ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງໂຍທາທິການ ເເລະ ຂົນສົ່ງ
ເລກທີ 9393/ຍທຂ
ນະຄອນຫຼວງວຽງຈັນ, ວັນທີ 13 ເມສາ 2023
ຂໍ້ຕົກລົງ
ວ່າດ້ວຍການອະນຸຍາດນໍ້າໜັກລວມສູງສຸດຂອງລົດບັນທຸກ
- ອີງຕາມ ກົດໝາຍ ວ່າດ້ວຍການຂົນສົ່ງທາງບົກ ສະບັບເລກທີ 24/ສພຊ, ລົງວັນທີ 24 ທັນວາ 2012,
- ອີງຕາມ ກົດໝາຍ ວ່າດ້ວຍການຈະລາຈອນທາງບົກ ສະບັບເລກທີ 23/ສພຊ, ລົງວັນທີ 12 ທັນວາ 2012,
- ອີງຕາມ ກົດໝາຍ ວ່າດ້ວຍທາງຫຼວງ ສະບັບເລກທີ 03/ສພຊ, ລົງວັນທີ 08 ພະຈິກ 2016;
- ອີງຕາມ ດໍາລັດ ວ່າດ້ວຍການຈັດຕັ້ງ ເເລະ ການເຄື່ອນໄຫວ ຂອງກະຊວງໂຍທາທິການ ເເລະ ຂົນສົ່ງ ສະບັບເລກທີ 677/ນຍ, ລົງວັນທີ 21 ທັນວາ 2021;
- ອີງຕາມ ໜັງສືສະເໜີ ຂອງກົມຂົວທາງ ສະບັບເລກທີ 17597/ກຂທ, ລົງວັນທີ 10 ພະຈິກ 2022.
ລັດຖະມົນຕີ ອອກຂໍ້ຕົກລົງ:
ໝວດທີ 1
ບົດບັນຍັດທົ່ວໄປ
ມາດຕາ 1 ຈຸດປະສົງ
ຂໍ້ຕົກລົງສະບັບນີ້ ກໍານົດຫຼັກການ, ລະບຽບການ ເເລະ ມາດຕະການ ກ່ຽວກັບນໍ້າໜັກລວມສູງສຸດຂອງລົດບັນທຸກ ທີ່ສັນຈອນຕາມທາງຫຼວງ ເພື່ອໃຫ້ເເທດເໝາະກັບຄວາມສາມາດຮັບນໍ້າໜັກຂອງທາງຫຼວງ ເເຕ່ລະປະເພດ ໃນເເຕ່ລະລະດູການ ເເນໃສ່ປົກປັກຮັກສາເສັ້ນທາງໃຫ້ມີອາຍຸການນໍາໃຊ້ຍາວນານ, ຫຼຸດຜ່ອນການໃຊ້ຈ່າຍງົບປະມານຂອງລັດໃນການ ບູລະນະຮັກສາ ເເລະ ສ້ອມເເປງ ທາງຫຼວງ ພ້ອມທັງ ຫຼຸດຜ່ອນການເກີດ ອຸບັດຕິເຫດ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດ.
ມາດຕາ 2 ນໍ້າໜັກລວມສູງສຸດຂອງລົດບັນທຸກ
ນໍ້າໜັກລວມສູງສຸດຂອງລົດບັນທຸກ ເເມ່ນ ນໍ້າໜັກລົດເປົ່າ ບວກກັບນໍ້່່າໜັກທີ່ບັນທຸກ ທີ່ອະນຸຍາດໃຫ້ສັນຈອນຕາມທາງຫຼວງ ເເຕ່ລະປະເພດ ໃນ ສປປ ລາວ.
ມາດຕາ 3 ຂອບເຂດການນໍາໃຊ້
ຂໍ້ຕົກລົງສະບັບນີ້ ນໍາໃຊ້ສໍາລັບ ບຸກຄົນ, ນິຕິບຸກຄົນ ເເລະ ການຈັດຕັ້ງ ທີ່ດໍາເນີນການຂົນສົ່ງ, ບັນທຸກໜັກທີ່ສັນຈອນຕາມທາງຫຼວງເເຕ່ລະປະເພດ ໃນ ສປປ ລາວ.
ໝວດທີ 2
ນໍ້າໜັກລວມສູງສຸດຂອງລົດບັນທຸກ
ມາດຕາ 4 ປະເພດຂອງລົດບັນທຸກ
ລົດບັນທຸກທີ່ອະນຸຍາດ ມີ 03 ປະເພດ ດັ່ງນີ້:
1. ລົດບັນທຸກດ່ຽວ;
2. ລົດບັນທຸກເຄິ່ງຫາງລາກ;
3. ຫາງລາກ.
ມາດຕາ 5 ນໍ້າໜັກລວມສູງສຸດຂອງລົດບັນທຸກດ່ຽວ
ລົດບັນທຸກ ເເມ່ນລົດບັນທຸກທີ່ບໍ່ສາມາດເເຍກຈາກກັນໄດ້ ມີ 08 ຊະນິດ ຊຶ່ງນໍ້າໜັກລວມສູງສຸດຂອງລົດບັນທຸກດ່ຽວ ທີ່ອະນຸຍາດ ມີລາຍລະອຽດ ດັ່ງນີ້:
ລ/ດ ປະເພດລົດ ຮູບສະເເດງປະເພດລົດ ນໍ້າໜັກລວມສູງສຸດ ທີ່ອະນຸຍາດ
(ກິໂລກຣາມ)
ລົດບັນທຸກດ່ຽວ RIGID TRUCK 8,2 ໂຕນ 9,1 ໂຕນ 11 ໂຕນ
1 2 ເພົາ 4 ຕີນ
8.500 9.500 9.500
2 2 ເພົາ 6 ຕີນ
12.000 14.100 15.000
3 3 ເພົາ 6 ຕີນ
15.300 16.000 17.000
4 3 ເພົາ 10 ຕີນ
21.000 23.200 25.000
5 3 ເພົາ 6 ຕີນ
10.500 13.500 13.500
6 3 ເພົາ 8 ຕີນ
14.000 17.500 17.500
7 4 ເພົາ 8 ຕີນ
18.800 20.000 22.500
8 4 ເພົາ 12 ຕີນ
25.200 27.200 29.500
ມາດຕາ 6 ນໍ້າໜັກລວມສູງສຸດຂອງລົດບັນທຸກເຄິ່ງຫາກລາກ
ລົດບັນທຸກເຄິ່ງຫາກລາກ ເເມ່ນລົດບັນທຸກທີ່ມີສ່ວນຫົວເປັນເເຮງຂັບເຄື່ອນ ເເລະ ມີຫາງລາກໃນການບັນທຸກ ມີ 05 ຊະນິດ ຊຶ່ງນໍ້າໜັກລວມສູງສຸດຂອງລົດບັນທຸກເຄິ່ງຫາງລາກ ທີ່ອະນຸຍາດ ມີລາຍລະອຽດ ດັ່ງນີ້:
1 3 ເພົາ 10 ຕີນ
21.100 23.200 26.000
2 4 ເພົາ 14 ຕີນ
30.100 32.200 36.000
3 4 ເພົາ 14 ຕີນ
28.400 32.300 35.000
4 5 ເພົາ 18 ຕີນ
37.400 41.400 45.000
5 6 ເພົາ 22 ຕີນ
41.400 49.600 49.600
ລ/ດ ປະເພດລົດ ຮູບສະເເດງປະເພດລົດ ນໍ້າໜັກລວມສູງສຸດ ທີ່ອະນຸຍາດ
(ກິໂລກຣາມ)
ລົດບັນທຸກເຄິ່ງຫາງລາກ SEMI-TRAILER 8,2 ໂຕນ 9,1 ໂຕນ 11 ໂຕນ
ມາດຕາ 7 ນໍ້າໜັກລວມສູງສຸດຂອງຫາງລາກ
ຫາງລາກ ເເມ່ນລົດບັນທຸກທີ່ບໍ່ສາມາດຂັບເຄື່ອນດ້ວຍຕົວເອງ ຕ້ອງໄດ້ໃຊ້ຫົວລາກໃນການຂັບເຄື່ອນມີ 05 ຊະນິດ ຊຶ່ງນໍ້າໜັກລວມສູງສຸດຂອງຫາງລາກ ທີ່ອະນຸຍາດ ມີລາຍລະອຽດ ດັ່ງນີ້:
ລ/ດ ປະເພດລົດ ຮູບສະເເດງປະເພດລົດ ນໍ້າໜັກລວມສູງສຸດ ທີ່ອະນຸຍາດ
(ກິໂລກຣາມ)
ຫາງລາກ TRAILER 8,2 ໂຕນ 9,1 ໂຕນ 11 ໂຕນ
1 2 ເພົາ 4 ຕີນ
13.600 14.000 14.000
2 2 ເພົາ 6 ຕີນ
15.900 16.100 18.000
3 2 ເພົາ 8 ຕີນ
18.200 18.000 22.000
4 3 ເພົາ 12 ຕີນ
25.500 27.300 31.000
5 4 ເພົາ 16 ຕີນ
32.800 36.400 44.000
ມາດຕາ 8 ການຫຼຸດນໍ້າໜັກລວມສູງສຸດ ຕາມບາງສະພາບ ເຕັກນິກ ຂອງລົດບັນທຸກ
ລົດບັນທຸກ ທີ່ມີເພົາເປັນປະເພດຕີນຄູ່, ຖ້າຫາກວ່າ ໄດ້ປົດຕີນຄູ່ອອກເສັ້ນໜຶ່ງ ຫຼື ເສັ້ນໃດໜຶ່ງ ເເຕກ, ຮົ່ວ, ຕ້ອງຫຼຸດນໍ້າໜັກເພົາ ເເລະ ນໍ້າໜັກລວມສູງສຸດລົງ ໂດຍໃຫ້ຄິດໄລ່ນໍ້າໜັກ ເປັນປະເພດຕີນດ່ຽວ.
ມາດຕາ 9 ນໍ້າໜັກລວມສູງສຸດຂອງລົດບັນທຸກ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ.
ນໍ້າໜັກເພົາ ເເລະ ນໍ້າໜັກລວມສູງສຸດຂອງລົດບັນທຸກ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ສັນຈອນຕາມທາງຫຼວງ ເເມ່ນໃຫ້ປະຕິບັດຕາມລະບຽບການທີ່ໄດ້ກໍານົດໄວ້ໃນ ມາດຕາ 5, 6 ເເລະ 7 ຂອງຂໍ້ຕົກລົງສະບັບນີ້, ຍົກເວັ້ນ ກໍລະນີສຸກເສີນ.
ມາດຕາ 10 ການຂົນສົ່ງພິເສດ
ການຂົນສົ່ງພິເສດ ທີ່ ມີນໍ້າໜັກຫຼາຍ ແລະ ມີຂະໜາດໃຫຍ່, ກວ້າງ, ສູງ, ຍາວ ເກີນທີ່ໄດ້ກໍານົດໄວ້ໃນ ມາດຕາ 14 ຊຶ່ງບໍ່ສາມາດແຍກເປັນຊິ້ນສ່ວນອອກຈາກກັນໄດ້ ຕ້ອງໄດ້ຮັບອະນຸຍາດຈາກ ກະຊວງໂຍທາທິການ ເເລະ ຂົນສົ່ງ ເສຍກ່ອນ.
ມາດຕາ 11 ນໍ້າໜັກລວມສູງສຸດຂອງທາງຫຼວງເເຫ່ງຊາດທີ່ຮອງຮັບ 11 ໂຕນ/ເພົາ
ທາງຫຼວງເເຫ່ງຊາດທີ່ສາມາດຮອງຮັບນໍ້າໜັກລວມສູງສຸດ 11 ໂຕນ/ເພົາ ມີດັ່ງນີ້:
ເສັ້ນທາງຫຼວງເເຫ່ງຊາດເລກ 9 (ຂົວມິດຕະພາບ II ສະຫວັນນະເຂດ-ເເດນສະຫວັນ), ເສັ້ນທາງຫຼວງແຫ່ງຊາດເລກ 3 (ຂົວມິດຕະພາບ 4 ຫ້ວຍຊາຍ - ບໍ່ເເຕນ), ເສັ້ນທາງຫຼວງແຫ່ງຊາດເລກ 4 (ຂົວມິດຕະພາບ 2 ເເກ່ນທ້າວ ໄຊຍະບູລີ - ສາມເເຍກຊຽງເງິນ).
ໝວດທີ 3
ໄລຍະເວລາບັນທຸກນໍ້າໜັກລວມສູງສຸດຕາມລະດູ
ມາດຕາ 12 ນໍ້າໜັກລວມສູງສຸດ ຂອງລົດບັນທຸກໃນຊ່ວງລະດູເເລ້ງ
ນໍ້າໜັກລວມສູງສຸດຂອງລົດບັນທຸກທີ່ກໍານົດເເມ່ນອະນຸຍາດໃຫ້ສັນຈອນຕາມຄວາມອາດສາມາດຮັບ
ນໍ້າໜັກຂອງທາງຫຼວງເເຕ່ລະປະເພດຊ່ວງລລະດູເເລ້ງ ນັບເເຕ່ວັນທີ 01 ພະຈິກ ຫາ ວັນທີ 31 ພຶດສະພາ.
ມາດຕາ 13 ນໍ້າໜັກລວມສູງສຸດ ຂອງລົດບັນທຸກໃນຊ່ວງລະດູຝົນ
ນໍ້າໜັກລວມສູງສຸດ ຂອງລົດບັນທຸກ ທີ່ອະນຸຍາດໃຫ້ສັນຈອນຕາມທາງ ປູດິນເເດງ ເເລະ ປູເເຮ່ໃຫ້ຫຼຸດນໍ້າໜັກລົງ ຊາວສ່ວນຮ້ອຍ (20%) ນັບແຕ່ວັນທີ 01 ມິຖຸນາ ຫາ ວັນທີ 31 ຕຸລາ.
ໝວດທີ 4
ຂະໜາດ ເເລະ ການປະຕິບັດລະບຽບຈະລາຈອນຂອງຜູ້ຂັບຂີ່ ລົດບັນທຸກ
ມາດຕາ 14 ຂະໜາດລົດບັນທຸກຄວາມກວ້າງ, ຄວາມສູງ ເເລະ ຄວາມຍາວ ຂອງລົດບັນທຸກ
ທີ່ໄດ້ຮັບອະນຸຍາດໃຫ້ນໍາໃຊ້ ຕາມທາງຫຼວງແຕ່ລະປະເພດ ມີຂະໜາດ ດັ່ງນີ້:
1. ຄວາມກວ້າງ ບໍ່ເກີນ 2,50 ແມັດ;
2. ຄວາມສູງ ບໍ່ເກີນ 4,50 ແມັດ;
3. ຄວາມຍາວຂອງລົດບັນທຸກດ່ຽວ ບໍ່ເກີນ 12,20 ແມັດ;
4. ຄວາມຍາວຂອງລົດບັນທຸກເຄິ່ງຫາງລາກ ບໍ່ເກີນ 21,03 ແມັດ,
5. ຄວາມຍາວຂອງຫາງລາກ ບໍ່ເກີນ 19,00 ແມັດ.
ມາດຕາ 15 ການປະຕິບັດລະບຽບຈະລາຈອນຂອງຜູ້ຂັບຂີ່ລົດບັນທຸກ
ຜູ້ຂັບຂີ່ລົດບັນທຸກ ທີ່ສັນຈອນຕາມທາງຫຼວງແຕ່ລະປະເພດ ຕ້ອງປະຕິບັດຕາມ ລໍາດັບ ວ່າດ້ວຍ
ກົດຈະລາຈອນທາງບົກ ສະບັບເລກທີ 615/ລບ, ລົງວັນທີ 09 ທັນວາ 2020 (ອະທິບາຍ) ຢ່າງເຂັ້ມງວດ
ເປັນຕົ້ນ ປ້າຍກໍານົດນໍ້າໜັກ (ຂົວ ແລະ ທາງ) ເເລະ ປ້າຍສະຖານີຕິດສັ່ງນໍ້າໜັກ.
ໝວດທີ 5
ການກວດກາຊັ່ງນໍ້າໜັກ ເເລະ ປັບໃໝລົດບັນທຸກນໍ້າໜັກເກີນ
ມາດຕາ 16 ການກວດກາຊັ່ງນໍ້າໜັກ
ລົດບັນທຸກນໍ້າໜັກ ທີ່ສັນຈອນຕາມທາງຫຼວງແຕ່ລະປະເພດ ຕ້ອງໄດ້ຜ່ານການກວດກາຊັ່ງນໍ້າໜັກບັນທຸກ ຢູ່ ສະຖານີຕິດຊັ່ງນໍ້າໜັກ ຫຼື ຜ່ານການກວດກາຈາກໜ່ວຍງານກວດການໍ້າໜັກສະເພາະກິດ ທີ່ປະຈໍາຢູ່ຕາມທາງຫຼວງແຕ່ລະປະເພດ.
ມາດຕາ 17 ການອອກໃບຢັ້ງຢືນກວດກາການຊັ່ງນໍ້າໜັກ
ພາຍຫຼັງກວດກາການຊັ່ງນໍ້າໜັກ ພະນັກງານປະຈໍາສະຖານີຕິດຊັ່ງນໍ້າໜັກ ຫຼື ໜ່ວຍງານກວດການໍ້າໜັກສະເພາະກິດ ຈະອອກໃບຢັ້ງຢືນໃຫ້ລົດບັນທຸກທີ່ຜ່ານການກວດກາ ເພື່ອເປັນຫຼັກຖານ.
ມາດຕາ 18 ໜ່ວຍງານກວດການໍ້າໜັກສະເພາະກິດ
ໜ່ວຍງານກວດການໍ້າໜັກສະເພາະກິດ ແມ່ນໜ່ວຍງານກວດກາລົດບັນທຸກຕາມເສັ້ນທາງຫຼວງ ທີ່ມີ ເປົ້າໝາຍ ແລະ ການສຸ່ມກວດ ເມື່ອເຫັນວ່າມີການເຄື່ອນໄຫວຂົນສົ່ງສິນຄ້າທີ່ມີນໍ້່າໜັກເກີນກວ່າການອະນຸຍາດນໍ້າໜັກລວມສູງສຸດ.
ມາດຕາ 19 ການປັບໃໝລົດບັນທຸກນໍ້າໜັກເກີນ
ການປັບໃໝລົດບັນທຸກນໍ້າໜັກເກີນ ພະນັກງານປະຈໍາສະຖານີຊິງຊັ່ງນໍ້າໜັກ ຫຼື ໜ່ວຍກວດການໍ້າໜັກສະເພາະກິດ ເປັນຜູ້ຄິດໄລ່ຕາມອັດຕາການປັບໃໝຕາມລະບຽບການ ຂອງກະຊວງໂຍທາທິການ ເເລະ ຂົນສົ່ງ.
ເຈົ້າຂອງລົດບັນທຸກ ຕ້ອງຮັບຜິດຊອບໃນການຄ່ຽນຖ່າຍນໍ້າໜັກເກີນລົງຈາກລົດດັ່ງກ່າວ.
ໝວດທີ 6
ຂໍ້ຫ້າມ
ມາດຕາ 20 ຂໍ້ຫ້າມທົ່ວໄປ
ຫ້າມ ບຸກຄົນ, ນິຕິບຸກຄົນ ແລະ ການຈັດຕັ້ງ ມີພຶດຕິກໍາ ດັ່ງນີ້:
1. ແອບອ້າງເປັນພະນັກງານຂອງໜ່ວຍງານປະຈຳສະຖານີກວດຊັ່ງນໍ້າໜັກລົດບັນທຸກ;
2. ຂັບຂີ່ລົດບັນທຸກນໍ້າໜັກເກີນກໍານົດ ເຂົ້າໃນທາງຫຼວງແຕ່ລະປະເພດ;
3. ຮັບຈ້າງຂົນສົ່ງນໍ້າໜັກເກີນກໍານົດ;
4. ເປັນສື່ກາງໃນການໃຫ້ ແລະ ຮັບສິນບົນ;
5. ຂັດຂວາງ, ບໍ່ອໍານວຍຄວາມສະດວກ, ບໍ່ໃຫ້ຄວາມຮ່ວມມື ໃນການກວດການໍ້າໜັກລວມສູງສຸດຂອງໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ;
6. ມີພຶດຕິກຳອື່ນ ທີ່ລະເມີດກົດໝາຍ ແລະ ລະບຽບການ.
ມາດຕາ 21 ຂໍ້ຫ້າມສຳລັບຜູ້ຂັບຂີ່ລົດບັນທຸກ
ຫ້າມຜູ້ຂັບຂີ່ລົດບັນທຸກ ມີພຶດຕິກຳ ດັ່ງນີ້:
1. ຂັບຂີ່ລົດບັນທຸກໜັກເກີນ ເຂົ້າທາງຫຼວງແຕ່ລະປະເພດ ໂດຍບໍ່ໄດ້ຜ່ານຈຸດກວດກາຊັ່ງນໍ້າໜັັັກ
ລວມສູງສຸດຂອງລົດບັນທຸກ ຫຼື ບໍ່ມີໃບຢັ້ງຢືນການກວດການໍ້່າໜັກລວມສູງສຸດຂອງລົດບັນທຸກ;
2. ບໍ່ເຂົ້າແຈ້ງກວດການໍ້າໜັັກລວມສູງສຸດຂອງລົດບັນທຸກ;
3. ບັນທຸກນໍ້າໜັກເກີນມາດຕະຖານເຕັກນິກທີ່ກໍານົດ;
4. ໃຫ້ສິນບົນເເກ່ພະນັກງານໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ;
5. ມີພຶດຕິກໍາອື່ນ ທີ່ລະເມີດກົດໝາຍ ເເລະ ລະບຽບການ.
ມາດຕາ 22 ຂໍ້ຫ້າມສໍາລັບຜູ້ປະກອບການຂົນສົ່ງ
ຫ້າມຜູ້ປະກອບການຂົນສົ່ງ ມີພຶດຕິກໍາ ດັ່ງນີ້:
1. ໃຫ້ເຊົ່າ, ໂອນທະບຽນວິສາຫະກິດຂອງຕົນໃຫ້ແກ່ຜູ້ອື່ນ ຫຼື ນໍາໃຊ້ທະບຽນວິສາຫະກິດຂອງຜູ້ອື່ນ;
2. ດໍາເນີນກິດຈະການບໍ່ຖືກຕ້ອງຕາມປະເພດທີ່ໄດ້ຮັບອະນຸຍາດ, ບໍ່ມີໃບອະນຸຍາດ ຫຼື ໃບອະນຸຍາດ ໝົດອາຍຸ;
3. ປະກອບເອກະສານບໍ່ຖືກຕ້ອງ, ສົມຮູ້ຮ່ວມຄິດ ຫຼື ໃຫ້ສິນບົນເເກ່ ເຈົ້າໜ້າທີ່ ແລະ ພະນັກງານທີ່ກ່ຽວຂ້ອງຂອງລັດ ພະນັກງານໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ ເພື່ອອໍານວຍຜົນປະໂຫຍດໃຫ້ການດໍາເນີນກິດຈະການຂົນສົ່ງຂອງຕົນ;
4. ບໍ່ໃຫ້ການຮ່ວມມື, ປິດບັງ, ປອມເເປງ, ບິດເບືອນຂໍ້ມູນກ່ຽວກັບ ບໍລິມາດການຂົນສົ່ງຕໍ່ການກວດກາຂອງເຈົ້າຫນ້າທີ່ ແລະ ພະນັກງານທີ່ກ່ຽວຂ້ອງຂອງລັດ ລວມທັງພະນັກງານໜ່ວຍງານປະຈໍາສະຖານີີຕິດຊັ່ງນໍ້າໜັກລົດບັນທຸກ;
5. ມີພຶດຕິກໍາອື່ນ ທີ່ເປັນການລະເມີດ ກົດໝາຍ ເເລະ ລະບຽບການ.
ມາດຕາ 23 ຂໍ້ຫ້າມສໍາລັບພະນັກງານໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ
ຫ້າມພະນັກງານໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ ມີພຶດຕິກໍາ ດັ່ງນີ້:
1. ອອກໃບຢັ້ງຢືນກວດການໍ້າໜັກ ໂດຍບໍ່ຖືກຕ້ອງຕາມມາດຕະຖານ ຫຼື ບໍ່ໄດ້ລົງກວດກາຕົວຈິງ;
2. ສົມຮູ້ຮ່ວມຄິດ, ທວງເອົາ, ຂໍເອົາ, ຮັບ ສິນບົນ, ໃຊ້ອໍານາດເກີນຂອບເຂດ, ກົດໜ່ວງ, ຖ່ວງດຶງ, ປອມແປງເອກະສານກ່ຽວກັບນໍ້າໜັກລວມຂອງລົດບັນທຸກ, ສວຍໃຊ້ໜ້າທີ່ຕໍາແໜ່ງ ເພື່ອຜົນປະໂຫຍດແກ່ຕົນ, ຄອບຄົວ ແລະ ພັກພວກ;
3. ເປີດເຜີຍຂໍ້ມູນທີ່ເປັນຄວາມລັບທາງລັດຖະການ;
4. ມີພຶດຕິກໍາອື່ນ ທີ່ລະເມີດກົດໝາຍ ແລະ ລະບຽບການ.
ໝວດທີ 7
ການຄຸ້ມຄອງ ແລະ ກວດກາວຽກງານນໍ້າໜັກລວມສູງສຸດຂອງລົດບັນທຸກ
ມາດຕາ 24 ອົງການຄຸ້ມຄອງວຽກງານນໍ້າໜັກລວມສູງສຸດຂອງລົດບັນທຸກ
ກະຊວງໂຍທາທິການ ແລະ ຂົນສົ່ງ ເປັນຜູ້ຄຸ້ມຄອງວຽກງານນໍ້າໜັກລວມສູງສຸດຂອງລົດບັນທຸກຢ່າງລວມສູນ ແລະ ເປັນ ເອກະພາບໃນຂອບເຂດທົ່ວປະເທດ ໂດຍມອບໃຫ້ກົມຂົວທາງເປັນ ຜູ້ຮັບຜິດຊອບໂດຍກົງ ແລະ ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງໃນການຄຸ້ມຄອງວຽກງານດັ່ງກ່າວຕາມກຄວາມຮັບຜິດຊອບຂອງຕົນ.
ອົງການຄຸ້ມຄອງກວດການໍ້າໜັກ ປະກອບດ້ວຍ:
1. ກົມຂົວທາງ;
2. ພະເເນກໂຍທາທິການ ແລະ ຂົນສົ່ງ ແຂວງ, ນະຄອນຫຼວງວຽງຈັນ;
3. ຫ້ອງການໂຍທາທິການ ແລະ ຂົນສົ່ງ ເມືອງ, ເທດສະບານ, ນະຄອນ.
ມາດຕາ 25 ສິດ ແລະ ໜ້າທີ່ ຂອງກົມຂົວທາງ
ກົມຂົວທາງ ມີ ສິດ ແລະ ໜ້າທີ່ ຕົ້ນຕໍ ດັ່ງນີ້:
1. ປະສານສົມທົບກັບພາກສ່ວນກ່ຽວຂ້ອງໃນການ ຄຸ້ມຄອງ, ຕິດຕາມ ກວດກາ ແລະ ຊຸກຍູ້ ການຈັດຕັ້ງປະຕິວຽກຄຸ້ມຄອງນໍ້າໜັກລົດບັນທຸກ ໃຫ້ສອດຄ່ອງກັບກົດໝາຍ ແລະ ລະບຽບການ
2. ຄົ້ນຄວ້າ, ສ້າງ, ປັບປຸງກົນໄກ ແລະ ລະບຽບການ ສໍາລັບວຽກງານຄຸ້ມຄອງນໍ້າໜັກ ໂດຍການຫັນເປັນສະໄໝເທື່ອລະກ້າວ;
3. ສ້າງ, ປັບປຸງ ພາລະບົບບາດ ຂອງພະນັກງານປະຈໍາສະຖານີຕິດຊັ່ງນໍ້າໜັກ ໃຫ້ມີຄວາມ ໂປ່ງໃສ, ຍຸຕິທໍາ ສາມາດກວດສອບ-ກວດກາໄດ້, ສ້າງແຜນຍົກລະດັບຂີດຄວາມສາມາດທາງດ້ານເຕັກນິກ ການ ນໍາໃຊ້, ບູລະນະຮັກສາ ແລະ ສ້ອມເເປງ ລະບົບຊິງຊັ່ງນໍ້າໜັກ ໃນແຕ່ລະໄລຍະ;
4. ຂຶ້ນແຜນງົບປະມານ ສໍາລັບ ຄຸ້ມຄອງ, ບໍລິຫານ, ກໍ່ສ້າງ ແລະ ສ້ອມແປງ ສະຖານີຕິດຊັ່ງນໍ້າໜັກໃນຂອບເຂດທົ່ວປະເທດ;
5. ຄຸ້ມຄອງໂດຍກົງ ສະຖານີຕິດຊັ່ງນໍ້າໜັກ ຕາມທາງຫຼວງແຫ່ງຊາດ;
6. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມການມອບໝາຍ.
ມາດຕາ 26 ສິດ ແລະ ໜ້າທີ່ ຂອງພະແນກໂຍທາທິການ ແລະ ຂົນສົ່ງ ແຂວງ, ນະຄອນຫຼວງວຽງຈັນ
ພະແນກໂຍທາທິການ ແລະ ຂົນສົ່ງ ແຂວງ, ນະຄອນຫຼວງ ມີ ສິດ ແລະ ໜ້າທີ່ ຕົ້ນຕໍ ດັ່ງນີ້:
1. ຈັດຕັ້ງໜ່ວຍກວດການໍ້າໜັກສະເພາະກິດ ໂດຍນໍາໃຊ້ຊິງເຄື່ອນທີ່ ຕາມການຕົກລົງເຫັນດີ ຂອງ
ກົມຂົວທາງ;
2. ປະກອບພະນັກງານຜູ້ທີ່ມີ ຄຸນສົມບັດ, ຄວາມຮູ້ ແລະ ຄວາມສາມາດ ເຂົ້າໃນໜ່ວຍກວດກາ
ສະເພາະກິດ ແລະ ໜ່ວຍງານສະຖານີຕິດຊັ່ງນໍ້າໜັກ;
3. ຄຸ້ມຄອງວັດຖຸອຸປະກອນ ທີ່ນໍາໃຊ້ກວດກາສະເພາະກິດ ໃຫ້ຢູ່ໃນສະພາບໃຊ້ການໄດ້ ແລະ ບໍ່ໃຫ້
ຕົກເຮ່ຍເສຍຫາຍ;
4. ປະຕິບັດການປັບໃໝ ແລະ ຄຸ້ມຄອງເງິນຄ່າປັບໃໝ;
5. ເກັບກໍາສະຖິຕິ, ສະຫຼຸບ ແລະ ລາຍງານ ການເຄື່ອນໄຫວວຽກງານຄຸ້ມຄອງນໍ້າໜັກໃຫ້ກະຊວງໂຍທາທິ
ການ ແລະ ຂົນສົ່ງ ອົງການ ແລະ ປົກຄອງຂັ້ນເເຂວງ ຢ່າງເປັນປົກກະຕິ;
6. ຈັດຕັ້ງ ເຜີຍເເຜ່ ແລະ ສຶກສາອົບຮົມ ຜູ້ປະກອບການຂົນສົ່ງ ໃຫ້ປະຕິບັດຕາມ ກົດໝາຍ ແລະ ລະບຽບ
ການ ກ່ຽວກັບການຄຸ້ມຄອງລົດບັນທຸກ;
7. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມການມອບໝາຍ.
ມາດຕາ 27 ສິດ ແລະ ໜ້າທີ່ ຂອງຫ້ອງການໂຍທາທິການ ແລະ ຂົນສົ່ງ ເມືອງ, ເທດສະບານ, ນະຄອນ
ຫ້ອງການໂຍທາທິການ ແລະ ຂົນສົ່ງ ເມືອງ, ເທດສະບານ, ນະຄອນ ມີ ສິດ ແລະ ໜ້າທີ່ ຕົ້ນຕໍ ດັ່ງນີ້:
1. ປະກອບພະນັກງານຜູ້ທີ່ມີ ຄຸນສົມບັດ, ຄວາມຮູ້ ແລະ ຄວາມສາມາດ ເຂົ້າໃນໜ່ວຍກວດກາສະເພາະກິດ ແລະ ໜ່ວຍງານສະຖານີຕິດຊັ່ງນໍ້າໜັກ;
2. ຄຸ້ມຄອງວັດຖຸອຸປະກອນ ທີ່ນໍາໃຊ້ກວດກາສະເພາະກິດ ໃຫ້ຢູ່ໃນສະພາບໃຊ້ການໄດ້ ແລະ ບໍ່ໃຫ້ຕົກເຮ່ຍເສຍຫາຍ;
3. ເກັບກໍາສະຖິຕິ, ສະຫຼຸບ ແລະ ລາຍງານ ການເຄື່ອນໄຫວວຽກງານຄຸ້ມຄອງນໍ້າໜັກ ໃຫ້ອົງການ ປົກຄອງຂັ້ນແຂວງ ແລະ ພະເເນກໂຍທາທິການ ແລະ ຂົນສົ່ງ ຢ່າງເປັນປົກກະຕິ;
4. ຈັດຕັ້ງ ເຜີຍເເຜ່ ແລະ ສຶກສາອົບຮົມ ຜູ້ປະກອບການຂົນສົ່ງ ໃຫ້ປະຕິບັດຕາມກົດໝາຍ ແລະ ລະບຽບການ ກ່ຽວກັບການຄຸ້ມຄອງລົດບັນທຸກ;
5. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມການມອບໝາຍ.
ມາດຕາ 28 ເນື້ອໃນກວດກາ
ການກວດກາວຽກງານນໍ້າໜັກລວມສູງສຸດຂອງລົດບັນທຸກ ມີເນື້ອໃນ ຕົ້ນຕໍ ດັ່ງນີ້:
1. ການຈັດຕັ້ງປະຕິບັດນະໂຍບາຍ, ພາລະບົບບາດ, ຂອບເຂດສິດ ແລະ ໜ້າທີ່ຮັບຜິດຊອບຂອງໜ່ວຍງານປະຈໍາສະຖານີຊັ່ງນໍ້າໜັກລົດບັນທຸກ;
2. ມາດຕະຖານເຕັກນິກ ການກວດການໍ້າໜັກລວມສູງສຸດຂອງລົດບັນທຸກ;
3. ຜົນກະທົບຕໍ່ສະພາບທາງຫຼວງແຕ່ລະປະເພດ ເນື່ອງຈາກລົດບັນທຸກນໍ້າໜັກ.
ມາດຕາ 29 ຮູບການກວດກາ
ການກວດກາ ມີ ສາມ ຮູບການ ດັ່ງນີ້:
1. ການກວດກາຢ່າງເປັນປົກກະຕິ ຊຶ່ງແມ່ນການກວດກາ ທີ່ດໍາເນີນໄປຕາມແຜນການຢ່າງເປັນປະຈໍາ ເເລະ ມີ
ການກໍານົດເວລາອັນແນ່ນອນ;
2. ການກວດກາໂດຍມີການແຈ້ງໃຫ້ຮູ້ລ່ວງໜ້າ ຊຶ່ງແມ່ນການກວດການອກແຜນການ ເມື່ອເຫັນວ່າມີ
ຄວາມຈໍາເປັນ ຊຶ່ງເເຈ້ງໃຫ້ຜູ້ກວດກາຊາບລ່ວງໜ້າ;
3. ການກວດກາແບບກະທັນຫັນ ຊຶ່ງແມ່ນການກວດກາໂດຍຮີບດ່ວນ, ໂດຍບໍ່ໄດ້ເເຈ້ງໃຫ້ຜູ້ຖືກກວດກາ
ຊາບລ່ວງໜ້າ.
ໃນການດໍາເນີນການກວດກາ ຕ້ອງປະຕິບັດໃຫ້ຖືກຕ້ອງຕາມກົດໝາຍ ຢ່າງເຂັ້ມງວດ.
ໝວດທີ 8
ນະໂຍບາຍຕໍ່ຜູ້ມີຜົນງານ ແລະ ມາດຕະການຕໍ່ຜູ້ລະເມີດ
ມາດຕາ 30 ນະໂຍບາຍຕໍ່ຜູ້ມີຜົນງານ
ບຸກຄົນ, ນິຕິບຸກຄົນ ແລະ ການຈັດຕັ້ງທີ່ເຂົ້າຮ່ວມໃນການຄຸ້ມຄອງນໍ້າໜັກລົດບັນທຸກຢ່າງມີປະສິດທິຜົນ ຈະໄດ້ຮັບການຍ້ອງຍໍ ແລະ ໄດ້ຮັບການປະຕິບັດນະໂຍບາຍ ຕາມຄວາມເໝາະສົມ.
ມາດຕາ 31 ມາດຕະການຕໍ່ຜູ້ລະເມີດ
ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ລະເມີດຂໍ້ຕົກລົງສະບັບນີ້ ຈະຖືກມາດຕະການ ສຶກສາອົບຮົມ, ກ່າວເຕືອນ, ລົງວິໄນ, ໂຈະ, ຖອນໃບ ອານຸຍາດກ່ຽວກັບການຂົນສົ່ງ, ຢຶດ ຫຼື ຮິບຍານພາຫະນະທີ່ໃຊ້ໃນການກະທໍາຜິດ, ປັບໃໝ, ໃຊ້ແທນຄ່າເສຍຫາຍທາງເເພ່ງ ຫຼື ລົງໂທດທາງອາຍາຕາມກໍລະນີ ເບົາ ຫຼື ໜັກ.
ເຈົ້າໜ້າທີ່ກວດການໍ້າໜັກ ທີ່ສົມຮູ້ຮ່ວມຄິດໃນການກະທໍາຜິດ ຈະຖືກ ສຶກສາອົບຮົມ, ລົງວິໄນ ຕາມລະບຽບ ລັດຖະກອນ ແລະ ຖືກດໍາເນີນຄະດີ ຕາມກົດໝາຍ.
ໝວດທີ 9
ບົດບັນຍັດສຸດທ້າຍ
ມາດຕາ 32 ການຕັ້ງປະຕິບັດ
ມອບໃຫ້ ກົມຂົວທາງ ເປັນເຈົ້າການໃນການຈັດຕັ້ງປະຕິບັດຕາມຂໍ້ຕົກລົງສະບັບນີ້ ໃຫ້ມີປະສິດທິພາບ ແລະ ປະສິດທິຜົນສູງ.
ຫ້ອງການ, ບັນດາກົມ, ສະຖາບັນ, ກອງ, ພະເເນກໂຍທາທິການ ແລະ ຂົນສົ່ງ ແຂວງ, ນະຄອນຫຼວງ, ຫ້ອງການໂຍທາທິການ ແລະ ຂົນສົ່ງ ເມືອງ, ເທດສະບານ, ນະຄອນ, ໜ່ວຍງານປະຈໍາສະຖານີຕິດຊັ່ງນໍ້າໜັກລົດບັນທຸກ ແລະ ພາກສ່ວນທີ່ກ່ຽວຂ້ອງ ຈົ່ງຮັບຮູ້ ແລະ ໃຫ້ການຮ່ວມມືໃນການຈັດຕັ້ງປະຕິບັດຕາມຂໍ້ຕົກລົງສະບັບນີ້ ໃຫ້ໄດ້ຮັບຜົນດີ.
ມາດຕາ 33 ຜົນສັກສິດ
ຂໍ້ຕົກລົງສະບັບນີ້ ມີຜົນສັກສິດ ນັບເເຕ່ວັນລົງລາຍເຊັນ ແລະ ໄດ້ລົງຈົດໝາຍເຫດທາງລັດຖາການ.
ລັດຖະມົນຕີ
ງາມປະສົງ ເມືອງມະນີ
PDF
PDF
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.