານົດ ຈຸດທີ່ຕັ້ງ, ມາດຕະຖານ ແລະ ການເຂົ້າ-ອອກ ທ່າບົກ 
ມາດຕາ 8 (ປັບປຸງ) ຈຸດທີ່ຕັ້ງຂອງທ່າບົກ
ທີ່ຕັ້ງຂອງທ່າບົກ ຢູ່ ສປປ ລາວ ແມ່ນອີງຕາມສົນທິສັນຍາລະຫວ່າງລັດຖະບານວ່າດ້ວຍທ່າບົກ ຂອງຄະນະກໍາມາທິການ ອົງການສະຫະປະຊາຊາດດ້ານເສດຖະກິດ ແລະ ສັງຄົມ ປະຈໍາພາກພື້ນອາຊີ-ປາຊີຟິກ (UNESCAP Intergovernmental Agreement on Dry Port).
ທ່າບົກ ບໍ່ແມ່ນດ່ານຊາຍແດນ ຊຶ່ງອາດຕັ້ງຢູ່ໃກ້ກັບ ດ່ານສາກົນ, ເຂດຍຸດທະສາດຂອງ ແຂວງ, ນະຄອນຫຼວງ, ເຂດ ການຄ້າ, ອຸດສາຫະກໍາ ແລະ ກະສິກຳ ທີ່ສາມາດເຊື່ອມຈອດກັບ ທາງຫຼວງ, ທາງລົດໄຟ, ທ່າເຮືອ ແລະ ສະໜາມບິນສາກົນ.
ກະຊວງໂຍທາທິການ ແລະ ຂົນສົ່ງ ເປັນຜູ້ຄົ້ນຄວ້າຈຸດທີ່ຕັ້ງຂອງທ່າບົກ ໂດຍປະສານສົມທົບກັບ ກະຊວງ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ແລ້ວສະເໜີລັດຖະບານ ພິຈາລະນາ.
ມາດຕາ 9 ມາດຕະຖານຂອງທ່າບົກ 
ທ່າບົກ ຕ້ອງມີມາດຕະຖານ ດັ່ງນີ້:
1. ມີເນື້ອທີ່ ແຕ່ ເຈັດ ເຮັກຕາ ຂຶ້ນໄປ;
2. ມີໂຄງລ່າງພື້ນຖານທາງດ້ານເຕັກນິກ;
3. ມີກົນຈັກພາຫະນະ ແລະ ອຸປະກອນ; 
4. ມີລະບົບເຕັກໂນໂລຊີການສື່ສານຂໍ້ມູນຂ່າວສານ;
5. ມີລະບົບຄວາມປອດໄພ;
6. ມີສິ່ງອຳນວຍຄວາມສະດວກອື່ນທີ່ຈຳເປັນ.
ມາດຕາ 10 (ປັບປຸງ) ໂຄງລ່າງພື້ນຖານທາງດ້ານເຕັກນິກທີ່ຈໍາເປັນຂອງທ່າບົກ
ໂຄງລ່າງພື້ນຖານທາງດ້ານເຕັກນິກທີ່ຈໍາເປັນຂອງທ່າບົກ ມີດັ່ງນີ້:
1. ປະຕູເຂົ້າ-ອອກ ແລະ ຮົ້ວອ້ອມຮອບ;
2. ເສັ້ນທາງພາຍໃນທີ່ສາມາດເຊື່ອມຕໍ່ກັບການຂົນສົ່ງຫຼາຍຮູບແບບ;
3. ເຂດກວດກາດ້ວຍເຄື່ອງສາຍລັງສີ (X-Ray);
4. ລານກວດກາສຳລັບເຈົ້າໜ້າທີ່ ທີ່ກ່ຽວຂ້ອງ (Inspection Yard);
5. ອາຄານຫ້ອງການບໍລິການ ສໍາລັບເຈົ້າໜ້າທີ່ ທີ່ຈໍາເປັນ, ຜູ້ຈັດສົ່ງ, ຜູ້ສົ່ງ, ນາຍໜ້າ, ທະນາຄານ, ປະກັນໄພ ແລະ ຂະແໜງການອື່ນທີ່ກ່ຽວຂ້ອງ;
6. ຫ້ອງການຄຸ້ມຄອງ ແລະ ບໍລິການທ່າບົກ (Administration Office);
7. ຫ້ອງປະຖົມພະຍາບານເບື້ອງຕົ້ນ (First Aid Room);
8. ສະຖານທີ່ຄັດແຍກສິນຄ້າ (Cross Docking Area );  
9. ສາງສິນຄ້າກາງແຈ້ງ ແລະ ສາງສິນຄ້າໃນຮົ່ມ;
10. ພື້ນທີ່ເຕົ້າໂຮມ ແລະ ບັນຈຸສິນຄ້າ (Less Container Load Area);
11. ລານຈອດລົດບັນທຸກ (Truck Parking Yard);
12. ລານຕູ້ສິນຄ້າ (Container Yard);
13. ພື້ນທີ່ບຳບັດ (Treatment Area);
14. ພື້ນທີ່ເກັບຮັກສາສິນຄ້າອັນຕະລາຍ (Dangerous Goods Storage Area);
15. ຈຸດຊິງຊັ່ງນ້ຳໜັກ.
ນອກຈາກນີ້, ຍັງມີໂຄງລ່າງພື້ນຖານທາງດ້ານເຕັກນິກອື່ນທີ່ຈຳເປັນ ຊຶ່ງຂຶ້ນກັບຂະໜາດ ແລະ ຈຸດພິເສດຂອງແຕ່ລະທ່າບົກ.
ມາດຕາ 11 (ປັບປຸງ) ຍານພາຫະນະກົນຈັກ ແລະ ອຸປະກອນຢູ່ທ່າບົກ
ຍານພາຫະນະກົນຈັກ ແລະ ອຸປະກອນທີ່ຈຳເປັນຢູ່ທ່າບົກ ມີດັ່ງນີ້:
1. ລົດຍົກຍໍ (Fork Lift);
2. ລົດຄີບຕູ້ສິນຄ້າ (Reach Stacker);
3. ເຄື່ອງຍົກຕູ້ສິນຄ້າຂະໜາດໃຫຍ່ (Gantry Crane); 
4. ຖ້ານຮອງຮັບສິນຄ້າຂະໜາດໃຫຍ່ (Heavy Duty Shelf Super Rack);
5. ຖ້ານຮອງສິນຄ້າ (Pallet);
6. ເຄື່ອງກວດກາສິນຄ້າດ້ວຍລະບົບ X-Ray;
7. ຕູ້ສິນຄ້າ (Container);
8. ອຸປະກອນ ກວດກາ, ວິໄຈ, ບໍາບັດພະຍາດ ສັດ-ພືດ ແລະ ຜະລິດຕະພັນສັດ (Procurement for Animal Disease Diagnosis and Animal Products).
ນອກຈາກນີ້, ຍັງມີພາຫະນະກົນຈັກ ແລະ ອຸປະກອນອື່ນທີ່ມີຄວາມຈຳເປັນ ຊຶ່ງຂຶ້ນກັບຂະໜາດ ແລະ ຈຸດພິເສດຂອງແຕ່ລະທ່າບົກ.
ມາດຕາ 12 (ປັບປຸງ) ລະບົບເຕັກໂນໂລຊີການສື່ສານຂໍ້ມູນ ຂ່າວສານ
ລະບົບເຕັກໂນໂລຊີການສື່ສານຂໍ້ມູນຂ່າວສານ ທີ່ທັນສະໄໝ  ທີ່ຈຳເປັນສຳລັບທ່າບົກ ມີດັ່ງນີ້: 
1. ລະບົບອ່ານຂໍ້ມູນດ້ວຍເອເລັກໂຕຣນິກ (Electronic Date Reading System);
2. ລະບົບຕິດຕາມພາຫະນະ ແລະ ຕູ້ສິນຄ້າ (Vehicle and Container Tracking System, GPS);
3. ລະບົບການເງິນຜ່ານທະນາຄານດ້ວຍເຄື່ອງເອເລັກໂຕຣນິກ (E-Banking);
4. ລະບົບຄິດໄລ່ ແລະ ຈ່າຍຄ່າບໍລິການ (Calculation and Payment System);
5. ລະບົບບັນຊີແບບອອນລາຍ (Online Accounting);
6. ລະບົບແຈ້ງພາສີແບບເອເລັກໂຕຣນິກ (Automated System for Customs Data);
7. ໂຄງລ່າງພື້ນຖານທາງດ້ານຂ່າວສານເຕັກໂນໂລຊີ (Information Technology Infrastructure);
8. ລະບົບຄຸ້ມຄອງພະນັກງານ (Staff Management System);
9. ລະບົບຄຸ້ມຄອງການຄ່ຽນຖ່າຍ, ບັນຈຸ ແລະ ຄວບຄຸມ ການເຄື່ອນຍ້າຍສິນຄ້າ;
10. ລະບົບຄຸ້ມຄອງບໍລິຫານທ່າບົກ ແລະ ສະຫຼຸບ ລາຍງານ ແບບອັດຕະໂນມັດ (Dry Port Operating and Reporting System);
11. ລະບົບຄຸ້ມຄອງສາງສິນຄ້າ (Warehouse Management System); 
12. ລະບົບຄຸ້ມຄອງການແຈກຢາຍສິນຄ້າ (Distribution Management System).
ນອກຈາກນີ້, ຍັງມີລະບົບເຕັກໂນໂລຊີການສື່ສານຂໍ້ມູນຂ່າວສານ ທີ່ມີຄວາມຈຳເປັນ ຊຶ່ງຂຶ້ນກັບຂະໜາດ ແລະ ຈຸດພິເສດຂອງແຕ່ລະທ່າບົກ.
 
ມາດຕາ 13 ລະບົບຄວາມປອດໄພ
ລະບົບຄວາມປອດໄພ ທີ່ຈຳເປັນສຳລັບທ່າບົກ ມີດັ່ງນີ້: 
1. ລະບົບກ້ອງວົງຈອນປິດ;
2. ລະບົບປ້ອງກັນຄວາມປອດໄພ;
3. ລະບົບປ້ອງກັນອັກຄີໄພ;
4. ລະບົບຮັກສາຄວາມປອດໄພ;
5. ລະບົບກັນຟ້າຜ່າ. 
ນອກຈາກນີ້, ຍັງມີລະບົບຄວາມປອດໄພອື່ນ ທີ່ມີຄວາມຈຳເປັນ ຊຶ່ງຂຶ້ນກັບຂະໜາດ ແລະ ຈຸດພິເສດຂອງແຕ່ລະທ່າບົກ.
ມາດຕາ 14 (ປັບປຸງ) ການເຂົ້າ-ອອກທ່າບົກ
ກະຊວງໂຍທາທິການ ແລະ ຂົນສົ່ງ ເປັນຜູ້ກຳນົດ ເສັ້ນທາງ, ຍານພາຫະນະຂົນສົ່ງ ທີ່ເຂົ້າ-ອອກ    ທ່າບົກ ແລະ ສາຍທາງຂົນສົ່ງສິນຄ້າ ໄປຫາຈຸດໝາຍປາຍທາງຂອງການຂົນສົ່ງຫຼາຍຮູບແບບ.
ໝວດທີ 3
ຮູບການ ການລົງທຶນພັດທະນາທ່າບົກ
ມາດຕາ 15 (ໃໝ່) ຮູບການ ການລົງທຶນພັດທະນາທ່າບົກ
ການລົງທຶນພັດທະນາທ່າບົກ ມີ ສາມ ຮູບການ ດັ່ງນີ້:
1. ລັດ ລົງທຶນ ຮ້ອຍສ່ວນຮ້ອຍ;
2. ລັດ ຮ່ວມທຶນ ກັບ ເອກະຊົນ;
3. ເອກະຊົນ ລົງທຶນ ຮ້ອຍສ່ວນຮ້ອຍ.
ລັດຖະບານສາມາດເຂົ້າຖືຮຸ້ນໃນກິດຈະການສຳປະທານ ຕາມແຕ່ລະກໍລະນີ ທີ່ກຳນົດໄວ້ໃນກົດໝາຍທີ່ກ່ຽວຂ້ອງ.
ມາດຕາ 16 (ໃໝ່) ລັດ ລົງທຶນ ຮ້ອຍສ່ວນຮ້ອຍ
ລັດ ລົງທຶນ ຮ້ອຍສ່ວນຮ້ອຍ ແມ່ນ ການລົງທຶນຂອງລັດຖະບານ ສປປ ລາວ ແຕ່ພຽງຜູ້ດຽວ ເພື່ອພັດທະນາທ່າບົກ.
ມາດຕາ 17 (ໃໝ່) ລັດ ຮ່ວມທຶນ ກັບ ເອກະຊົນ
ລັດ ຮ່ວມທຶນ ກັບ ເອກະຊົນ ແມ່ນ ການລົງທຶນ ລະຫວ່າງ ລັດຖະບານ ສປປ ລາວ ຮ່ວມກັບ ເອກະຊົນ ພາຍໃນ, ເອກະຊົນ ຫຼື ລັດວິສາຫະກິດ ຕ່າງປະເທດ ເພື່ອພັດທະນາທ່າບົກ ຢູ່ ສປປ ລາວ. 
ມາດຕາ 18 (ໃໝ່) ເອກະຊົນ ລົງທຶນຮ້ອຍສ່ວນຮ້ອຍ
ເອກະຊົນລົງທຶນຮ້ອຍສ່ວນຮ້ອຍ ແມ່ນ ການລົງທຶນຂອງເອກະຊົນ ໂດຍຜູ້ລົງທຶນຜູ້ດຽວ ຫຼື ມີການຮ່ວມທຶນກັນ ເພື່ອພັດທະນາທ່າບົກ ຢູ່ ສປປ ລາວ.
ໃນກໍລະນີມີການລົງທຶນຮ່ວມຂອງຕ່າງປະເທດ ການຖືຮຸ້ນຂອງຕ່າງປະເທດນັ້ນ ບໍ່ໃຫ້ເກີນ ສີ່ສິບເກົ້າ ສ່ວນຮ້ອຍ (49%).
 
 
ໝວດທີ 4
ການຂໍອະນຸຍາດພັດທະນາທ່າບົກ 
ມາດຕາ 19 (ປັບປຸງ) ການສະເໜີຂໍອະນຸຍາດພັດທະນາທ່າບົກ
ນິຕິບຸກຄົນ ທີ່ມີຈຸດປະສົງພັດທະນາທ່າບົກ ບ່ອນທີ່ລັດຖະບານກຳນົດ ຕ້ອງຍື່ນຄຳຮ້ອງຂໍອະນຸຍາດພັດທະນາຕາມແບບພິມ ຕໍ່ຫ້ອງການບໍລິການການລົງທຶນປະຕູດຽວຂັ້ນສູນກາງ ຕາມທີ່ກຳນົດໄວ້ໃນ ກົດໝາຍ
ວ່າດ້ວຍການສົ່ງເສີມການລົງທຶນ. 
ໃນກໍລະນີ ມີຜູ້ຕ້ອງການພັດທະນາທ່າບົກແຕ່ສອງຄົນຂຶ້ນໄປ ໃຫ້ດຳເນີນການຄັດເລືອກຜູ້ພັດທະນາດ້ວຍຮູບການປະມູນ.
ມາດຕາ 20 (ປັບປຸງ) ເງື່ອນໄຂຂອງຜູ້ທີ່ຈະພັດທະນາທ່າບົກ
ຜູ້ທີ່ຈະສະເໜີ ພັດທະນາທ່າບົກ ຕ້ອງມີເງື່ອນໄຂ ດັ່ງນີ້:
1. ເປັນນິຕິບຸກຄົນ;
2. ມີຖານະທາງດ້ານການເງິນ ຫຼື ແຫຼ່ງທຶນ ຊຶ່ງໄດ້ຮັບການຢັ້ງຢືນຈາກສະຖາບັນການເງິນ ພາຍໃນ ຫຼື ຕ່າງປະເທດ;
3. ມີບຸກຄະລາກອນທີ່ມີປະສົບການ ກ່ຽວກັບວຽກງານໂລຊິດສະຕິກ ຫຼື ຂົນສົ່ງສິນຄ້າ;
4. ມີການປະສານສົມທົບ, ພົວພັນທາງດ້ານ ການຄ້າ, ແຫຼ່ງສິນຄ້າ ທັງພາຍໃນ ແລະ ສາກົນ;
5. ມີທີ່ປຶກສາ ຫຼື ບໍລິສັດທີ່ປຶກສາ ທີ່ຈະສຶກສາຄວາມເປັນໄປໄດ້ໃນການພັດທະນາທ່າບົກ ທີ່ໄດ້ຮັບອະນຸຍາດ ຈາກ ກະຊວງໂຍທາທິການ ແລະ ຂົນສົ່ງ;
6. ບໍ່ເຄີຍຖືກສານຕັດສີນ ໃຫ້ລົ້ມລະລາຍ.
ມາດຕາ 21 (ປັບປຸງ) ເອກະສານປະກອບຂໍອະນຸຍາດພັດທະນາທ່າບົກ
ເອກະສານປະກອບຂໍອະນຸຍາດພັດທະນາທ່າບົກ ມີດັ່ງນີ້:
1. ຄຳຮ້ອງຂໍອະນຸຍາດພັດທະນາທ່າບົກ;
2. ປະຫວັດ ແລະ ປະສົບການຂອງ ຜູ້ທີ່ຈະພັດທະນາ; 
3. ໃບທະບຽນວິສາຫະກິດ; 
4. ສັນຍາຮ່ວມທຸລະກິດ (ຖ້າມີ);
5. ໃບມອບສິດໃຫ້ຜູ້ຕາງໜ້າ ບັນດາຂາຮຸ້ນ ຫຼື ຜູ້ຖືຮຸ້ນຂອງວິສາຫະກິດ ໃນກໍລະນີບຸກຄົນດັ່ງກ່າວ ບໍ່ຢູ່ໃນຕຳແໜ່ງສູງສຸດຂອງບໍລິສັດ;
6. ບົດສະເໜີການສຶກສາຄວາມເປັນໄປໄດ້ໃນການພັດທະນາທ່າບົກ;
7. ໃບຢັ້ງຢືນ ທີ່ປຶກສາ ຫຼື ບໍລິສັດທີ່ປຶກສາ ທີ່ຈະສຶກສາຄວາມເປັນໄປໄດ້ໃນການພັດທະນາທ່າບົກ;
8. ໃບຢັ້ງຢືນການມອບພັນທະອາກອນປະຈຳປີ;
9. ໃບຢັ້ງຢືນຖານະການເງິນ ຫຼື ເອກະສານສະໜັບສະໜູນ ຈາກສະຖາບັນການເງິນ;
10. ກົດລະບຽບບໍລິສັດ ຕາມຮູບແບບທີ່ກໍານົດ. 
ມາດຕາ 22 (ປັບປຸງ) ຂັ້ນຕອນການອະນຸຍາດພັດທະນາທ່າບົກ
ການອະນຸຍາດພັດທະນາທ່າບົກ ມີຂັ້ນຕອນ ດັ່ງນີ້:
1. ພາຍຫຼັງໄດ້ຮັບຄຳຮ້ອງຂໍອະນຸຍາດພັດທະນາທ່າບົກ ຫ້ອງການບໍລິການ ການລົງທຶນປະຕູດຽວຂັ້ນສູນກາງ ຄົ້ນຄວ້າ ໂດຍປະສານສົມທົບກັບ ກະຊວງໂຍທາທິການ ແລະ ຂົນສົ່ງ, ກະຊວງ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ແລ້ວສະເໜີຕໍ່ ກະຊວງແຜນການ ແລະ ການລົງທຶນ;
2. ກະຊວງແຜນການ ແລະ ການລົງທຶນ ຄົ້ນຄວ້າ ແລະ ນຳສະເໜີຕໍ່ລັດຖະບານ ເພື່ອພິຈາລະນາອະນຸມັດ ລົງນາມບົດບັນທຶກຄວາມເຂົ້າໃຈສຶກສາຄວາມເປັນໄປໄດ້ ກ່ຽວກັບການພັດທະນາທ່າບົກ;
3. ພາຍຫຼັງໄດ້ຮັບການພິຈາລະນາເຫັນດີ ຈາກລັດຖະບານ, ກະຊວງໂຍທາທິການ ແລະ ຂົນສົ່ງ ເປັນຜູ້ກຳນົດໜ້າວຽກ ແລະ ກະຊວງແຜນການ ແລະ ການລົງທຶນ ເປັນຜູ້ລົງນາມບົດບັນທຶກຄວາມເຂົ້າໃຈສຶກສາຄວາມເປັນໄປໄດ້;
4. ຜູ້ພັດທະນາທ່າບົກ ດຳເນີນການສຶກສາຄວາມເປັນໄປໄດ້ ກ່ຽວກັບການພັດທະນາທ່າບົກ ໂດຍສອດຄ່ອງກັບການກໍານົດໜ້າວຽກ ຂອງກະຊວງໂຍທາທິການ ແລະ ຂົນສົ່ງ ໃຫ້ສຳເລັດ ພາຍໃນກຳນົດເວລາ ສິບສອງ ເດືອນ;
5. ຜູ້ພັດທະນາທ່າບົກ ດຳເນີນການປະເມີນຜົນກະທົບຕໍ່ສິ່ງແວດລ້ອມ ແລ້ວສະເໜີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຮັບຮອງຕາມກົດໝາຍ;
6. ກະຊວງໂຍທາທິການ ແລະ ຂົນສົ່ງ ປະສານສົມທົບກັບ ກະຊວງແຜນການ ແລະ ການລົງທຶນ, ກະຊວງ ແລະ ອົງການປົກຄອງທ້ອງຖິ່ນ ທີ່ກ່ຽວຂ້ອງ ຄົ້ນຄວ້າ ແລະ ຮັບຮອງເອົາ ບົດລາຍງານການສຶກສາຄວາມເປັນໄປໄດ້ ກ່ຽວກັບການພັດທະນາທ່າບົກ;
7. ກະຊວງແຜນການ ແລະ ການລົງທຶນ ປະສານສົມທົບກັບ ກະຊວງໂຍທາທິການ ແລະ ຂົນສົ່ງ, ກະຊວງ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ຄົ້ນຄວ້າ ແລະ ເຈລະຈາສັນຍາສຳປະທານ ລວມທັງການເຂົ້າຖືຮຸ້ນຂອງລັດ ເພື່ອສະເໜີລັດຖະບານ ພິຈາລະນາອະນຸມັດ ລົງນາມສັນຍາສຳປະທານ;
8. ຜູ້ພັດທະນາທ່າບົກ ຕ້ອງສ້າງຕັ້ງບໍລິສັດໂຄງການ ແລະ ຂໍອະນຸຍາດດໍາເນີນທຸລະກິດ ຕາມກົດ   ໝາຍທີ່ກ່ຽວຂ້ອງ;
ສຳລັບກຳນົດເວລາໃນການພິຈາລະນາແຕ່ລະຂັ້ນຕອນ ໃຫ້ປະຕິບັດ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍການສົ່ງເສີ່ມການລົງທຶນ.
ມາດຕາ 23 (ປັບປຸງ) ຂອບເຂດການໃຫ້ບໍລິການຂອງຜູ້ພັດທະນາທ່າບົກ
ຂອບເຂດການໃຫ້ບໍລິການຂອງຜູ້ພັດທະນາທ່າບົກ ມີດັ່ງນີ້:
1. ຮັບ ແລະ ສົ່ງ ສິນຄ້າ;
2. ເຕົ້າໂຮມ ແລະ ແຈກຢາຍສິນຄ້າ;
3. ຍົກຍໍ-ຄ່ຽນຖ່າຍສິນຄ້າ;
4. ເກັບຮັກສາ ແລະ ໃຫ້ບໍລິການຕູ້ສິນຄ້າ;
5. ລະບົບສາງ;
6. ແຈ້ງພາສີ;
7. ແຈ້ງກວດກາພືດ-ສັດ;
8. ປະກັນໄພສິນຄ້າ ແລະ ທະນາຄານ;
9. ກິດຈະການອື່ນທີ່ໄດ້ຮັບອະນຸຍາດຈາກລັດຖະບານ.
ຜູ້ພັດທະນາທ່າບົກ ສາມາດໃຫ້ການບໍລິການ ຕາມ ຂໍ້ 1 ຫາ ຂໍ້ 4, ສ່ວນການໃຫ້ບໍລິການ ຕາມ ຂໍ້ 5 ຫາ ຂໍ້ 8 ຕ້ອງໄດ້ຂໍອະນຸຍາດນຳຂະແໜງການທີ່ກ່ຽວຂ້ອງ.
ສິນຄ້າຜ່ານແດນ ຜ່ານ ສປປ ລາວ ໄປປະເທດທີ່ສາມ ບໍ່ຈຳເປັນຜ່ານທ່າບົກ, ແຕ່ຜ່ານການກວດກາຂອງເຈົ້າໜ້າທີ່ພາສີຢູ່ດ່ານຊາຍແດນ ຫຼື ບ່ອນທີ່ລັດຖະການພາສີກຳນົດ. 
ມາດຕາ 24 ສິດຂອງຜູ້ພັດທະນາ
ຜູ້ພັດທະນາ ມີ ສິດ ດັ່ງນີ້:
1. ໄດ້ຮັບການສົ່ງເສີມ ແລະ ອຳນວຍຄວາມສະດວກ ໃນການພັດທະນາທ່າບົກ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍການສົ່ງເສີມການລົງທຶນ ແລະ ກົດໝາຍ ອື່ນທີ່ກ່ຽວຂ້ອງ;
2. ໄດ້ຮັບການປົກປ້ອງສິດ ແລະ ຜົນປະໂຫຍດອັນຊອບທຳ ທີ່ໄດ້ມາຈາກການລົງທຶນພັດທະນາ   ທ່າບົກ ທີ່ຕົນໄດ້ຮັບອະນຸຍາດ;
3. ຄັດເລືອກ ແລະ ເຮັດສັນຍາ ດໍາເນີນທຸລະກິດກັບ ຜູ້ລົງທຶນກິດຈະການ;
4. ໄດ້ຮັບຜົນປະໂຫຍດຈາກການໃຫ້ເຊົ່າ ໂດຍສອດຄ່ອງກັບກົດໝາຍ ແລະ ລະບຽບການ;
5. ນຳໃຊ້ທີ່ດິນຕາມອາຍຸສັນຍາສຳປະທານ ໂດຍສອດຄ່ອງກັບກົດໝາຍ ແລະ ລະບຽບການ;
6. ເປັນເຈົ້າກຳມະສິດຕໍ່ຊັບສິນທີ່ຕົນໄດ້ພັດທະນາຢູ່ໃນທ່າບົກ ເປັນຕົ້ນ ອາຄານ, ສິ່ງປຸກສ້າງ, ພາຫະ ນະກົນຈັກ;
7. ໄດ້ຮັບສິດອື່ນ ຕາມທີ່ໄດ້ກຳນົດໄວ້ໃນກົດໝາຍ.
ມາດຕາ 25 (ປັບປຸງ) ພັນທະຂອງຜູ້ພັດທະນາ
ຜູ້ພັດທະນາ ມີ ພັນທະ ດັ່ງນີ້:
1. ປະຕິບັດຕາມ ສັນຍາພັດທະນາ, ແຜນແມ່ບົດພັດທະນາ, ບົດວິພາກເສດຖະກິດ-ເຕັກນິກ, ບົດປະເມີນຜົນກະທົບຕໍ່ສິ່ງແວດລ້ອມ, ແຜນຄຸ້ມຄອງ ແລະ ຕິດຕາມ ກວດກາ ສິ່ງແວດລ້ອມ;
2. ເສຍ ພາສີ, ອາກອນ, ຄ່າເຊົ່າ ຫຼື ສໍາປະທານທີ່ດິນ, ຄ່າທຳນຽມ, ຄ່າບໍລິການ ແລະ ພັນທະອື່ນ ຢ່າງຄົບຖ້ວນ ຕາມສັນຍາພັດທະນາ, ກົດໝາຍ ແລະ ລະບຽບການ;
3. ໃຫ້ການຮ່ວມມືກັບ ຂະແໜງການ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ, ປະກອບສ່ວນໃນການພັດທະນາທ້ອງຖິ່ນ ເປັນຕົ້ນ ການບູລະນະຮັກສາທາງຫຼວງ, ການປູກຈິດສຳນຶກດ້ານຄວາມປອດໄພ ຕາມທາງຫຼວງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານສາທາລະນະສຸກ, ການແກ້ໄຂເຫດການສຸກເສີນ;
4. ຖືບັນຊີຕາມ ກົດໝາຍ ວ່າດ້ວຍການບັນຊີ ໃນກໍລະນີຈຳເປັນ ກໍສາມາດນຳໃຊ້ລະບົບບັນຊີສາກົນ ແຕ່ຕ້ອງໄດ້ຮັບການເຫັນດີ ຈາກຂະແໜງການການເງິນ;
5. ນຳໃຊ້, ພັດທະນາສີມືແຮງງານ, ຍົກລະດັບວິຊາສະເພາະ ແລະ ເຕັກໂນໂລຊີ ໃຫ້ແກ່ຜູ້ອອກແຮງງານລາວ ໂດຍສະເພາະເພດຍິງ ແລະ ຊົນເຜົ່າ;
6. ເຂົ້າລະບົບປະກັນສັງຄົມ;
7. ທົດແທນຄ່າເສຍຫາຍ ທີ່ເກີດຈາກຄວາມຜິດພາດໃນການໃຫ້ບໍລິການຂອງຕົນ ຕາມມູນຄ່າຂອງສິນຄ້າ;
8. ສະຫຼຸບ ແລະ ລາຍງານ ບັນດາສະຖິຕິ ແລະ ການດຳເນີນທຸລະກິດຂອງຕົນ ຕໍ່ຄະນະຄຸ້ມຄອງ   ທ່າບົກ, ຫ້ອງການການບໍລິການ ການລົງທຶນປະຕູດຽວຂັ້ນສູນກາງ, ກະຊວງໂຍທາທິການ ແລະ ຂົນສົ່ງ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ຢ່າງເປັນປົກກະຕິ;
9. ປະຕິບັດພັນທະອື່ນ ຕາມທີ່ໄດ້ກຳນົດໄວ້ໃນກົດໝາຍ.
ມາດຕາ 26 (ໃໝ່) ການສະເໜີຂໍລະຫັດທ່າບົກ
ກະຊວງໂຍທາທິການ ແລະ ຂົນສົ່ງ ເປັນຜູ້ຄົ້ນຄວ້າພິຈາລະນາ ກ່ຽວກັບ ເງື່ອນໄຂ, ມາດຕະຖານ ຂອງທ່າບົກ ເພື່ອສະເໜີຫາອົງການຈັດຕັ້ງສາກົນທີ່ກ່ຽວຂ້ອງ ພິຈາລະນາອອກລະຫັດໃຫ້ທ່າບົກດັ່ງກ່າວ. 
ພາຍຫຼັງໄດ້ລະຫັດແລ້ວ ທ່າບົກດັ່ງກ່າວ ສາມາດໃຫ້ບໍລິການໂລຊິດສະຕິກ ແລະ ຂົນສົ່ງສິນຄ້າໄປສູ່ສາກົນໄດ້. 
ໝວດທີ 5
ການລົງທຶນກິດຈະການຢູ່ໃນຂອບເຂດຂອງທ່າບົກ
ມາດຕາ 27 (ປັບປຸງ) ປະເພດການລົງທຶນກິດຈະການ
ປະເພດການລົງທຶນກິດຈະການ ຢູ່ໃນຂອບເຂດຂອງທ່າບົກ ມີດັ່ງນີ້:
1. ສາງສິນຄ້າ;
2. ສະຖານີຄ່ຽນຖ່າຍສິນຄ້າ;
3. ສະຖານີລົດຂົນສົ່ງສິນຄ້າ;
4. ລານຕູ້ສິນຄ້າ;
5. ສູນສ້ອມແປງຕູ້ສິນຄ້າ;
6. ການຫຸ້ມຫໍ່;
7. ການຂ້າເຊື້ອພະຍາດ;
8. ກິດຈະການອື່ນ.
ມາດຕາ 28 (ປັບປຸງ) ການສະເໜີຂໍລົງທຶນກິດຈະການ
ນິຕິບຸກຄົນ ທີ່ມີຈຸດປະສົງລົງທຶນກິດຈະການຢູ່ໃນຂອບເຂດທ່າບົກ ໃຫ້ສະເໜີຕໍ່ ຄະນະຄຸ້ມຄອງທ່າບົກ ເພື່ອຄົ້ນຄວ້າພິຈາລະນາ.
ສໍາລັບຜູ້ພັດທະນາ ທີ່ມີຈຸດປະສົງລົງທຶນກິດຈະການໃດໜຶ່ງ ໃນທ່າບົກທີ່ຕົນພັດທະນາ ທີ່ບໍ່ນອນໃນການໃຫ້ບໍລິການຕາມທີ່ກຳນົດໄວ້ໃນ ມາດຕາ 23 ຂອງດໍາລັດສະບັບນີ້ ຕ້ອງສ້າງເປັນນິຕິບຸກຄົນໃໝ່ ແລະ ໃຫ້ປະຕິບັດຕາມ ໝວດທີ 5 ຂອງດໍາລັດສະບັບນີ້.
ມາດຕາ 29 ເງື່ອນໄຂຜູ້ລົງທຶນກິດຈະການ
ຜູ້ລົງທຶນກິດຈະການຢູ່ໃນຂອບເຂດຂອງທ່າບົກ ຕ້ອງມີເງື່ອນໄຂ ດັ່ງນີ້:
1. ເປັນນິຕິບຸກຄົນ;
2. ມີສັນຍາດຳເນີນທຸລະກິດກັບຜູ້ພັດທະນາ;
3. ໄດ້ຮັບອະນຸຍາດການດໍາເນີນທຸລະກິດ ຈາກຂະແໜງການທີ່ກ່ຽວຂ້ອງ;
4. ມີບຸກຄະລາກອນ ທີ່ມີຄວາມຮູ້ ແລະ ປະສົບການ ກ່ຽວກັບກິດຈະການ ທີ່ຈະໃຫ້ບໍລິການນັ້ນ;
5. ມີທຶນພຽງພໍທີ່ເໝາະສົມກັບ ປະເພດ ແລະ ຂະໜາດຂອງກິດຈະການ;
6. ມີອຸປະກອນ, ເຄື່ອງມື ແລະ ຍານພາຫະນະ ທີ່ໄດ້ມາດຕະຖານ, ທັນສະໄໝ ແລະ ເໝາະສົມກັບ    ຂະໜາດຂອງກິດຈະການ;
7. ບໍ່ເຄີຍຖືກສານຕັດສິນ ໃຫ້ລົ້ມລະລາຍ.
ມາດຕາ 30 ເອກະສານປະກອບຂໍອະນຸຍາດລົງທຶນກິດຈະການທ່າບົກ
ເອກະສານປະກອບຂໍອະນຸຍາດລົງທຶນກິດຈະການຢູ່ໃນຂອບເຂດທ່າບົກ ມີດັ່ງນີ້:
1. ໜັງສືສະເໜີຂໍລົງທຶນ;
2. ໃບທະບຽນວິສາຫະກິດ;
3. ສັນຍາດຳເນີນທຸລະກິດກັບຜູ້ພັດທະນາ;
4. ໃບອະນຸຍາດດໍາເນີນທຸລະກິດ;
5. ບົດວິພາກເສດຖະກິດ-ເຕັກນິກ ຫຼື ແຜນທຸລະກິດ;
6. ກົດລະບຽບພາຍໃນຂອງວິສາຫະກິດ;
7. ເອກະສານຢັ້ງຢືນຖານະການເງິນຈາກສະຖາບັນການເງິນ.
ມາດຕາ 31 ສິດຂອງຜູ້ລົງທຶນກິດຈະການ
ຜູ້ລົງທຶນກິດຈະການ ມີ ສິດ ດັ່ງນີ້:
1. ໄດ້ຮັບການສົ່ງເສີມ ແລະ ອຳນວຍຄວາມສະດວກຈາກລັດ ແລະ ຜູ້ພັດທະນາໃນການລົງທຶນກິດຈະການ ຕາມທີ່ກຳນົດໄວ້ໃນກົດໝາຍວ່າດ້ວຍການສົ່ງເສີມການລົງທຶນ ແລະ ກົດໝາຍອື່ນທີ່ກ່ຽວຂ້ອງ;
2. ໄດ້ຮັບການປົກປ້ອງການລົງທຶນດ້ານຕ່າງໆ ຈາກລັດ, ສິດ ແລະ ຜົນປະໂຫຍດອັນຊອບທຳ ທີ່ໄດ້ມາຈາກການລົງທຶນກິດຈະການຂອງຕົນ;
3. ນຳໃຊ້ທີ່ດິນ ຕາມສັນຍາລົງທຶນກິດຈະການ ໂດຍສອດຄ່ອງກັບກົດໝາຍ ແລະ ລະບຽບການທີ່ກ່ຽວຂ້ອງ;
4. ເປັນເຈົ້າກຳມະສິດຕໍ່ຊັບສິນ ໃນການລົງທຶນກິດຈະການຂອງຕົນ;
5. ໄດ້ຮັບສິດອື່ນ ຕາມທີ່ກຳນົດໄວ້ໃນກົດໝາຍ.
ມາດຕາ 32 (ປັບປຸງ) ພັນທະຂອງຜູ້ລົງທຶນກິດຈະການ
ຜູ້ລົງທຶນກິດຈະການ ມີ ພັນທະ ດັ່ງນີ້:
1. ດຳເນີນກິດຈະການ ຕາມການອະນຸຍາດ ແລະ ປະຕິບັດຖືກຕ້ອງ ຕາມສັນຍາກັບຜູ້ພັດທະນາ;
2. ເສຍຄ່າເຊົ່າໃຫ້ຜູ້ພັດທະນາ ຕາມສັນຍາ;
3. ເສຍ ພາສີ, ອາກອນ, ຄ່າທຳນຽມ ແລະ ຄ່າບໍລິການ ຢ່າງຄົບຖ້ວນ ຕາມສັນຍາ, ກົດໝາຍ ແລະ ລະບຽບການ;
4. ສະຫຼຸບ ແລະ ລາຍງານ ບັນດາສະຖິຕິ ແລະ ການດຳເນີນທຸລະກິດຂອງຕົນ ຕໍ່ຜູ້ພັດທະນາທ່າບົກ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ຢ່າງເປັນປົກກະຕິ;
5. ໃຫ້ການຮ່ວມມືກັບ ຂະແໜງການ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ;
6. ທົດແທນຄ່າເສຍຫາຍ ທີ່ເກີດຈາກຄວາມຜິດພາດໃນການໃຫ້ບໍລິການຂອງຕົນ ຕາມມູນຄ່າຂອງສິນຄ້າ;
7. ປະຕິບັດພັນທະອື່ນ ຕາມທີ່ກຳນົດໄວ້ໃນກົດໝາຍ.
ໝວດທີ 6
ການຈັດຕັ້ງທີ່ຄຸ້ມຄອງທ່າບົກ
ມາດຕາ 33 (ໃໝ່) ການຈັດຕັ້ງທີ່ຄຸ້ມຄອງທ່າບົກ
ການຈັດຕັ້ງທີ່ຄຸ້ມຄອງທ່າບົກ ປະກອບດ້ວຍ:
1. ຄະນະຄຸ້ມຄອງທ່າບົກ;
2. ໜ່ວຍງານລັດທີ່ປະຈຳຢູ່ທ່າບົກ.
ມາດຕາ 34 (ປັບປຸງ) ຄະນະຄຸ້ມຄອງທ່າບົກ
ຄະນະຄຸ້ມຄອງທ່າບົກ ແມ່ນ ການຈັດຕັ້ງທີ່ບໍ່ປະຈຳການ ຊຶ່ງສ້າງຕັ້ງຂຶ້ນເພື່ອຄຸ້ມຄອງ, ຕິດຕາມ ກວດກາ ການຈັດຕັ້ງປະຕິບັດ ກົດໝາຍ ແລະ ລະບຽບການ ທີ່ກ່ຽວຂ້ອງກັບທ່າບົກ.
ຄະນະຄຸ້ມຄອງທ່າບົກ ຖືກແຕ່ງຕັ້ງ ແລະ ປົດຕໍາແໜ່ງ ໂດຍ ລັດຖະມົນຕີ ກະຊວງໂຍທາທິການ  ແລະ ຂົນສົ່ງ ຊຶ່ງປະກອບດ້ວຍ ຫົວໜ້າທີ່ເປັນຜູ້ຕາງໜ້າ ຈາກຂະແໜງການໂຍທາທິການ ແລະ ຂົນສົ່ງ, ຮອງຫົວໜ້າ ແລະ ຄະນະຈຳນວນໜຶ່ງ ທີ່ເປັນຜູ້ຕາງໜ້າຂະແໜງການອື່ນທີ່ກ່ຽວຂ້ອງ.
ມາດຕາ 35 (ປັບປຸງ) ສິດ ແລະ ໜ້າທີ່ ຂອງຄະນະຄຸ້ມຄອງທ່າບົກ   
ຄະນະຄຸ້ມຄອງທ່າບົກ ມີ ສິດ ແລະ ໜ້າທີ່ ດັ່ງນີ້:
1. ຊຸກຍູ້ ແລະ ຕິດຕາມ ການເກັບກຳຂໍ້ມູນ, ສະຖິຕິ ກ່ຽວກັບການພັດທະນາ, ລົງທຶນ ແລະ ດຳເນີນທຸລະກິດຢູ່ທ່າບົກ; 
2. ຊຸກຍູ້ ແລະ ຕິດຕາມ ການເຄື່ອນໄຫວວຽກງານຂອງບັນດາໜ່ວຍງານທີ່ປະຈຳຢູ່ທ່າບົກ;
3. ຕິດຕາມ ກວດກາ ແລະ ຊຸກຍູ້ ຜູ້ພັດທະນາ ແລະ ຜູ້ລົງທຶນກິດຈະການ ໃຫ້ປະຕິບັດ ຕາມສັນຍາພັດທະນາ, ກົດໝາຍ ແລະ ລະບຽບການ;
4. ສະເໜີຂັ້ນເທິງ ປັບປຸງຄ່າທຳນຽມ ແລະ ຄ່າບໍລິການຕ່າງໆ ທີ່ເຫັນວ່າບໍ່ສອດຄ່ອງກັບສະພາບຄວາມເປັນຈິງຂອງການຂະຫຍາຍຕົວທາງດ້ານເສດຖະກິດ-ສັງຄົມ ໃນແຕ່ລະໄລຍະ;
5. ສະເໜີຫາຂະແໜງການ ແລະ/ຫຼື ອົງການທີ່ກ່ຽວຂ້ອງ ຄົ້ນຄວ້າ ພິຈາລະນາຮັບຮອງ ຄ່າບໍລິການ ຂອງຜູ້ພັດທະນາ ແລະ ຜູ້ລົງທຶນກິດຈະການ;
6. ຮັບ ແລະ ແກ້ໄຂຄຳສະເໜີ ຂອງຜູ້ພັດທະນາ ແລະ ຜູ້ລົງທຶນກິດຈະການ ຕາມຂອບເຂດສິດ ແລະ ໜ້າທີ່ຂອງຕົນ;
7. ປະສານສົມທົບກັບ ຂະແໜງການ ແລະ ພາກສ່ວນທີ່ກ່ຽວຂ້ອງ ເພື່ອໃຫ້ການຮ່ວມມື ແລະ ອຳນວຍຄວາມສະດວກ ໃຫ້ແກ່ການເຄື່ອນໄຫວວຽກງານຂອງທ່າບົກ;
8. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງທ່າບົກ ໃຫ້ກະຊວງໂຍທາທິການ ແລະ ຂົນສົ່ງ ແລະ ອົງການປົກຄອງແຂວງ, ນະຄອນຫຼວງ ບ່ອນທີ່ທ່າບົກຕັ້ງຢູ່ ຢ່າງເປັນປົກກະຕິ;
9. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.
ມາດຕາ 36 (ປັບປຸງ) ໜ່ວຍງານລັດ ທີ່ປະຈໍາຢູ່ທ່າບົກ
ໜ່ວຍງານລັດ ທີ່ປະຈໍາຢູ່ທ່າບົກ ມີດັ່ງນີ້:
1. ໂຍທາທິການ ແລະ ຂົນສົ່ງ;
2. ພາສີ;
3. ກັກກັນພືດ-ສັດ; 
4. ອາຫານ, ຢາ ແລະ ຄວບຄຸມພະຍາດຕິດຕໍ່; 
5. ກວດຄົນເຂົ້າ-ອອກເມືອງ ຕາມເງື່ອນໄຂ ຈຸດພິເສດຂອງທ່າບົກ. 
ແຕ່ລະໜ່ວຍງານລັດ ໄດ້ຮັບການແຕ່ງຕັ້ງ ຫຼື ປົດຕຳແໜ່ງ ໂດຍຂະແໜງການສາຍຕັ້ງຂອງຕົນ ເພື່ອປະຕິບັດໜ້າທີ່ປະຈຳຢູ່ແຕ່ລະທ່າບົກ.
ໜ່ວຍງານລັດທີ່ປະຈຳຢູ່ທ່າບົກ ຂຶ້ນຕາມເງື່ອນໄຂ ຈຸດພິເສດຂອງແຕ່ລະທ່າບົກ.
ມາດຕາ 37 (ໃໝ່) ສິດ ແລະ ໜ້າທີ່ ຂອງໜ່ວຍງານໂຍທາທິການ ແລະ ຂົນສົ່ງ
ໜ່ວຍງານໂຍທາທິການ ແລະ ຂົນສົ່ງ ປະຈຳຢູ່ທ່າບົກ ມີ ສິດ ແລະ ໜ້າທີ່ ດັ່ງນີ້:
1. ຄຸ້ມຄອງ, ຕິດຕາມ ກວດກາ ແລະ ອຳນວຍຄວາມສະດວກ ໃຫ້ແກ່ການເຂົ້າ-ອອກ ຍານພາຫະນະ ຂົນສົ່ງສິນຄ້າ ແລະ ການຜ່ານແດນຂອງຍານພາຫະນະຂົນສົ່ງສິນຄ້າໃຫ້ວ່ອງໄວ ແລະ ຖືກຕ້ອງ ຕາມກົດໝາຍ ແລະ ລະບຽບການ;
2. ຕິດຕາມ ກວດກາ ການຊັ່ງນ້ຳໜັກຍານພາຫະນະຂົນສົ່ງສິນຄ້າ;
3. ຕິດຕາມ ກວດກາ ການແລ່ນຍານພາຫະນະຂົນສົ່ງສິນຄ້າຕາມສາຍທາງກຳນົດ;
4. ເກັບກຳຂໍ້ມູນສະຖິຕິ ຂອງຍານພາຫະນະຂົນສົ່ງສິນຄ້າ;
5. ກວດກາມາດຕະຖານເຕັກນິກຂອງຍານພາຫະນະຂົນສົ່ງສິນຄ້າ;
6. ກວດກາຍານພາຫະນະຂົນສົ່ງສິນຄ້າ ພິເສດ ແລະ ວັດຖຸອັນຕະລາຍ;
7. ກຳນົດວິທີການ ຄ່ຽນຖ່າຍ, ສັບປ່ຽນ ຫົວລາກ-ຫາງລາກ ຕາມສັນຍາຂົນສົ່ງ;
8. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງໜ່ວຍງານໂຍທາທິການ ແລະ ຂົນສົ່ງ ໃຫ້ຂັ້ນເທິງຂອງຕົນ ຢ່າງເປັນປົກກະຕິ;
9. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.
ມາດຕາ 38 (ປັບປຸງ) ສິດ ແລະ ໜ້າທີ່ ຂອງໜ່ວຍງານພາສີ
ໜ່ວຍງານພາສີປະຈຳຢູ່ທ່າບົກ ມີ ສິດ ແລະ ໜ້າທີ່ ດັ່ງນີ້:
1. ຄຸ້ມຄອງ, ຕິດຕາມ ກວດກາ ແລະ ອຳນວຍຄວາມສະດວກ ໃຫ້ແກ່ການນໍາເຂົ້າ-ສົ່ງອອກ ແລະ ການຜ່ານແດນສິນຄ້າ ໃຫ້ວ່ອງໄວ ແລະ ຖືກຕ້ອງ ຕາມກົດໝາຍ ແລະ ລະບຽບການ;
2. ເກັບພາສີ ແລະ ພັນທະອື່ນ ທີ່ກົດໝາຍ ແລະ ລະບຽບການ ກໍານົດໃຫ້ລັດຖະການພາສີຮັບຜິດຊອບ;
3. ກວດກາ ແລະ ສະກັດກັ້ນ ທຸກການລະເມີດກົດໝາຍ ແລະ ລະບຽບການ ກ່ຽວກັບພາສີ; 
4. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງໜ່ວຍງານພາສີ ໃຫ້ຂັ້ນເທິງຂອງຕົນ ຢ່າງເປັນປົກກະຕິ;
5. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.
ມາດຕາ 39 (ປັບປຸງ) ສິດ ແລະ ໜ້າທີ່ ຂອງໜ່ວຍງານກັກກັນ ພືດ-ສັດ
ໜ່ວຍງານກັກກັນພືດ-ສັດ ມີ ສິດ ແລະ ໜ້າທີ່ ດັ່ງນີ້:
1. ກວດກາ ແລະ ສະກັດກັ້ນທຸກການລະເມີດ ກົດໝາຍ ແລະ ລະບຽບການ ກ່ຽວກັບການປ້ອງກັນ 
ແລະ ກັກກັນພືດ-ສັດ;
2. ກວດກາ ແລະ ອຳນວຍຄວາມສະດວກ ໃຫ້ແກ່ການນຳເຂົ້າ-ສົ່ງອອກ ແລະ ຜ່ານແດນ ສົ່ງຜ່ານພືດ ແລະ ຜະລິດຕະພັນ, ແນວພັນພືດ, ຝຸ່ນ ແລະ ຢາປາບສັດຕູພືດ ລວມທັງສັດ ແລະ ຜະລິດຕະພັນສັດ ພືດ-ສັດ ຢ່າງວ່ອງໄວ, ໂປ່ງໃສ ແລະ ຖືກຕ້ອງ ຕາມກົດໝາຍ ແລະ ລະບຽບການ;
3. ກວດກາ, ທົດສອບ ແລະ ວິໄຈ ພືດ-ສັດ, ຜະລິດຕະພັນພືດ-ສັດ, ຜະລິດຕະພັນສິນຄ້າ ກ່ຽວກັບສັດ ແລະ ການປະມົງ ແລະ ວັດຖຸຕ້ອງຄວບຄຸມ ເຊັ່ນ ຝຸ່ນ, ຢາປາບສັດຕູພືດ ແລະ ສານເຄມີຕົກຄ້າງໃນຜະລິດຕະພັນພືດ ຕາມເງື່ອນໄຂຂອງການນຳເຂົ້າ;
4. ກັກ, ແຍກປ່ຽວ, ເກັບຮັກສາຕົວຢ່າງ, ສົ່ງຕົວຢ່າງໄປວິໄຈ, ບໍາບັດ, ປະຕິເສດການນໍາເຂົ້າ, ສົ່ງກັບຄືນ, ທໍາລາຍ ຫຼື ນໍາໃຊ້ມາດຕະການອື່ນ ຕໍ່ພືດ-ສັດ, ຜະລິດຕະພັນພືດ-ສັດ ແລະ ວັດຖຸຕ້ອງຄວບຄຸມທີ່ມີສັດຕູພືດ-ສັດ; 
5. ແຈ້ງຜູ້ນຳເຂົ້າ-ສົ່ງອອກ ຫຼື ຜູ້ປະກອບການ ເຮັດສຸຂານາໄມ, ສົ່ງກັບຄືນ ຫຼື ທໍໍາລາຍພືດ-ສັດ,         ຜະລິດຕະພັນພືດ-ສັດ ແລະ ວັດຖຸອື່ນ ທີ່ມີສັດຕູພືດ-ສັດ;
6. ພິຈາລະນາອອກໃບຢັ້ງຢືນສຸຂານາໄມພືດ ສຳລັບການສົ່ງອອກ ແລະ ເອກະສານອື່ນ ຕາມການມອບໝາຍຂອງກົມປູກຝັງ, ກະຊວງກະສິກໍາ ແລະ ປ່າໄມ້ ແລະ ຕາມການສະເໜີຂອງເຈົ້າຂອງສິນຄ້າ;
7. ເກັບຄ່າທຳນຽມ ແລະ ຄ່າບໍລິການ ຕາມລະບຽບການ;
8. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງໜ່ວຍງານຕົນ ໃຫ້ຂັ້ນເທິງຕົນ ຢ່າງເປັນປົກກະຕິ;
9. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.
ມາດຕາ 40 ສິດ ແລະ ໜ້າທີ່ ຂອງໜ່ວຍງານ ອາຫານ, ຢາ ແລະ ຄວບຄຸມພະຍາດຕິດຕໍ່
ໜ່ວຍງານອາຫານ, ຢາ ແລະ ຄວບຄຸມພະຍາດຕິດຕໍ່ ມີ ສິດ ແລະ ໜ້າທີ່ ດັ່ງນີ້:
1. ກັກກັນ ແລະ ຄວບຄຸມ ພະຍາດຕິດຕໍ່, ກັກກັນປິ່ນປົວ, ວິໄຈ, ສົ່ງ, ແຍກປ່ຽວ ຜູ້ຕິດເຊື້ອພະຍາດຕິດຕໍ່;
2. ເກັບກຳຂໍ້ມູນ ກ່ຽວກັບການກວດກາອາຫານ, ຢາ ແລະ ຜະລິດຕະພັນການແພດ, ກັກກັນ ແລະ ຄວບຄຸມພະຍາດຕິດຕໍ່;
3. ກວດກາ ແລະ ອອກໃບຢັ້ງຢືນສຸຂະພາບ ໃຫ້ພະນັກງານຂັບລົດ ແລະ ພະນັກງານປະຈຳລົດ ໃນກໍລະນີສົງໄສມີພະຍາດຕິດຕໍ່ ຫຼື ໃນສະພາບມີພະຍາດລະບາດຕິດຕໍ່ ເກີດຂຶ້ນຢູ່ປະເທດຮ່ວມຊາຍແດນ ຫຼື ປະເທດອື່ນ;
4. ກວດກາ ອາຫານ, ຢາ ແລະ ຜະລິດຕະພັນການແພດ ທີ່ນຳເຂົ້າ-ສົ່ງອອກ ແລະ ຜ່ານແດນ ຢູ່ທ່າບົກ ຕາມ ກົດໝາຍ ແລະ ລະບຽບການ;
5. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງໜ່ວຍງານອາຫານ, ຢາ ແລະ ຄວບຄຸມພະຍາດຕິດຕໍ່ ໃຫ້ຂັ້ນເທິງຕົນ ຢ່າງເປັນປົກກະຕິ;
6. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນ ກົດໝາຍ ແລະ ລະບຽບການ.
ມາດຕາ 41 ສິດ ແລະ ໜ້າທີ່ ຂອງໜ່ວຍງານກວດກາຄົນເຂົ້າ-ອອກເມືຶອງ
ໜ່ວຍງານກວດຄົນເຂົ້າ-ອອກເມືອງ ມີ ສິດ ແລະ ໜ້າທີ່ ດັ່ງນີ້:
1. ກວດກາເອກະສານການເດີນທາງທຸກປະເພດ ຂອງພະນັກງານຂັບລົດ ແລະ ພະນັກງານປະຈຳລົດ;
2. ຢຸດ ຫຼື ໂຈະ ການເດີນທາງເຂົ້າ-ອອກ ສປປ ລາວ ທີ່ບໍ່ມີເງື່ອນໄຂຄົບຖ້ວນ;
3. ສຶກສາອົບຮົມ, ກ່າວເຕືອນ, ປັບໃໝ, ກັກຕົວ ແລະ ດຳເນີນການສືບສວນ-ສອບສວນ ຕາມຂັ້ນຕອນ ຕໍ່ຜູ້ລະເມີດກົດໝາຍ ແລະ ລະບຽບການ ຢູ່ໃນຂອບເຂດທ່າບົກ;
4. ເຂົ້າຮ່ວມການກວດກາ ດ້ວຍເຄື່ອງສາຍລັງສີ (X-RAY) ແລະ ສິນຄ້າຮ່ວມ ກັບໜ່ວຍງານອື່ນທີ່ປະຈຳທ່າບົກ;
5. ສະຫຼຸບ ແລະ ລາຍງານ ການເຄື່ອນໄຫວວຽກງານຂອງໜ່ວຍງານກວດຄົນເຂົ້າ-ອອກເມືອງ ໃຫ້ຂັ້ນເທິງຕົນ ຢ່າງເປັນປົກກະຕິ;
6. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນ ກົດໝາຍ ແລະ ລະບຽບການ.
ໝວດທີ 7
ທີ່ດິນຂອງທ່າບົກ
ມາດຕາ 42 (ປັບປຸງ) ການກໍານົດທີ່ດິນຂອງທ່າບົກ
ພາຍຫຼັງກ່ອນຈະຮັບຮອງບົດສຶກສາຄວາມເປັນໄປໄດ້ແລ້ວ ກະຊວງໂຍທາທິການ ແລະ ຂົນສົ່ງ ເປັນເຈົ້າການປະສານສົມທົບ ກັບກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ພາກສ່ວນທີ່ກ່ຽວຂ້ອງ ໃນການກຳນົດທີ່ດິນຂອງທ່າບົກ ໂດຍໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ.
ມາດຕາ 43 (ປັບປຸງ) ການປັກຫຼັກໝາຍເຂດຂອງທ່າບົກ
ພາຍຫຼັງໄດ້ເຊັນສັນຍາພັດທະນາທ່າບົກແລ້ວ ຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ ປະສານສົມທົບກັບຂະແໜງການອື່ນ, ອົງການປົກຄອງທ້ອງຖິ່ນທີ່ກ່ຽວຂ້ອງ ແລະ ຜູ້ພັດທະນາ ໃນການ     ສຳຫຼວດວັດແທກສ້າງແຜນວາດ ຫຼື ແຜນທີ່ ແລະ ປັກຫຼັກໝາຍເຂດທ່າບົກທີ່ໄດ້ຮັບສຳປະທານ.
ມາດຕາ 44 (ປັບປຸງ) ການອອກໃບຢັ້ງຢືນສິດນໍາໃຊ້ທີ່ດິນ
ຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ ອອກໃບຢັ້ງຢືນສິດນຳໃຊ້ທີ່ດິນ ໃຫ້ແກ່ຜູ້ພັດທະນາທ່າບົກ ໂດຍສອດຄ່ອງກັບ ກົດໝາຍ ວ່າດ້ວຍທີ່ດິນ.
ມາດຕາ 45 (ປັບປຸງ) ການນໍາໃຊ້ພື້ນທີ່ດິນ
ຜູ້ພັດທະນາທ່າບົກ ຕ້ອງສ້າງແຜນນຳໃຊ້ທີ່ດິນ ໃນການນຳໃຊ້ພື້ນທີ່ດິນເຂົ້າໃນເປົ້າໝາຍການດຳເນີນທຸລະກິດໂດຍກົງ ບໍ່ໃຫ້ເກີນ ແປດສິບສ່ວນຮ້ອຍ (80%) ຂອງເນື້ອທີ່ທັງໝົດ ສ່ວນທີ່ເຫຼືອໃຫ້ພັດທະນາເປັນພື້ນທີ່ ສາທາລະນະປະໂຫຍດ ເປັນຕົ້ນ ສວນສາທາລະນະ ແລະ ພື້ນທີ່ສີຂຽວ .
ມາດຕາ 46 ການທົດແທນຄ່າເສຍຫາຍ 
ລັດ ສາມາດໂອນເອົາສິດນຳໃຊ້ທີ່ດິນຂອງບຸກຄົນ, ນິຕິບຸກຄົນ ແລະ ການຈັດຕັ້ງ ເພື່ອກຳນົດເປັນທີ່ດິນຂອງທ່າບົກ ແຕ່ຈະມອບໃຫ້ຜູ້ພັດທະນາທ່າບົກ ເປັນຜູ້ຊົດເຊີຍ ຫຼື ທົດແທນຄ່າເສຍຫາຍໃຫ້ແກ່ຜູ້ໄດ້ຮັບຜົນກະທົບ ຕາມກົດໝາຍ ແລະ ລະບຽບການທີ່ກ່ຽວຂ້ອງ.
ໝວດທີ 8
ຄ່າທຳນຽມ ແລະ ຄ່າບໍລິການໃນທ່າບົກ
ມາດຕາ 47 ຄ່າທຳນຽມ ແລະ ຄ່າບໍລິການໃນທ່າບົກ
ຄ່າທຳນຽມ ແລະ ຄ່າບໍລິການ ໃນທ່າບົກ ມີ ດັ່ງນີ້:
1. ຄ່າທຳນຽມ ແລະ ຄ່າບໍລິການຂອງພາກລັດ ເປັນຕົ້ນ ຄ່າລົດເຂົ້າ-ອອກຜ່ານທ່າບົກ, ຂຶ້ນທະບຽນພິມສັດ, ວິໄຈ;
2. ຄ່າບໍລິການຂອງຜູ້ພັດທະນາທ່າບົກ ແລະ ຜູ້ລົງທຶນກິດຈະກິດຈະການ ເປັນຕົ້ນ ຄ່າຍົກຍໍ, ຄ່ຽນຖ່າຍ, ຄ່າຝາກສາງ, ຄ່າຈອດລົດຂົນສົ່ງ, ຄ່າຝາກຕູ້ສິນຄ້າ.
ມາດຕາ 48 (ປັບປຸງ) ການເກັບຄ່າທໍານຽມ ແລະ ຄ່າບໍລິການໃນທ່າບົກ
ອັດຕາ ແລະ ການເກັບ ຄ່າທຳນຽມ ແລະ ຄ່າບໍລິການ ຂອງພາກລັດ ໃຫ້ປະຕິບັດ ຕາມລັດຖະບັນຍັດຂອງປະທານປະເທດ ທີ່ໄດ້ກຳນົດໄວ້ ໃນແຕ່ລະໄລຍະ.
ອັດຕາ ແລະ ການເກັບຄ່າບໍລິການ ຂອງຜູ້ພັດທະນາ ແລະ ຜູ້ລົງທຶນກິດຈະການຢູ່ໃນທ່າບົກ ໃຫ້ພວກກ່ຽວຄົ້ນຄວ້ານໍາສະເໜີຕໍ່ ກະຊວງໂຍທາທິການ ແລະ ຂົນສົ່ງ ໂດຍປະສານສົມທົບກັບ ກະຊວງ ແລະ ພາກສ່ວນອື່ນທີ່ກ່ຽວຂ້ອງ ຄົ້ນຄວ້າເພື່ອສະເໜີລັດຖະບານ ພິຈາລະນາຮັບຮອງ.
ຜູ້ພັດທະນາ ແລະ ຜູ້ລົງທຶນກິດຈະການທ່າບົກ ຕ້ອງເກັບຄ່າບໍລິການຕາມທີ່ລັດຖະບານຮັບຮອງ ແລະ ເກັບເປັນສະກຸນເງິນຕາມທີ່ໄດ້ກໍານົດໄວ້ໃນ ກົດໝາຍ ແລະ ລະບຽບການ ຢ່າງເຂັ້ມງວດ.
ໝວດທີ 9
ຂໍ້ຫ້າມ
ມາດຕາ 49 ຂໍ້ຫ້າມທົ່ວໄປ
ຫ້າມ ບຸກຄົນ, ນິຕິບຸກ ແລະ ການຈັດຕັ້ງ ມີພຶດຕິກຳ ດັ່ງນີ້:
1. ເຂົ້າ, ບຸກລຸກ ຫຼື ປຸກສ້າງ ຢູ່ພື້ນທີ່ໃນຂອບເຂດຂອງທ່າບົກ ໂດຍບໍ່ໄດ້ຮັບອະນຸຍາດ;
2. ທັບມ້າງ, ທຳລາຍ ສິ່ງປຸກສ້າງ ຫຼື ຊັບສິນ ໃນຂອບເຂດທ່າບົກ;
3. ຂົນສົ່ງວັດສະດຸກໍ່ສ້າງ ໂດຍບໍ່ສອດຄ່ອງກັບ ກົດໝາຍ ແລະ ລະບຽບການ;
4. ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ.
ມາດຕາ 50 (ປັບປຸງ) ຂໍ້ຫ້າມສໍາລັບຜູ້ພັດທະນາທ່າບົກ
ຫ້າມ ຜູ້ພັດທະນາທ່າບົກ ມີພຶດຕິກໍາ ດັ່ງນີ້:
1. ເອົາ ຫຼື ນໍາໃຊ້ ພື້ນທີ່ສາທາລະນະ, ສິ່ງກໍ່ສ້າງ, ສິ່ງປຸກສ້າງ ແລະ ຊັບສິນອື່ນຂອງລັດ ໂດຍບໍ່ ຖືກຕ້ອງຕາມ ກົດໝາຍ ແລະ ລະບຽບການ;
2. ເອົາໃບອະນຸຍາດສ້າງຕັ້ງທ່າບົກຂອງຕົນ ໃຫ້ຜູ້ອື່ນນໍາໃຊ້, ໃຫ້ເຊົ່າ ຫຼື ໂອນໃຫ້ຜູ້ອື່ນ;
3. ປິດທ່າບົກ, ນໍາໃຊ້ທ່າບົກເຂົ້າໃນເປົ້າໝາຍອື່ນ ໂດຍບໍ່ໄດ້ຮັບອະນຸຍາດ;
4. ດຳເນີນທຸລະກິດທ່າບົກບໍ່ຖືກຕ້ອງ ຕາມສັນຍາສຳປະທານ ແລະ ກົດໝາຍ;
5. ສຳຫຼວດ-ອອກແບບ ແລະ ກໍ່ສ້າງສິ່ງປຸກສ້າງ ບໍ່ສອດຄ່ອງກັບແຜນຜັງເຕັກນິກ ທີ່ໄດ້ຮັບຮອງ;
6. ຜູກຂາດການບໍລິການ, ການນຳເຂົ້າ, ການສົ່ງອອກ ແລະ ການໃຫ້ບູລິມະສິດ ໃນການບໍລິການແກ່ບຸກຄົນ ຫຼື ພາກສ່ວນໃດໜຶ່ງ;
7. ມີພຶດຕິກໍາອື່ນ ທີ່ເປັນການລະເມີດ ກົດໝາຍ ແລະ ລະບຽບການ.
 
ມາດຕາ 51 ຂໍ້ຫ້າມສຳລັບຜູ້ລົງທຶນກິດຈະການ
ຫ້າມ ຜູ້ລົງທຶນກິດຈະການໃນທ່າບົກ ມີພຶດຕິກໍາ ດັ່ງນີ້:
1. ໃຫ້ເຊົ່າ ຫຼື ໂອນກິດຈະການ ໃຫ້ຜູ້ທີ່ບໍ່ມີໃບອະນຸຍາດດຳເນີນທຸລະກິດ ແລະ ບໍ່ໄດ້ຮັບການເຫັນດີຈາກຜູ້ພັດທະນາ ແລະ ຄະນະຄຸ້ມຄອງທ່າບົກ;
2. ປິດກິດຈະການໃນທ່າບົກ, ນໍາໃຊ້ກິດຈະການໃນທ່າບົກໃນເປົ້າໝາຍອື່ນ ໂດຍບໍ່ໄດ້ຮັບການເຫັນດີຈາກຜູ້ພັດທະນາ ແລະ ຄະນະຄຸ້ມຄອງທ່າບົກ;
3. ດໍາເນີນກິດຈະການບໍ່ຖືກຕ້ອງ ຕາມສັນຍາດຳເນີນທຸລະກິດກັບຜູ້ພັດທະນາ ແລະ ໃບອະນຸຍາດດຳເນີນທຸລະກິດ;
4. ຜູກຂາດ ແລະ ໃຫ້ບູລິມະສິດ ໃນການບໍລິການແກ່ບຸກຄົນ ຫຼື ພາກສ່ວນໃດໜຶ່ງ;
5. ມີພຶດຕິກໍາອື່ນ ທີ່ເປັນການລະເມີດກົດໝາຍ ແລະ ລະບຽບການ.
ມາດຕາ 52 ຂໍ້ຫ້າມສຳລັບເຈົ້າໜ້າທີ່ ແລະ ພະນັກງານ
ຫ້າມ ເຈົ້າໜ້າທີ່ ແລະ ພະນັກງານທີ່ກ່ຽວຂ້ອງ ມີພຶດຕິກໍາ ດັ່ງນີ້:
1. ດຳເນີນທຸລະກິດ, ເປັນທີ່ປຶກສາ, ເປັນພະນັກງານວິຊາການ ໃຫ້ທຸລະກິດທ່າບົກ ທີ່ພົວພັນກັບຄວາມຮັບຜິດຊອບຂອງຕົນ;
2. ທວງເອົາ, ຂໍເອົາ, ຮັບສິນບົນ, ລຳອຽງ, ກົດໜ່ວງ ຖ່ວງດຶງ, ສົມຮູ້ຮ່ວມຄິດ, ປອມແປງເອກະສານ, ສວຍໃຊ້ໜ້າທີ່ຕໍາແໜ່ງ ເພື່ອຜົນປະໂຫຍດສ່ວນຕົວ ແລະ ໝູ່ຄະນະ ກ່ຽວກັບທ່າບົກ;
3. ເມີນເສີຍ ຕໍ່ຄວາມຮັບຜິດຊອບຂອງຕົນ, ຕໍ່ພຶດຕິກໍາທີ່ບໍ່ຖືກຕ້ອງ ຂອງຜູ້ດຳເນີນທຸລະກິດ ກ່ຽວກັບການຂົນສົ່ງທາງບົກ; 
4. ມີພຶດຕິກໍາອື່ນ ທີ່ເປັນການລະເມີດ ກົດໝາຍ ແລະ ລະບຽບການ.
ໝວດທີ 10
ການຄຸ້ມຄອງ ແລະ ກວດກາວຽກງານທ່າບົກ
ມາດຕາ 53 (ປັບປຸງ) ອົງການຄຸ້ມຄອງ ແລະ ກວດກາວຽກງານທ່າບົກ
ມອບໃຫ້ ກະຊວງໂຍທາທິການ ແລະ ຂົນສົ່ງ ເປັນຜູ້ຮັບຜິດຊອບ ຄຸ້ມຄອງ ແລະ ກວດກາວຽກງານທ່າບົກ ໂດຍມີການປະສານສົມທົບກັບ ກະຊວງ, ອົງການ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ.
ອົງການຄຸ້ມຄອງ ແລະ ກວດກາວຽກງານທ່າບົກ ປະກອບດ້ວຍ:
1. ຂະແໜງການໂຍທາທິການ ແລະ ຂົນສົ່ງ;
2. ຂະແໜງການການເງິນ;
3. ຂະແໜງການກະສິກຳ ແລະ ປ່າໄມ້;
4. ຂະແໜງການສາທາລະນະສຸກ;
5. ຂະແໜງການປ້ອງກັນຄວາມສະຫງົບ.
ມາດຕາ 54 (ປັບປຸງ) ສິດ ແລະ ໜ້າທີ່ ຂອງຂະແໜງການໂຍທາທິການ ແລະ ຂົນສົ່ງ
ຂະແໜງການໂຍທາທິການ ແລະ ຂົນສົ່ງ ມີ ສິດ ແລະ ໜ້າທີ່ ດັ່ງນີ້:
1. ຄົ້ນຄວ້າ ນະໂຍບາຍ, ຍຸດທະສາດ ແລະ ນິຕິກຳ ກ່ຽວກັບວຽກງານທ່າບົກ ເພື່ອສະເໜີລັດຖະບານ ພິຈາລະນາ;
2. ໂຄສະນາ ເຜີຍແຜ່ ນະໂຍບາຍ, ຍຸດທະສາດ ແລະ ນິຕິກຳ ກ່ຽວກັບວຽກງານທ່າບົກ ໃຫ້ສັງຄົມ ແລະ ພາກສ່ວນທີ່ກ່ຽວຂ້ອງ;
3. ຄົ້ນຄວ້າ ສ້າງນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານ ທ່າບົກ ຕາມຂອບເຂດຄວາມຮັບຜິດຊອບຂອງຕົນ ພ້ອມທັງຈັດຕັ້ງປະຕິບັດ;
4. ຊີ້ນຳ, ຊຸກຍູ້ ແລະ ຕິດຕາມ ກວດກາ ການດຳເນີນວຽກງານທ່າບົກ ຂອງຜູ້ພັດທະນາ ແລະ ຜູ້ລົງທຶນ ກິດຈະການ ໃຫ້ສອດຄ່ອງກັບສັນຍາສຳປະທານ, ສັນຍາດຳເນີນທຸລະກິດ, ກົດໝາຍ ແລະ ລະບຽບການທີ່ກ່ຽວຂ້ອງ;
5. ຄົ້ນຄວ້າ ແລະ ມີຄຳເຫັນ ກ່ຽວກັບໂຄງການລົງທຶນພັດທະນາທ່າບົກ;
6. ຄົ້ນຄວ້າ ແລະ ພິຈາລະນາ ບັນດາກິດຈະການທີ່ນອນຢູ່ໃນທ່າບົກ;
7. ປະສານສົມທົບກັບກະຊວງທີ່ກ່ຽວຂ້ອງ ແຕ່ງຕັ້ງຄະນະຄຸ້ມຄອງທ່າບົກ;
8. ກຳນົດໜ້າວຽກ ແລະ ຮັບຮອງການສຶກສາຄວາມເປັນໄປໄດ້ ກ່ຽວກັບການພັດທະນາທ່າບົກ;
9. ອອກໃບອະນຸຍາດດຳເນີນທຸລະກິດທ່າບົກ ແລະ ກິດຈະການລົງທຶນ ໃນທ່າບົກ;
10. ຄົ້ນຄວ້າ, ກຳນົດໂຄງສ້າງລາຄາການບໍລິການ ຂອງຜູ້ພັດທະນາ ແລະ ຜູ້ລົງທຶນກິດຈະການ ຢູ່ໃນທ່າບົກ ແລະ ລວມທັງດັດແກ້ລາຄາຄ່າບໍລິການທ່າບົກ;
11. ຮັບ ແລະ ພິຈາລະນາ ແກ້ໄຂຄຳສະເໜີ ກ່ຽວກັບທ່າບົກ ຕາມຂອບເຂດຄວາມຮັບຜິດຊອບຂອງຕົນ;
12. ສະຫຼຸບ ແລະ ລາຍງານ ການເຄື່ອນໄຫວວຽກງານທ່າບົກ ໃຫ້ລັດຖະບານ ຢ່າງເປັນປົກກະຕິ;
13. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນ ກົດໝາຍ ແລະ ລະບຽບການ.
ມາດຕາ 55 ສິດ ແລະ ໜ້າທີ່ ຂອງຂະແໜງການການເງິນ
ຂະແໜງການການເງິນ ມີສິດ ແລະ ໜ້າທີ່ ດັ່ງນີ້: 
1. ຄົ້ນຄວ້າສ້າງ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານພາສີຢູ່ທ່າບົກ;
2. ໂຄສະນາ ເຜີຍແຜ່ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບ ວຽກງານພາສີຢູ່ທ່າບົກໃຫ້ສັງຄົມ ແລະ ພາກສ່ວນທີ່ກ່ຽວຂ້ອງ;
3. ສະເໜີ ແຕ່ງຕັ້ງເຈົ້າໜ້າທີ່ພາສີ ເຂົ້າໃນຄະນະຄຸ້ມຄອງທ່າບົກ;
4. ແຕ່ງຕັ້ງ ຫຼື ປົດຕໍາແໜ່ງເຈົ້າໜ້າພາສີ ປະຈຳຢູ່ໜ່ວຍງານພາສີ ທີ່ປະຈໍາຢູ່ທ່າບົກ;
5. ຮ່ວມມື ແລະ ປະສານສົມສົມທົບກັບ ພາກສ່ວນທີ່ກ່ຽວຂ້ອງ ໃນການພັດທະນາທ່າບົກ, ການສ້າງຄວາມເຂັ້ມແຂງ ໃຫ້ແກ່ການຈັດເກັບພາສີ ແລະ ລາຍຮັບອື່ນຢູ່ທ່າບົກ ໃຫ້ຖືກຕ້ອງ, ຄົບຖ້ວນ, ວ່ອງໄວ ແລະ ທັນສະໄໝ;
6. ສະຫຼຸບ ແລະ ລາຍງານ ການເຄື່ອນໄຫວວຽກງານພາສີ ຢູ່ທ່າບົກ ໃຫ້ຂັ້ນເທິງຕົນ ຢ່າງເປັນປົກກະຕິ;
7. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກໍານົດໄວ້ໃນ ກົດໝາຍ ແລະ ລະບຽບການ.
ມາດຕາ 56 ສິດ ແລະ ໜ້າທີ່ ຂອງຂະແໜງການກະສິກຳ ແລະ ປ່າໄມ້
ຂະແໜງການກະສິກຳ ແລະ ປ່າໄມ້ ມີ ສິດ ແລະ ໜ້າທີ່ ດັ່ງນີ້:
1. ຄົ້ນຄວ້າສ້າງ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານ ກັກກັນພືດ-ສັດຢູ່ທ່າບົກ;
2. ໂຄສະນາ ເຜີຍແຜ່ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານ ກັກກັນພືດ-ສັດຢູ່ທ່າບົກ ໃຫ້ສັງຄົມ ແລະ ພາກສ່ວນທີ່ກ່ຽວຂ້ອງ;
3. ສະເໜີ ແຕ່ງຕັ້ງເຈົ້າໜ້າທີ່ຂອງຂະແໜງການຕົນ ເຂົ້າໃນຄະນະຄຸ້ມຄອງທ່າບົກ;
4. ແຕ່ງຕັ້ງ ຫຼື ປົດຕໍາແໜ່ງ ເຈົ້າໜ້າທີ່ຂອງຕົນ ປະຈໍາຢູ່ທ່າບົກ;
5. ຮ່ວມມື ແລະ ປະສານສົມສົມທົບກັບ ພາກສ່ວນທີ່ກ່ຽວຂ້ອງ ໃນການພັດທະນາທ່າບົກ, ການສ້າງຄວາມເຂັ້ມແຂງ ໃຫ້ແກ່ການກວດກາ, ເຝົ້າລະວັງຄວາມສ່ຽງ, ການຄວບຄຸມການເຄື່ອນຍ້າຍ, ການສ້າງສະຖານທີ່ ກັກກັນພືດ-ສັດ ໃຫ້ຖືກຕ້ອງ, ປອດໄພ ແລະ ທັນສະໄໝ;
6. ສະຫຼຸບ ແລະ ລາຍງານ ການເຄື່ອນໄຫວວຽກງານກັກກັນພືດ-ສັດ ຢູ່ທ່າບົກ ໃຫ້ຂັ້ນເທິງຕົນ ຢ່າງເປັນປົກກະຕິ;
7. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນ ກົດໝາຍ ແລະ ລະບຽບການ.
ມາດຕາ 57 ສິດ ແລະ ໜ້າທີ່ ຂອງຂະແໜງການສາທາລະນາສຸກ
ຂະແໜງການສາທາລະນະສຸກ ມີ ສິດ ແລະ ໜ້າທີ່ ດັ່ງນີ້:
1. ຄົ້ນຄວ້າສ້າງ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານອາຫານ, ຢາ ແລະ ຄວບຄຸມພະຍາດຕິດຕໍ່ ຢູ່ທ່າບົກ;
2. ໂຄສະນາ ເຜີຍແຜ່ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານ ອາຫານ, ຢາ ແລະ ຄວບຄຸມພະຍາດຢູ່ທ່າບົກ ໃຫ້ສັງຄົມ ແລະ ພາກສ່ວນທີ່ກ່ຽວຂ້ອງ;
3. ສະເໜີ ແຕ່ງຕັ້ງເຈົ້າໜ້າທີ່ຂະແໜງການຂອງຕົນ ເຂົ້າໃນຄະນະຄຸ້ມຄອງທ່າບົກ;
4. ແຕ່ງຕັ້ງ ຫຼື ປົດຕໍາແໜ່ງ ເຈົ້າໜ້າທີ່ຂອງຕົນ ປະຈໍາຢູ່ທ່າບົກ;
5. ຮ່ວມມື ແລະ ປະສານສົມສົມທົບ ກັບພາກສ່ວນທີ່ກ່ຽວຂ້ອງ ໃນການພັດທະນາທ່າບົກ, ການສ້າງຄວາມເຂັ້ມແຂງ ໃຫ້ແກ່ການກວດກາ, ເຝົ້າລະວັງຄວາມສ່ຽງ, ການຄວບຄຸມການເຄື່ອນຍ້າຍ, ການສ້າງສະຖານທີ່ ກວດກາອາຫານ, ຢາ ແລະ ຄວບຄຸມພະຍາດຕິດຕໍ່ ໃຫ້ຖືກຕ້ອງ, ປອດໄພ ແລະ ທັນສະໄໝ;
6. ສະຫຼຸບ ແລະ ລາຍງານ ການເຄື່ອນໄຫວວຽກງານອາຫານ, ຢາ ແລະ ຄວບຄຸມພະຍາດຕິດຕໍ່ຢູ່    ທ່າບົກ ໃຫ້ຂັ້ນເທິງຕົນ ຢ່າງເປັນປົກກະຕິ;
7. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ.
ມາດຕາ 58 ສິດ ແລະ ໜ້າທີ່ ຂອງຂະແໜງການປ້ອງກັນຄວາມສະຫງົບ
ຂະແໜງການປ້ອງກັນຄວາມສະຫງົບ ມີ ສິດ ແລະ ໜ້າທີ່ ດັ່ງນີ້:
1. ຄົ້ນຄວ້າສ້າງ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານປ້ອງກັນຄວາມສະຫງົບຢູ່ທ່າບົກ;
2. ໂຄສະນາ ເຜີຍແຜ່ ນະໂຍບາຍ, ລະບຽບການ, ແຜນການ, ແຜນງານ ແລະ ໂຄງການ ກ່ຽວກັບວຽກງານ ປ້ອງກັນຄວາມສະຫງົບຢູ່ທ່າບົກ ໃຫ້ສັງຄົມ ແລະ ພາກສ່ວນທີ່ກ່ຽວຂ້ອງ;
3. ຄຸ້ມຄອງ, ຊີ້ນຳ, ຕິດຕາມ, ບັນຊາ, ກວດກາ ແລະ ປະເມີນຜົນວຽກງານເຂົ້າ-ອອກຢູ່ທ່າບົກ;
4. ຢຸດ ຫຼື ໂຈະ ການເດີນທາງຂອງຍານພາຫະນະ, ບຸກຄົນ, ກຸ່ມຄົນ ຖ້າມີຂໍ້ມູນຫຼັກຖານ ກ່ຽວກັບການລະເມີດກົດໝາຍ ລວມທັງຄວາມເປັນອັນຕະລາຍຂອງວັດຖຸປະກອນ ແລະ ສິ່ງຂອງຕ່າງໆ;
5. ສະເໜີ ແຕ່ງຕັ້ງເຈົ້າໜ້າທີ່ຂະແໜງການຂອງຕົນ ເຂົ້າໃນຄະນະຄຸ້ມຄອງທ່າບົກ;
6. ແຕ່ງຕັ້ງ ຫຼື ປົດຕໍາແໜ່ງ ເຈົ້າໜ້າທີ່ຂອງຕົນ ປະຈໍາຢູ່ທ່າບົກ;
7. ສະຫຼຸບ ແລະ ລາຍງານ ການເຄື່ອນໄຫວວຽກງານປ້ອງກັນຄວາມສະຫງົບຢູ່ທ່າບົກ ໃຫ້ຂັ້ນເທິງຕົນຢ່າງເປັນປົກກະຕິ;
8. ນຳໃຊ້ສິດ ແລະ ປະຕິບັດໜ້າທີ່ອື່ນ ຕາມທີ່ໄດ້ກຳນົດໄວ້ໃນ ກົດໝາຍ ແລະ ລະບຽບການ.
ມາດຕາ 59 ສິດ ແລະ ໜ້າທີ່ ຂອງຂະແໜງການອື່ນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ
ຂະແໜງການອື່ນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງ ມີ ສິດ ແລະ ໜ້າທີ່ ໃຫ້ການຮ່ວມມື ແລະ ປະສານສົມທົບກັບ ອົງການຄຸ້ມຄອງ ແລະ ກວດກາວຽກງານທ່າບົກ, ຄະນະຄຸ້ມຄອງທ່າບົກ ໃນການຈັດຕັ້ງປະຕິບັດດຳລັດສະບັບນີ້ ຕາມພາລະບົດບາດ ແລະ ຄວາມຮັບຜິດຊອບຂອງຕົນ.
ມາດຕາ 60 (ປັບປຸງ) ເນື້ອໃນກວດກາ
ການກວດກາວຽກງານທ່າບົກ ມີ ເນື້ອໃນ ດັ່ງນີ້:
1. ການປະຕິບັດກົດໝາຍ ແລະ ລະບຽບການ ກ່ຽວກັບວຽກງານທ່າບົກ;
2. ກວດກາການຈັດຕັ້ງປະຕິບັດ ບົດບັນທຶກຄວາມເຂົ້າໃຈ, ສັນຍາສຳປະທານ ແລະ ເອກະສານອື່ນທີ່ກ່ຽວຂ້ອງ;
3. ການປະຕິບັດສິດ ແລະ ໜ້າທີ່ຂອງເຈົ້າໜ້າທີ່ ແລະ ພະນັກງານທີ່ຮັບຜິດຊອບວຽກງານທ່າບົກ;
4. ການສ້າງ ແລະ ປະຕິບັດແຜນການ ກ່ຽວກັບວຽກງານທ່າບົກ.
ມາດຕາ 61 ຮູບການການກວດກາ
ການກວກາວຽກງານທ່າບົກ ມີ ສາມ ຮູບການ ດັ່ງນີ້:
1. ການກວດກາຕາມປົກກະຕິ ຊຶ່ງແມ່ນການກວດກາຕາມແຜນການ ຢ່າງເປັນປະຈຳ ແລະ ມີກຳນົດ
ເວລາແນ່ນອນ;
2. ການກວດກາໂດຍແຈ້ງໃຫ້ຮູ້ລ່ວງໜ້າ ຊຶ່ງແມ່ນການກວດການອກແຜນການ ໂດຍແຈ້ງໃຫ້ເປົ້າ  ໝາຍຖືກກວດກາຮູ້ລ່ວງໜ້າ;
3. ການກວດກາແບບກະທັນຫັນ ຊຶ່ງແມ່ນການກວດກາແບບຮີບດ່ວນ ໂດຍທີ່ບໍ່ໄດ້ແຈ້ງໃຫ້       ເປົ້າໝາຍຖືກກວດກາຮູ້ລ່ວງໜ້າ.
ໝວດທີ 11
ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ
ມາດຕາ 62 ນະໂຍບາຍຕໍ່ຜູ້ມີຜົນງານ
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ມີຜົນງານດີເດັ່ນ ໃນການປະຕິບັດດຳລັດສະບັບນີ້ ເປັນຕົ້ນ ການພັດທະນາ, ຄຸ້ມຄອງ, ລົງທຶນ ແລະ ການບໍລິການວຽກງານທ່າບົກ ທີ່ມີປະສິດທິຜົນ, ມີຄວາມສຳຄັນຕໍ່ການພັດທະນາເສດຖະກິດ-ສັງຄົມ, ດຶງດູດ ແລະ ຊຸກຍູ້ ການພັດທະນາທ່າບົກ ຈະໄດ້ຮັບການຍ້ອງຍໍ ແລະ ນະໂຍບາຍອື່ນ ຕາມລະບຽບການ.
ມາດຕາ 63 ມາດຕະການຕໍ່ຜູ້ລະເມີດ
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ລະເມີດດຳລັດສະບັບນີ້ ຈະຖືກກ່າວເຕືອນ, ສຶກສາອົບຮົມ, ລົງວິໄນ, ປັບໃໝ, ໃຊ້ແທນຄ່າເສຍຫາຍທາງແພ່ງ ຫຼື ລົງໂທດທາງອາຍາ ຕາມແຕ່ກໍລະນີ ເບົາ ຫຼື ໜັກ.
ໝວດທີ 12
ບົດບັນຍັດສຸດທ້າຍ
ມາດຕາ 64 ການຈັດຕັ້ງປະຕິບັດ
ກະຊວງໂຍທາທິການ ແລະ ຂົນສົ່ງ ເປັນເຈົ້າການປະສານສົມທົບກັບ ກະຊວງການເງິນ, ກະຊວງກະສິກໍາ ແລະ ປ່າໄມ້, ກະຊວງສາທາລະນະສຸກ, ກະຊວງປ້ອງກັນຄວາມສະຫງົບ, ກະຊວງອື່ນ ແລະ ອົງການປົກຄອງທ້ອງຖິ່ນ ທີ່ກ່ຽວຂ້ອງ ໃນການຈັດຕັ້ງປະຕິບັດດຳລັດສະບັບນີ້ ໃຫ້ມີປະສິດທິຜົນ.
ກະຊວງ, ອົງການ, ອົງການປົກຄອງທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ຈົ່ງຮັບຮູ້ ແລະ ໃຫ້ການຮ່ວມມືໃນການຈັດຕັ້ງປະຕິບັດດຳລັດສະບັບນີ້ ຢ່າງເຂັ້ມງວດ.
ມາດຕາ 65 (ປັບປຸງ) ຜົນສັກສິດ
ດຳລັດສະບັບນີ້ ມີຜົນສັກສິດ ນັບແຕ່ ວັນທີ......... ເປັນຕົ້ນໄປ.
ດຳລັດສະບັບນີ້ ປ່ຽນແທນ ດຳລັດ ວ່າດ້ວຍທ່າບົກ ສະບັບເລກທີ 513/ລບ, ລົງວັນທີ 04 ສິງຫາ 2021.
               
ຕາງໜ້າລັດຖະບານ ແຫ່ງ ສປປ ລາວ
ນາຍົກລັດຖະມົນຕີ
ສອນໄຊ ສີພັນດອນ
 
 
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.