ຂໍ້ຕົກລົງ ວ່າດ້ວຍການຄຸ້ມຄອງເງິນຕາຕ່າງປະເທດ ກ່ຽວກັບການນໍາເຂົ້າ-ສົ່ງອອກ ສິນຄ້າ ແລະ ການບໍລິການ, ເລກທີ 677/ທຫລ, ລົງວັນທີ 24 ກໍລະກົດ 2023.

ສາທາລະນະລັດ ປະຊາທິປະໄຕ ປະຊາຊົນລາວ

ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ

ທະນາຄານແຫ່ງ ສປປ ລາວ

ເລກທີ 677/ທຫລ

ນະຄອນຫຼວງວຽງຈັນ, ວັນທີ 24 ກໍລະກົດ 2023

ຂໍ້ຕົກລົງ

ວ່າດ້ວຍການຄຸ້ມຄອງເງິນຕາຕ່າງປະເທດ ກ່ຽວກັບການນຳເຂົ້່າ-ສົ່ງອອກ ສິນຄ້າ ເເລະ ການບໍລິການ

- ອີງຕາມ ກົດໝາຍວ່າດ້ວຍທະນາຄານເເຫ່ງ ສປປ ລາວ (ສະບັບປັບປຸງ) ສະບັບເລກທີ 47/ສພຊ, ລົງວັນທີ 19 ມິຖຸນາ 2018;

- ອີີງຕາມ ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ສະບັບເລກທີ 15/ສພຊ, ລົງວັນທີ 07 ກໍລະກົດ 2022;

- ອີງຕາມ ຄຳສັງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ສະບັບເລກທີ 10/ນຍ, ລົງວັນທີ 14 ກໍລະກົດ 2023

- ອີງຕາມ ການຄົ້ນຄວ້າຂອງກົມຄຸ້ມຄອງເງິນຕາຕ່າງປະເທດ ໂດຍສົມທົບພາກສ່ວນທີ່ກ່ຽວຂ້ອງ.

ຜູ້ວ່າການທະນາຄານແຫ່ງ ສປປ ລາວ ຕົກລົງ:

ໝວດທີ 1

ບົດບັັນຍັດທົ່ວໄປ

ມາດຕາ 1 ຈຸດປະສົງ

ຂໍ້ຕົກລົງສະບັບນີ້ ກໍານົດຫຼັກການ, ລະບຽບການ ແລະ ມາດຕະການ ໃນການຄຸ້ມຄອງເງິນຕ່າງປະເທດກ່ຽວກັບການເຂົ້າ-ສົ່ງອອກ ສິນຄ້າ ແລະ ການບໍລິການ ເພື່ອຊຸກຍູ້ທຸລະກຳການຊຳລະ ແລະ ຮັບຊຳລະ ຄ່າສິນຄ້າ ແລະ ການບໍລິການກັບຕ່າງປະເທດ ໃຫ້ຜ່ານລະບົບທະນາຄານ ແນໃສ່ສ້າງຄວາມເຂັ້ມແຂງຖານະຊຳລະກັັບຕ່າງປະເທດ ແລະ ຄັງສຳຮອງເງິນຕາຕ່າງປະເທດ ປະກອບສ່ວນເຂົ້າໃນການຮັກສາສະຖຽນລະພາບເງິນຕາແຫ່ງຊາດ.

ມາດຕາ 2 ການຄຸ້ມຄອງເງິນຕາຕ່າງປະເທດກ່ຽວກັບການນຳເຂົ້າ-ສົ່ງອອກ ສິນຄ້າ ແລະ ການບໍລິການ

ການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ສິນຄ້າ ແລະ ການບໍລິການ ແມ່ນການຈັດຕັ້ງປະຕິບັດບັນດາຫຼັກການ, ລະບຽບການ ແລະ ມາດຕະການ ກ່ຽວກັບການຊຳລະ ແລະ ຮັບຊຳລະ ຄ່າສິນຄ້າ ແລະ ການບໍລິການກັບຕ່າງປະເທດ ຂອງຜູ້ນຳເຂົ້າ-ສົ່ງອອກ ຜ່ານລະບົບທະນາຄານ ໂດຍສອດຄ່ອງກັບຂໍ້ຕົກລົງສະບັບນີ້ ແລະ ລະບຽບການທີ່ກ່ຽວຂ້ອງ.

ມາດຕາ 3 ການອະທິບາຍຄຳສັບ

ຄໍາສັບທີ່ນໍາໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:

1. ຜູ້ນໍາເຂົ້າ-ສົ່ງອອກ ໝາຍເຖິງ ວິສາຫະກິດທີ່ດໍາເນີນທຸລະກິດຕິດພັນກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ ຊຶ່ງໄດ້ຮັບໃບຢັ້ງຢືນການລົງທະບຽນເປັນຜູ້ນຳເຂົ້າ-ສົ່ງອອກ ສິນຄ້າ ເເລະ ການບໍລິການຈາກຂະແໜງອຸດສາຫະກຳ ເເລະ ການຄ້າ;

2. ສິນຄ້າ ໝາຍເຖິງ ຜະລິດຕະພັນທີ່ມີມູນຄ່າທາງເສດຖະກິດ ຊຶ່ງຖືກນໍາເຂົ້າ ເເລະ/ຫຼື ສົ່ງອອກ ເພື່ອຈຸດປະສົງການຜະລິດ, ປຸງເເຕ່ງ, ຊົມໃຊ້ ເເລະ ຈຳໜ່າຍ ຕາມທີ່ໄດ້ກຳນົດໄວ້ໃນປຶ້ມສາລະບານສິນຄ້າ ເເລະ ອັດຕາພາສີລະບົບເອກະພາບ;

3. ການບໍລິການ ໝາຍເຖິງ ການບໍໍລິການດ້ານການ ທ່ອງທ່ຽວ, ສຶກສາ, ສາທະລະນະສຸກ, ປະກັນໄພ,ຂົນສົ່ງ, ໂທລະຄົມມະນາຄົມ, ເເຮງງານ ເເລະ ບໍລິການອື່ນ;

4. ທະນາຄານທຸລະກິດ ໝາຍເຖິງ ທະນາຄານທຸລະກິດລັດ, ທະນາຄານທຸລະກິດລັດຮ່ວມທຶນ, ທະນາຄານເອກະຊົນ, ທະນາຄານທຸລະກິດທີ່ເປັນບໍລິສັດລູກຂອງທະນາຄານຕ່າງປະເທດ ເເລະ ສາຂາທະນາຄານທຸລະກິດຕ່າງປະເທດ ທີ່ໄດ້ຮັບການສ້າງຕັ້ງ ເເລະ ອະນຸຍາດດຳເນີນທຸລະກິດ ຕາມທີ່ໄດ້ກຳນົດໄວ້ໃນກົດໝາຍ;

5. ການໂອນເງິນທາງອີເລັກໂຕຣນິກ (Electronic funds transfer) ໝາຍເຖິງ ການໂອນເງິນລະຫວ່າງບັນຊີເງິນຝາກຂອງທະນາຄານທຸລະກິດ ດ້ວຍລະບົບເອເລັກໂຕຣນິກ ເປັນຕົ້ນ ວາຍຣ໌ ທຣານສເຟີຣ໌ (Wire Transfer), ລະບົບ Application Programming Interface (API), ລະບົບສະວິບ (SWIFT);

6. ໜັງສືສິນເຊື່ອ (Letter of Credit ຫຼື L/C) ໝາຍເຖິງ ໜັງສືຄໍ້່າປະກັນການຊຳລະ ທີ່ທະນາຄານທຸລະກິດ ອອກໃຫ້ຜູ້ນຳເຂົ້າ ເພື່ອສັ່ງຊື້ສິນຄ້າຈາກຕ່າງປະເທດ.

ມາດຕາ 4 ຂອບເຂດການນຳໃຊ້

ຂໍ້ຕົກລົງສະບັບນີ້ ນໍາໃຊ້ສໍາລັບ ຜູ້ນໍາເຂົ້າ-ສົ່ງອອກ ເເລະ ທະນາຄານທຸລະກິດ.

ໝວດທີ 2

ການເເຈ້ງລົງທະບຽນ ເເລະ ການເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ

ມາດຕາ 5 ການເເຈ້ງລົງທະບຽນ

ຜູ້ນໍາເຂົ້າ-ສົ່ງອອກ ຕ້ອງເເຈ້ງລົງທະບຽນນໍາທະນາຄານເຫ່ງ ສປປ ລາວ ພາຍໃນເວລາ ສິບ ວັນລັດຖະການ ນັບເເຕ່ວັນທີ່ໄດ້ໃບຢັ້ງຢືນການລົງທະບຽນຜູ້ນຳເຂົ້າ-ສົ່ງອອກ ນຳຂະເເໜງອຸດສາຫະກຳ ເເລະ ການຄ້າ ເພື່ຶອຂໍໃບຢັ້ງຢືນການເເຈ້ງລົງທະບຽນຜູ້ນຳເຂົ້າ-ສົ່ງອອກ ໄປເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ນຳທະນາຄານທຸລະກິດ.

ເອກະສານປະກອບຂໍໃບຢັ້ງຢືນການເເຈ້ງລົງທະບຽນຜູ້ນໍາເຂົ້າ-ສົ່ງອອກ ມີດັ່ງນີ້:

1. ປະກອບຂໍ້ມູນຕາມເເບບພິມຂອງທະນາຄານເເຫ່ງ ສປປ ລາວ;

2. ສຳເນົາໃບຢັ້ງຢືນການລົງທະບຽນຜູ້ນຳເຂົ້າ-ສົ່ງອອກ;

3. ສຳເນົາໃບອະນຸຍາດລົງທຶນ ເເລະ/ຫຼື ໃບທະບຽນວິສາຫະກິດ;

4. ໃບອະນຸຍາດດຳເນີນທຸລະກິດທີ່ກ່ຽວຂ້ອງ (ຖ້າມີ);

5. ເອກະສານອື່ນ ຕາມການກຳນົດຂອງທະນາຄານເເຫ່ງ ສປປ ລາວ.

ສຳລັບຜູ້ນຳເຂົ້າ-ສົ່ງອອກ ທີ່ໄດ້ນຳໃຊ້ຫຼາຍບັນຊີເງິນຝາກໃນໄລຍະທີ່ຜ່ານມາ ຕ້ອງເເຈ້ງຂໍ້ມູນກ່ຽວກັບບັນຊີເງິນຝາກທັງໝົດຂອງຕົນທີ່ໄດ້ເປີດນໍາທະນາຄານທຸລະກິດຕ່າງໆ ຕາມເເບບພິມຂອງທະນາຄານເເຫ່ງ ສປປ ລາວ.

ມາດຕາ 6 ການພິຈາລະນາອອກໃບຢັ້ງຢືນການເເຈ້ງລົງທະບຽນຜູ້ນຳເຂົ້າ-ສົ່ງອອກ

ທະນາຄານເເຫ່ງ ສປປ ລາວ ຈະພິຈາລະນາອອກໃບຢັ້ງຢືນການເເຈ້ງລົງທະບຽນຜູ້ນໍາເຂົ້າ-ສົ່ງອອກພາຍໃນເວລາ ຫ້າ ວັນລັດຖະການ ນັບເເຕ່ວັນທີ່ໄດ້ຮັບເອກະສານປະກອບ ຢ່າງຖືກຕ້ອງ ເເລະ ຄົບຖ້ວນ.

ມາດຕາ 7 ການເປີດບັນຊີເງິນຝາກກ່ຽວກັບການນຳເຂົ້່າ-ສົ່ງອອກ

ຜູ້ນໍາເຂົ້າ-ສົ່ງອອກ ຕ້ອງເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ນໍາທະນາຄານທຸລະກິດ ພາຍໃນເວລາ ສິບ ວັນລັດຖະການ ນັບເເຕ່ວັນທີ່ໄດ້ຮັບໃບຢັ້ງຢືນການເເຈ້ງລົງທະບຽນຜູ້ນຳເຂົ້າ-ສົ່ງອອກ.

ທະນາຄານທຸລະກິດ ທີ່ມີເງື່ອນໄຂໃຫ້ບໍລິການຊໍາລະກ່ຽວກັບການນໍາເຂົ້າ-ສົ່ງອອກ ມີໜ້າທີ່ເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ໂດຍອີງໃສ່ໃບຢັ້ງຢືນການເເຈ້ງລົງທະບຽນຜູ້ນໍາເຂົ້າ-ສົ່ງອອກ ຈາກທະນາຄານເເຫ່ງ ສປປ ລາວ.

ໝວດທີ 3

ການຊໍາລະ ເເລະ ການຮັບຊໍາລະ

ຄ່າສິນຄ້າ ເເລະ ການບໍລິການກັບຕ່າງປະເທດ

ມາດຕາ 8 ເງື່ອນໄຂຂອງທະນາຄານທຸລະກິດທີ່ໃຫ້ບໍລິການຊໍາລະກ່ຽວກັບການນໍາເຂົ້າ-ສົ່ງອອກ

ທະນາຄານທຸລະກິດ ທີ່ໃຫ້ບໍລິການຊໍາລະກ່ຽວກັບການນໍາເຂົ້າ-ສົ່ງອອກ ຕ້ອງມີເງື່ອນໄຂ ດັ່ງນີ້:

1. ມີລະບຽບການ ເເລະ/ຫຼື ຄູ່ມື ໃນການໃຫ້ບໍລິການຊໍາລະກ່ຽວກັບການນໍາເຂົ້າ-ສົ່ງອອກ;

2. ມີໜ່ວຍງານຮັບຜິດຊອບໃນການຄຸ້ມຄອງການໃຫ້ບໍລິການກ່ຽວກັບການນໍາເຂົ້າ-ສົ່ງອອກ;

3. ມີບຸກຄະລາກອນຈໍານວນໜຶ່ງທີ່ເໝາະສົມ ເເລະ ໄດ້ຮັບການຝຶກອົບຮົບຈາກທະນາຄານເເຫ່ງ ສປປ ລາວ ກ່ຽວກັບການໃຫ້ບໍລິການກ່ຽວກັບການນໍາເຂົ້າ-ສົ່ງອອກ;

4. ມີລະບົບໂອນເງິນທາງເອເລັກໂຕຣນິກເພື່ອຮອງຮັບການຊໍາລະ ເເລະ ຮັບຊໍາລະກັບຕ່າງປະເທດ ທີ່ສອດຄ່ອງກັບລະບຽບການຂອງທະນາຄານເເຫ່ງ ສປປ ລາວ;

5. ມີຜະລິດຕະພັນການເງິນ ເພື່ອອໍານວຍຄວາມສະດວກໃຫ້ເເກ່ການນໍາເຂົ້າ-ສົ່ງອອກສິນຄ້າ ເເລະ ການບໍລິການ ເປັນຕົ້ນ ໜັັັງສືຶສິີນເຊື່ອ, ຜະລິດຕະພັນດ້ານການເງິນທີ່ປ້ອງກັນຄວາມສ່ຽງອັດຕາເເລກປ່ຽນ;

6. ມີເງື່ອນໄຂອື່ນ ຕາມການກໍານົດຂອງທະນາຄານເເຫ່ງ ສປປ ລາວ.

ມາດຕາ 9 ພັນທະຂອງທະນາຄານທຸລະກິດໃນການໃຫ້ບໍລິການຊໍາລະ

ໃນການໃຫ້ບໍລິການຊໍາລະກ່ຽວກັບການນໍາເຂົ້າ-ສົ່ງອອກ ທະນາຄານທຸລະກິດ ມີພັນທະ ດັ່ງນີ້;

1. ກວດກາຄວາມຖືກຕ້ອງ ເເລະ ຄົບຖ້ວນ ຂອງເອກະສານກ່ຽວກັບການນໍາເຂົ້າ-ສົ່ງອອກ;

2. ຕິດຕາມ ກວດກາ ການຊໍາລະ ເເລະ ຮັບຊໍາລະ ຄ່າສິນຄ້າ ເເລະ ການບໍລິການກັບຕ່າງປະເທດຂອງຜູ້ນໍາເຂົ້າ-ສົ່ງອອກ ໃຫ້ຜ່ານລະບົບທະນາຄານ ເເລະ ບັນຊີເງິນຝາກກ່ຽວກັບການນໍາເຂົ້າ-ສົ່ງອອກ. ກໍລະນີພົບເຫັນການຊໍາລະເງິນ ເເລະ ຮັບຊໍາລະທີ່ບໍ່ສອດຄ່ອງ ຕ້ອງຊຸກຍູ້ຜູ້ນໍາເຂົ້າ-ສົ່ງອອກ ໃຫ້ປະຕິບັດຕາມລະບຽບການ ເເລະ ລາຍງານທະນາຄານເເຫ່ງ ສປປ ລາວ;

3. ປະຕິເສດການໃຫ້ບໍລິການຊໍາລະ ຄ່າສິນຄ້າ ເເລະ ການບໍລິການກັບຕ່າງປະເທດ ຜ່ານບັນຊີເງິນຝາກປະເພດອື່ນ ທີ່ບໍ່ເເມ່ນບັນຊີເງິນຝາກກ່ຽວກັບການນໍາເຂົ້າ-ສົ່ງອອກ;

4. ເກັບກໍາ, ສັງລວມ ເເລະ ລາຍງານ ສະຖິຕິການເປີດບັນຊີເງິນຝາກກ່ຽວກັບການນໍາເຂົ້່າ-ສົ່ງອອກ

ການຊໍາລະ, ການຮັບຊໍາລະ, ການເເລກປ່ຽນເງິນຕາ ເເລະ ການເຄື່ອນໄຫວອື່ນ ໃນບັນຊີເງິນຝາກຂອງຜູ້ນໍາເຂົ້າ-ສົ່ງອອກ ໃຫ້ທະນາຄານເເຫ່ງ ສປປ ລາວ ປະຈໍາວັນ, ເດືອນ, ໄຕມາດ, ປີ ຫຼື ຕາມການສະເໜີຂອງທະນາຄານເເຫ່ງ ສປປ ລາວ;

5. ປະຕິບັດພັນທະອື່ນ ຕາມກົດໝາຍ ເເລະ ລະບຽບການ.

ມາດຕາ 10 ການຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ

ຜູ້ນໍາເຂົ້າ ຕ້ອງນໍາໃຊ້ບັນຊີເງິນຝາກກ່ຽວກັບການນໍາເຂົ້າ-ສົ່ງອອກເທົ່ານັ້ນ ໃນການຊໍາລະຄ່າສິນຄ້າເເລະ ການບໍລິການກັບຕ່າງປະເທດ ດ້ວຍການໂອນເງິນທາງເອເລັກໂຕຣນິກ ໂດຍມີເອກະສານປະກອບ ດັ່ງນີ້:

1. ໃບສະເໜີຂໍໂອນເງິນຕາມເເບບພິມຂອງທະນາຄານທຸລະກິດ;

2. ສໍາເນົາໃບຮຽກເກັບຄ່າສິນຄ້າ ເເລະ ການບໍລິການ (Invoice) ຫຼື ເອກະສານເເຈ້ງລາຄາກ່ຽວຂ້ອງ;

3. ສໍາເນົາສັນຍາຊື້ ຂາຍ ສິນຄ້າ ເເລະ ການບໍລິການ (ຖ້າມີ);

4. ສໍາເນົາໃບເເຈ້ງມອບຊໍາລະພັນທະອາກອນ;

5. ສໍາເນົາໃບເເຈ້ງພາສີນໍາເຂົ້າເປັນລາຍລະອຽດ. ກໍລະນີຊໍາລະຄ່າສິນຄ້າລ່ວງໜ້າ ເເມ່ນໃຫ້ສໍາເນົາໃບເເຈ້ງພາສີ ຍ້ອນຫຼັງ ເຈັດ ວັນ ຫຼັງຈາກມີການເເຈ້ງສິນຄ້ານໍາເຂົ້າດັ່ງກ່າວ;

6. ສໍາເນົາໃບອະນຸຍາດນໍາເຂົ້າສິນຄ້າ (ກໍລະນີເປັນສິນຄ້າ ທີ່ຢູ່ໃນລາຍການຕ້ອງຂໍອະນຸຍາດນໍາຂະເເໜງການທີ່ກ່ຽວຂ້ອງ);

7. ສໍາເນົາໃບຢັ້ງຢຶນການລົງທະບຽນຜູ້ນໍາເຂົ້າ-ສົ່ງອອກ;

8. ສໍາເນົາໃບອະນຸຍາດລົງທຶນ ເເລະ/ຫຼື ໃບທະບຽນວິສາຫະກິດ;

9. ສໍາເນົາໃບອະນຸຍາດດໍາເນີນທຸລະກິດທີ່ກ່ຽວຂ້ອງ (ຖ້າມີ);

10. ເອກະສານອື່ນ ຕາມການກໍານົດຂອງທະນາຄານທຸລະກິດ.

ມາດຕາ 11 ການຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ

ຜູ້ສົ່ງອອກ ຕ້ອງຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ ເຂົ້າບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ຜ່ານການໂອນເງິນທາງເອເລັກໂຕຣນິກ ພາຍໃນວັນຊໍາລະທີ່ລະບຸໄວ້ໃນສັນຍາຊື້ ຂາຍ ເເຕ່

ບໍ່ເກີນ ຮ້ອຍເເປດສິບ ວັນ ນັບເເຕ່ວັນທີ່ສົ່ງອອກຈາກດ່ານພາສີສໍາລັບສິນຄ້າ ຫຼື ນັບເເຕ່ວັນຊໍາລະທີ່ລະບຸໄວ້ໃນ

ສັນຍາສໍາລັບການບໍລິການ.

ພາຍຫຼັງໄດ້ຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ ຜູ້ສົ່ງອອກຕ້ອງສໍາເນົາເອກະສານ

ກ່ຽວກັບການຊໍາລະດັ່ງກ່າວ ໃຫ້ທະນາຄານທຸລະກິດ ດັ່ງນີ້:

1. ສັນຍາຊື້ ຂາຍ ຫຼື ເອກະສານຢັ້ງຢືນການຊື້ ຂາຍ ທີ່ກ່ຽວຂ້ອງກັບຕ່າງປະເທດ;

2. ໃບຮຽກເກັບຄ່າສິນຄ້າ ເເລະ ບໍລິການ (Invoice);

3. ໃບເເຈ້ງພາສີສົ່ງອອກສິນຄ້າ;

4. ສໍາເນົາໃບອະນຸຍາດສົ່ງອອກສິນຄ້າ (ກໍລະນີລາຍການສິນຄ້າທີ່ຕ້ອງຂໍອະນຸຍາດນໍາຂະເເໜງການກ່ຽວຂ້ອງກ່ອນການສົ່ງອອກ);

5. ເເຜນລາຍຮັບຂອງຜູ້ສົ່ງອອກ;

6. ເອກະສານອື່ນ ຕາມການກໍານົດຂອງທະນາຄານທຸລະກິດ.

ມາດຕາ 12 ການຮັກສາລາຍຮັບຈາກການສົ່ງອອກ ໄວ້ຢູ່ຕ່າງປະເທດ

ຜູ້ສົ່ງອອກ ທີ່ຕ້ອງການຮັກສາລາຍຮັບຈາກການສົ່ງອອກ ໄວ້ຢູ່ຕ່າງປະເທດເພື່ອຊໍາລະເງິນກູ້ ຕ້ອງຂໍອະນຸຍາດນໍາທະນາຄານເເຫ່ງ ສປປ ລາວ ຊຶ່ງຈະພິຈາລະນາບົນພື້ນຖານທີ່ເປັນໂຄງການສໍາຄັນລະດັບຊາດ. ເອກະສານປະກອບການຂໍອະນຸຍາດ ມີດັ່ງນີ້:

1. ສໍາເນົາສັນຍາສໍາປະທານ;

2. ສໍາເນົາໃບອະນຸຍາດລົງທຶນ ເເລະ/ຫຼື ໃບທະບຽນວິສາຫະກິດ;

3. ສໍາເນົາໃບອະນຸຍາດດໍາເນີນທຸລະກິດ (ຖ້າມີ);

4. ສໍາເນົາໃບອະນຸຍາດກູ້ຢືມເງິນຢູ່ຕ່າງປະເທດ;

5. ສໍາເນົາສັນຍາກູ້ຢືມເງິນຢູ່ຕ່າງປະເທດ;

6. ເອກະສານອື່ນ ຕາມການກໍານົດຂອງທະນາຄານເເຫ່ງ ສປປ ລາວ.

ທະນາຄານເເຫ່ງ ສປປ ລາວ ຈະພິຈາລະນາອະນຸຍາດ ພາຍໃນເວລາ ສິບ ວັນລັດຖະການ ນັບເເຕ່ວັນທີ່ໄດ້ຮັບເອກະສານປະກອບຂໍການອະນຸຍາດ ຢ່າງຖືກຕ້ອງ ເເລະ ຄົບຖ້ວນ.

ໝວດທີ 4

ຂໍ້ຫ້າມ

ມາດຕາ 13 ຂໍ້ຫ້າມສໍາລັບຜູ້ນໍາເຂົ້າ-ສົ່ງອອກ

ຫ້າມຜູ້ນໍາເຂົ້າ-ສົ່ງອອກ ມີພຶດຕິກໍາ ດັ່ງນີ້:

1. ບໍ່ເເຈ້ງລົງທະບຽນຜູ້ນໍໍາເຂົ້າ-ສົ່ງອອກ ນໍາທະນາຄານເເຫ່ງ ສປປ ລາວ ພາຍໃນກໍານົດເວລາ;

2. ບໍ່ເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ນໍາທະນາຄານທຸລະກິດ ພາຍໃນເວລາກໍານົດ;

3. ນໍາໃຊ້ບັນຊີເງິນຝາກປະເພດອື່ນທີ່ບໍ່ເເມ່ນບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ເພື່ອຊໍາລະ ເເລະ/ຫຼື ຮັບຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ;

4. ຊໍາລະຄ່າສິນຄ້າ ເເລະ ການບໍລິການກັບຕ່າງປະເທດ ດ້ວຍຮູບເເບບອື່ນທີ່ຜ່ານລະບົບການໂອນເງິນຂອງທະນາຄານທຸລະກິດ;

5. ນໍາເອົາລາຍຮັບຈາກການສົ່ງອອກ ເຂົ້າບັນຊີເງິນຝາກປະເພດອື່ນ ຫຼື ເຂົ້າບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ບໍ່ຄົບຖ້ວນຕາມ ຈໍານວນ ເເລະ ວັນຊໍາລະທີ່ລະບຸໃນສັນຍາຊື້ ຂາຍ ຫຼື ເອກະສານການຢັ້ງຢືນການຊື້ ຂາຍ ທີ່ກ່ຽວຂ້ອງ;

6. ຮັກສາລາຍຮັບຈາກການສົ່ງອອກໄວ້ຢູ່ຕ່າງປະເທດ ໂດຍບໍ່ໄດ້ຮັບອະນຸຍາດຈາກທະນາຄານເເຫ່ງ ສປປ ລາວ;

7. ມີພຶດຕິກໍາອື່ນ ທີ່ເປັນການລະເມີດກົດໝາຍ ເເລະ ລະບຽບການ.

ມາດຕາ 14 ຂໍ້ຫ້າມສໍາລັບທະນາຄານທຸລະກິດ

ຫ້າມທະນາຄານທຸລະກິດ ມີພຶດຕິກໍາ ດັ່ງນີ້:

1. ໃຫ້ບໍລິການຊໍາລະ ຄ່າສິນຄ້າ ເເລະ ການບໍລິການກັບຕ່າງປະເທດ ຜ່ານບັນຊີເງິນຝາກປະເພດອື່ນທີ່ບໍ່ເເມ່ນບັນຊີເງິນຝາກກ່ຽວກັບການນໍາເຂົ້່າ-ສົ່ງອອກ;

2. ເປີດບັນຊີເງິນຝາກໃຫ້ຜູ້ນໍາເຂົ້າ-ສົ່ງອອກ ບໍ່ສອດຄ່ອງຕາມລະບຽບການ;

3. ບໍ່ເກັບກໍາ, ສັງລວມ ເເລະ ລາຍງານ ສະຖິຕິການເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ, ການຊໍາລະ, ການຮັບຊໍາລະ, ການເເລກປ່ຽນເງິນຕາ ເເລະ ການເຄື່ອນໄຫວອື່ນ ໃນບັນຊີເງິນຝາກຂອງຜູ້ນໍາເຂົ້າ-ສົ່ງອອກ ໃຫ້ທະນາຄານເເຫ່ງ ສປປ ລາວ;

4. ມີພຶດຕິກໍາອື່ນ ທີ່ເປັນການລະເມີດກົດໝາຍ ເເລະ ລະບຽບການ.

ໝວດທີ 5

ການຄຸ້ມຄອງວຽກງານເງິນຕາຕ່າງປະເທດ

ກ່ຽວກັບການນໍາເຂົ້າ-ສົ່ງອອກ

ມາດຕາ 15 ການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ

ກົມຄຸ້ມຄອງເງິນຕາຕ່າງປະເທດ ຮັບຜິດຊອບໂດຍກົງ ເເລະ ເປັນເຈົ້າການ ໃນການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ໂດຍປະສານສົມທົບກັບນະໂຍບາຍເງິນຕາ, ກົມຄຸ້ມຄອງ ທະນາຄານທຸລະກິດ, ສາຂາທະນາຄານເເຫ່ງ ສປປ ລາວ ຢູ່ທ້ອງຖິ່ນ ເເລະ ພາກສ່ວນທີ່ກ່ຽວຂ້ອງ.

ມາດຕາ 16 ສິດ ເເລະ ໜ້າທີ່ ຂອງກົມຄຸ້ມຄອງເງິນຕາຕ່າງປະເທດ

ໃນການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ກົມຄຸ້ມຄອງເງິນຕາຕ່າງປະເທດ ມີສິດ ເເລະ ໜ້າທີ່ ດັ່ງນີ້:

1. ຄົ້ນຄວ້ານະໂຍບາຍ ເເລະ ນິຕິກໍາ ກ່ຽວກັບການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ເພື່ອສະເໜີຂັ້ນເທິງພິຈາລະນາ;

2. ຕິດຕາມ ກວດກາ ຜູ້ນໍາເຂົ້າ-ສົ່ງອອກ ກ່ຽວກັບການເປີດບັນຊີຝາກ, ການນໍາລາຍຮັບຈາກການນໍາລາຍຮັບຈາກການສົ່ງອອກ ເຂົ້າໃນບັນຊີເງິນກ່ຽວກັບການນໍາເຂົ້າ-ສົ່ງອອກ, ເເຜນລາຍຮັບ ເເລະ ການເຄື່ອນໄຫວບັນຊີເງິນຝາກດັ່ງກ່າວ;

3. ຄົ້ນຄວ້າລະບົບຕິດຕາມກະເເສເງິນຈາກການນໍາເຂົ້າ-ສົ່ງອອກ ໃຫ້ທັນສະໄໝ;

4. ເເລກປ່ຽນຂໍ້ມູນ ເເລະ ປະສານສົມທົບກັບກົມນະໂຍບາຍເງິນຕາ, ກົມຄຸ້ມຄອງທະນາຄານທຸລະກິດ, ສາຂາທະນາຄານເເຫ່ງ ສປປ ລາວ ຢູ່ທ້ອງຖິ່ນ ເເລະ ພາກສ່ວນທີ່ກ່ຽວຂ້ອງ ໃນການສ້າງເເຜນ ເເລະ ປະຕິບັດເເຜນລົງກວດທະນາຄານທຸລະກິດ ເເລະ ຈັດຕັ້ງປະຕິບັດໜ້າທີ່ອື່ນ ຂອງຕົນ,

5. ນໍາໃຊ້ມາດຕະການຕໍ່ຜູ້ທີ່ລະເມີດຂໍ້ຕົກລົງສະບັບນີ້;

6. ສະຫຼຸບ ເເລະ ລາຍງານ ການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ເເລະ ການບໍລິການ ໃຫ້ຂັ້ນເທິງຢ່າງເປັນປົກກະຕິ;

7. ນໍາໃຊ້ສິດ ເເລະ ປະຕິບັດໜ້າທີ່ອື່ນ ຕາມກົດໝາຍ ເເລະ ລະບຽບການ.

ມາດຕາ 17 ສິດ ແລະ ໜ້າທີ່ ຂອງກົມນະໂຍບາຍເງິນຕາ

ໃນການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ກົມນະໂຍບາຍເງິນຕາ ມີສິດ ແລະ ຫນ້າທີ່ ດັ່ງນີ້:

1. ຄົ້ນຄວ້າສ້າງເຄື່ອງມື ນະໂຍບາຍອັດຕາແລະປ່ຽນ ເພື່ອຊຸກຍູ້ ແລະ ສະໜັບສະໜູນວຽກງານຄຸ້ມຄອງວຽກງານເງິນຕາຕ່າງປະເທດກ່ຽວການນຳເຂົ້າ-ສົ່ງອອກ;

2. ປະສານ ແລະ ແລກປ່ຽນຂໍ້ມູນກັບກົມຄຸ້ມຄອງເງິນຕາຕ່າງປະເທດ ເພື່ອປະກອບເຂົ້າໃນການຄຸ້ມຄອງອັດຕາແລກປ່ຽນ ແລະ ໃຊ້ໃນການສ້າງ ແລະ ຄາດຄະເນ ສະຖິຕິດຸນຊຳລະກັບຕ່າງປະເທດ;

3. ນຳໃຊ້ສິດ ແລະ ປະຕິບັດຫນ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 18 ສິດ ແລະ ຫນ້າທີ່ ຂອງກົມຄຸ້ມຄອງທະນາຄານທຸລະກິດ

ໃນການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ແລະ ບໍລິການ ກົມຄຸ້ມຄອງທະນາຄານທຸລະກິດ ມີສິດ ແລະ ໜ້າທີ່ ດັ່ງນີ້:

1. ຊຸກຍູ້ທະນາຄານທຸລະກິດ ປະຕິບັດບົດບາດ ເເລະ ໜ້າທີ່ ຂອງຕົນ ຕາມທີ່ໄດ້ກໍານົດໃນຂໍ້ຕົກລົງສະບັບນີ້;

2. ໃຫ້ການຮ່ວມມືກັບກົມຄຸ້ມຄອງເງິນຕາຕ່າງປະເທດ ໃນການສ້າງເເຜນ ແລະ ປະຕິບັດແຜນລົງກວດກາທະນາຄານທຸລະກິດກ່ຽວກັບການຈັດຕັ້ງປະຕິບັດ ຂໍ້ຕົກລົງສະບັບນີ້;

3. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 19 ສິດ ແລະ ຫນ້າທີ່ ຂອງສາຂາທະນາຄານແຫ່ງ ສປປ ລາວ ຢູ່ທ້ອງຖິ່ນ

ໃນການຄຸ້ມຄອງວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ສາຂາທະນາຄານແຫ່ງ ສປປ ລາວ ຢູ່ທ້ອງຖິ່ນ ມີສິດ ແລະ ໜ້າທີ່ດັ່ງນີ້:

1. ຕິດຕາມ ແລະ ຊຸກຍູ້ ການເປີດບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ຂອງຜູ້ນໍາເຂົ້າ-ສົ່ງອອກ;

2. ຕິດຕາມການລາຍງານທຸລະກໍານໍາເຂົ້າ-ສົ່ງອອກ ຂອງຜູ້ນໍາເຂົ້່າ-ສົ່ງອອກ ຜ່ານລະບົບເອເລັກໂຕຣນິກ ຂອງທະນາຄານແຫ່ງ ສປປ ລາວ ພາຍຫຼັງດໍາເນີນທຸລະກໍາດັ່ງກ່າວ;

3. ຕິດຕາມການເຄື່ອນໄຫວບັນຊີເງິນຝາກກ່ຽວກັບການນໍາເຂົ້າສົ່ງອອກ ຜ່ານການລາຍງານຂອງທະນາຄານທຸລະກິດ;

4. ປະສານສົມທົບກັບພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດຂໍ້ຕົກລົງສະບັບນີ້;

5. ນໍາໃຊ້ມາດຕະການຕໍ່ຜູ້ທີ່ລະເມີດຂໍ້ຕົກລົງສະບັບນີ້;

6. ສະຫຼຸບ ແລະ ລາຍງານ ວຽກງານເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກ ໃຫ້ກົມຄຸ້ມຄອງເງິນຕາຕ່າງປະເທດ ໃນເເຕ່ລະໄລຍະ;

7. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມການມອບໝາຍຂອງຄະນະຜູ້ວ່າການທະນາຄານແຫ່ງ ສປປ ລາວ.

ໝວດທີ 6

ມາດຕະການຕໍ່ຜູ້ລະເມີດ

ມາດຕາ 20 ມາດຕະການສຶກສາອົບຮົມ

ຜູ້ນໍາເຂົ້າ-ສົ່ງອອກ ແລະ ທະນາຄານທຸລະກິດດ ທີ່ລະເມີດຂໍ້ຕົກລົງສະບັບນີ້ ມີລັກສະນະເບົາ ແລະ ເປັນຄັ້ງທໍາອິດ ຈະຖືກສຶກສາອົບຮົມ,ກ່າວເຕືອນ ພ້ອມທັງບັນທຶກເປັນລາຍລັກອັກສອນ.

ມາດຕາ 21 ມາດຕະການປັບໃໝ

ຜູ້ນໍາເຂົ້າ-ສົ່ງອອກ ແລະ ທະນາຄານທຸລະກິດ ທີ່ລະເມີດຂໍ້ຕົກລົງສະບັບນີ້ ແລະ ຖືກປະຕິບັດມາດຕະການສຶກສາອົບຮົບ ແຕ່ຍັງສືບຕໍ່ກະທໍາຜິດຊໍ້າ ຈະຖືກປັບໃໝ ຕາມເເຕ່ລະກໍລະນີ ດັ່ງນີ້:

1. ສໍາລັບຜູ້ນໍາເຂົ້າ-ສົ່ງອອກ

1) ປັບໃໝ 10.000.000 (ສິບລ້ານ) ກີບ ສຳລັບການເຄື່ອນໄຫວ ທີ່ເປັນການລະເມີດມາດຕາ 13 ຂໍ້ 1,2 ແລະ 3 ຂອງຂໍ້ຕົກລົງສະບັບນີ້;

2) ປັບໃໝ 10% ( ສິບສ່ວນຮ້ອຍ) ຂອງມູນຄ່າທີ່ລະເມີດ ສຳລັບການເຄື່ອນໄຫວທີ່ປັບການລະເມີດມາດຕາ 13 ຂໍ້ 4 ແລະ 6 ຂອງຂໍ້ຕົກລົງລະບົບນີ້;

2. ສຳລັບທະນາຄານທຸລະກິດ: ປັບໃໝ 5.000.000 (ຫ້າລ້ານ) ກີບ ຕໍ່ຄັ້ງ ສຳລັບການເຄື່ອນໄຫວທີ່ເປັນການລະເມີດມາດຕາ 14 ຂອງຂໍ້ຕົກລົງສະບັບນີ້. ສຳລັຍການລະເມີດຊຳ້ໃນການລະເມີດຊຳ້ໃນແຕ່ລະກໍລະນີ ຈະຖືກປັບໃໝສອງເທົ່າ ຂອງມູນຄ່າປັບໃໝໃນຄັ້ງຫຼ້າສຸດ.

ມາດຕາ 22 ມາດຕະການທທາງບໍລິຫານອື່ນ

ຜູ້ນໍາເຂົ້າ-ສົ່ງອອກ ທີ່ຖືກປະຕິບັດ ມາດຕະການສຶກສາອົບຮົມ ແລະ ມາດຕະການປັບໃໝ ຕາມມາດຕາ 20 ແລະ 21 ຂອງຂໍ້ຕົກລົງສະບັບນີ້ ແຕ່ຍັງມີການລະເມີດຊໍ້າໃນແຕ່ລະກໍລະນີ ຈະຖືກປະຕິບັດມາດຕະການທາງບໍລິຫານອື່ນ ຕາມທີ່ໄດ້ກຳນົດໄວ້ໃນມາດຕາ 56 ຂອງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ.

ໝວດທີ 7

ບົດບັນຍັດສຸດທ້າຍ

ມາດຕາ 23 ການຈັດຕັ້ງປະຕິບັດ

ກົມຄຸ້ມຄອງເງິນຕາຕ່າງປະເທດ ເປັນເຈົ້າການຈັດຕັ້ງປະຕິບັດຂໍ້ຕົກລົງສະບັບນີ້ ໃຫ້ໄດ້ຮັບຜົນດີ. ກົນນະໂຍບາຍເງິນຕາ, ກົມຄຸ້ມຄອງທະນາຄານທຸລະກິດ, ສາຂາທະນາຄານແຫ່ງ ສປປ ລາວ ຢູ່ທ້ອງຖິ່່ນ ແລະ ພາກສ່ວນກ່ຽວຂ້ອງ ມີຫນ້າທີຈັດຕັ້ງປະຕິບັດຂໍ້ຕົກລົງສະບັບນີ້ ຕາມພາລະບົດບາດຂອງຕົນ ຢ່າງເຂັ້ມງວດ.

ມາດຕາ 24 ຜົນສັັກສິດ

ຂໍ້ຕົກລົງສະບັບນີ້ ມີຜົນສັກສິດ ນັບແຕ່ວັນລົງລາຍເຊັນເປັນຕົ້ນໄປ.

ຂໍ້ກໍານົດ, ບົດບັນຍັດໃດ ທີ່ຂັດກັບຂໍ້ຕົກລົງສະບັບນີ້ ລ້ວນແຕ່ຖືກຍົກເລີກ.

ຜູ້ວ່າການທະນາຄານແຫ່ງ ສປປ ລາວ

ບຸນເຫຼືອ ສິນໄຊວໍຣະວົງ

#	ຫົວຂໍ້	ດາວໂຫຼດ
1	The decision in managing currency exchange for import-export of goods and services, No. 677/BOL, date 24 July 2023.	PDF
2	ຂໍ້ຕົກລົງ ວ່າດ້ວຍການຄຸ້ມຄອງເງິນຕາຕ່າງປະເທດ ກ່ຽວກັບການນໍາເຂົ້າ-ສົ່ງອອກ ສິນຄ້າ ແລະ ການບໍລິການ, ເລກທີ 677/ທຫລ, ລົງວັນທີ 24 ກໍລະກົດ 2023.	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.