ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
 
ກະຊວງກະສິກຳ ແລະ ປ່າໄມ້
ກົມປູກຝັງ
ເລກທີ 0184/ກປຝ
ນະຄອນຫຼວງວຽງຈັນ, ວັນທີ: 31 ມັງກອນ 2023
 
ຄໍາແນະນໍາ
ກ່ຽວກັບ ເງື່ອນໄຂສຸຂານາໄມພືດ ສໍາລັບການສົ່ງອອກ
ຢາຫົວ ແລະ ເຄືອແດງດ່າງຈາກ ສປປ ລາວ ໄປ ສປ ຈີນ
 
ອີງຕາມ ກົດຫມາຍ ວ່າດ້ວຍການປ້ອງກັນພືດ ແລະ ການກັກກັນພືດ ສະບັບເລກທີ 13/ສພຊ, ລົງວັນທີ່ 15 ພະຈິກ 2016;
ອີງຕາມ ຂໍ້ຕົກລົງ ຂອງລັດຖະມົນຕີ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກົມປູກຝັງ ສະບັບ ເລກທີ 0078/ກປ, ລົງວັນທີ 12 ມັງກອນ 2022;
ອີງຕາມ ອະນຸສັນຍາ ກ່ຽວກັບ ການສົ່ງອອກຢາຫົວ ແລະ ເຄືອແດງດ່າງ ຂອງ ສປປ ລາວ ໄປຍັງ ສປ ຈີນ ລົງວັນທີ 3 ກໍລະກົດ 2012;
ໃນໄລຍະຜ່ານມາ ລັດຖະບານ ໄດ້ມີນະໂຍບາຍສົ່ງເສີມການຜະລິດພືດເປັນສິນຄ້າ ເຮັດໃຫ້ມີການແລກ ປ່ຽນ ຄ້າຂາຍຜະລິດຕະພັນສິນຄ້າກະສິກໍາ ກັບພາກພື້ນ ແລະ ສາກົນ ນັບມື້ນັບເພີ່ມຂຶ້ນ. ໃນນັ້ນ, ກະຊວງກະສິກໍາ ແລະ ປ່າໄມ້ ໄດ້ລົງນາມໃນອະນຸສັນຍາ ຮ່ວມກັບ ອົງການບໍລິຫານພາສີ ແຫ່ງ ສປ ຈີນ ກ່ຽວກັບ ເງື່ອນໄຂດ້ານສຸຂານາໄມພືດ ສໍາລັບ ການສົ່ງອອກ ຢາຫົວ ແລະ ເຄືອແດງດ່າງ ຂອງ ສປປ ລາວ ໄປ ສປ ຈີນ ເຊິ່ງເຫັນວ່າໄດ້ມີການປູກຢາຫົວ ແລະ ເຄືອແດງດ່າງ ໃນຫຼາຍພື້ນທີ່ ສ້າງລາຍຮັບໃຫ້ປະຊາຊົນ ແລະ ປະກອບ ສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ໄດ້ເປັນຢ່າງດີ. ແຕ່ການຊຸກຍູ້ສົ່ງເສີມດັ່ງກ່າວ ໃນຂອດຈັດຕັ້ງປະຕິບັດ ຍັງບໍ່ທັນສອດຄ່ອງກັບອະນຸສັນຍາ ເປັນຕົ້ນ ລະບົບການຜະລິດ, ລະບົບການຕິດຕາມ ແລະ ການຈັດການສັດຕູພືດໃນສວນປູກ, ຂັ້ນຕອນການບໍາບັດ, ການຈັດການຄວາມສະອາດ ໂຮງ ເຮືອນຫຸ້ມຫໍ່ບັນຈຸ ແລະ ການຈົດບັນທຶກ.
ເພື່ອໃຫ້ການຄຸ້ມຄອງການຜະລິດ ແລະ ການສົ່ງອອກ ຢາຫົວ ແລະ ເຄືອແດງດ່າງ ຫັນເຂົ້າສູ່ລະບົບ, ມີຄວາມເປັນເອກະພາບ, ໂປ່ງໃສ ແລະ ສອດຄ່ອງກັບ ອະນຸສັນຍາ ກ່ຽວກັບ ຂໍ້ກໍານົດເງື່ອນໄຂດ້ານສຸຂານາໄມພືດ ສໍາລັບການສົ່ງອອກ ຈາກ ສປປ ລາວ ໄປ ສປ ຈີນ ພ້ອມທັງ ກົດຫມາຍ, ລະບຽບການ ແລະ ສົນທິສັນຍາ ວ່າດ້ວຍ ການປ້ອງກັນພືດສາກົນ ທີ່ ສປປ ລາວ ແລະ ສປ ຈີນ ເປັນພາຄີ ນັ້ນ;
ກົມປູກຝັງ ອອກຄໍາແນະນໍາ:
I. ຈຸດປະສົງ ແລະ ເປົ້າຫມາຍ
ເພື່ອປະຕິບັດຕາມ ອະນຸສັນຍາ ກ່ຽວກັບ ຂໍ້ກໍານົດເງື່ອນໄຂສຸຂານາໄມພືດ ສໍາລັບ ການສົ່ງອອກຢາຫົວ ແລະ ເຄືອແດງດ່າງ ຈາກ ສປປ ລາວ ໄປ ສປ ຈີນ;
ເພື່ອໃຫ້ຄໍາແນະນໍາ ກ່ຽວກັບ ຂັ້ນຕອນ ແລະ ວິທີການປະຕິບັດເງື່ອນໄຂດ້ານສຸຂານາພືດ ສໍາລັບການສົ່ງ ອອກ ໃຫ້ມີຄວາມເປັນເອກະພາບ ໃນຂອບເຂດທົ່ວປະເທດ.
II. ເງື່ອນໄຂດ້ານສຸຂານາໄມພືດ ສໍາລັບການສົ່ງອອກຢາຫົວ ແລະ ເຄືອແດງດ່າງ ຈາກ ສປປ ລາວ ໄປ ສປ ຈີນ 
1. ຢາຫົວ ແລະ ເຄືອແດງດ່າງ
1.1. ຢາຫົວ ແລະ ເຄືອແດງດ່າງ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ພາຍໃຕ້ອານຸສັນຍາ ດ້ານສຸຂານາໄມພືດ ຕ້ອງເປັນ ຮາກເຫງົ້າຂອງຢາຫົວອົບແຫ້ງ ຫຼື ແບບຊອຍອົບແຫ້ງ ເປັນຊະນິດພັນທີ່ມີ ຊະນິດພັນ ທີ່ມີຊື່ວິທະຍາສາດ: Smilax glabra Roxb, ຊື່ສາມັນພາສາ ອັງກິດ Rhizoma Smilacis Glabrae ນອນໃນຕະກູນ Smilacaceae ທີ່ປູກ ແລະ ປຸງແຕ່ງຂັ້ນຕົ້ນຢູ່ ສປປ ລາວ.
 
 
1.2. ເຄືອແດງດ່າງ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ພາຍໃຕ້ອານຸສັນຍາ ດ້ານສຸຂານາໄມພືດ ຕ້ອງເປັນເຄືອ ທີ່ອົບແຫ້ງ ຫຼື ແບບຊອບອົບແຫ້ງ ເປັນຊະນິດພັນ ທີ່ມີຊື່ວິທະຍາສາດ: Spatholobus suberectus Dumn, ຊື່ສາມັນພາສາອັງກິດ Spatholobi Caulis, ນອນໃນຕະກຸນ Fabaceae ທີ່ປູກ ແລະ ປຸງແຕ່ງຂັ້ນຕົ້ນ ຢູ່ ສປປ ລາວ.
 
2. ສັດຕູພືດກັກກັນ
ຢາຫົວ ແລະ ເຄືອແດງດ່າງ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ຕ້ອງບໍ່ປົນເປື້ອນແກ່ນຫຍ້າ, ດິນ, ເສດພືດ, ສິ່ງເຈືອປົນອື່ນ ແລະ ບໍ່ໃຫ້ຕິດແປດສັດຕູພືດກັກກັນ.
2.1. ຢາຫົວ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ຕ້ອງບໍ່ຕິດແປດສັດຕູພືດກັກກັນ ທີ່ຝ່າຍຈີນ ກໍານົດໄວ້ ຄືດັ່ງລຸ່ມນີ້:
ລ/ດ ຊື່ວິທະຍາສາດ ຊື່ສາມັນ ລັກສະນະຮູບຮ່າງ ຮູບພາບປະກອບ
1 Cussuta spp. Dodders
(ເຄືອເຂືອງ) ເປັນພືດກາຝາກ ຈະມີການຈະເລີນເຕີບ ໂຕພາດໄປກັບຕົ້ນໄມ້ອື່ນ ແລະ ດູດ ກິນນໍ້າລ້ຽງຈາກຕົ້ນພືດອື່ນ ເຄືອເຂືອງມີ ສີເຫຼືອງ ເສັ້ນຜ່າສູນກາງ ປະ ມານ 1 ຊມ ດອກເປັນຊໍ່ ຫນື່ງຫມາກມີແກ່ນ 2-4
ແກ່ນ.  
2 Mikania
micrantha Bittervine
(ຫຍ້າເຄືອ) ມີລັກສະນະລໍາຕົ້ນເປັນເຄືອ, ເຄືອຫຼັກ ຈະແຕກເປັນເຄືອຍ່ອຍຈໍານວນຫຼາຍ ມີ ຄວາມຍາວຫຼາຍກວ່າ 2 ມ ມີຂົນອ່ອນ ຕາມເຄືອ ດອກເປັນຊໍ່ ຫນື່ງດອກມີການ ຍາວ 3-4 ຊມ.  
 
2.2. ເຄືອແດງດ່າງ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ຕ້ອງບໍ່ຕິດແປດສັດຕູພືດກັກກັນ ທີ່ຝ່າຍຈີນ ກໍານົດໄວ້ ຄືດັ່ງລຸ່ມນີ້:
ລ/ດ ຊື່ວິທະຍາສາດ ຊື່ສາມັນ ລັກສະນະຮູບຮ່າງ ຮູບພາບປະກອບ
1 Heterobostrychus aequalis Kapax borer
(ມອດຄາປອກ) ເປັນແມງປີກແຂງ ໂຕແກ່ສີ ແດງເຂັ້ມ ຫຼື ສີນ້ໍາຕານgເຂັ້ມ ລໍາໂຕຍາວ 6-12 ມມ, ໂຕອ່ອນເປັນສີຂາວ ຫຼື ເຫຼືອອ່ອນ ທັງໂຕ ອ່ອນ ແລະ ໂຕແກ່ຈະທໍາລາຍພືດແຫ້ງ ແລະ ໄມ້ແຫ້ງ.  
2 Trogoderma granarium Khapra beetle
(ມອດກາປາ) ໂຕແກ່ສີນໍ້າຕານ ຮູບໄຂ່ ສ່ວນຫົວເປັນ ສີນໍ້າຕານເຂັ້ມ ມີຂະ ຫນາດ 2-3 ມມ, ໄລຍະອ່ອນຈະເປັນດ້ວງ ມີຂົນສີນ້ໍາຕານ ອ່ອນຈໍານວນຫຼາຍປົກຫຸ້ມ ທັງໄລຍະດ້ວງ ແລະ ໂຕເຕັມໄວເຂົ້າທໍາລາຍພືດໃນເລົ້າສາງ.  
3 Cussuta spp. Dodders
(ເຄືອເຂືອງ) ເປັນພືດກາຝາກ ຈະມີການຈະເລີນເຕີບ ໂຕພາດໄປກັບຕົ້ນໄມ້ອື່ນ ແລະ ດູດ ກິນນໍ້າລ້ຽງຈາກຕົ້ນພືດອື່ນ ເຄືອເຂືອງມີ ສີເຫຼືອງ ເສັ້ນຜ່າສູນກາງ ປະ ມານ 1 ຊມ ດອກເປັນຊໍ່ ຫນື່ງຫມາກມີແກ່ນ 2-4
ແກ່ນ.  
4 Mikania
micrantha Bittervine
(ຫຍ້າເຄືອ) ມີລັກສະນະລໍາຕົ້ນເປັນເຄືອ, ເຄືອຫຼັກ ຈະແຕກເປັນເຄືອຍ່ອຍຈໍານວນຫຼາຍ ມີ ຄວາມຍາວຫຼາຍກວ່າ 2 ມ ມີຂົນອ່ອນ ຕາມເຄືອ ດອກເປັນຊໍ່ ຫນື່ງດອກມີການ ຍາວ 3-4 ຊມ.  
 
3. ການຜະລິດ, ການປຸງແຕ່ງ ແລະ ການເກັບຮັກສາ
ຢາຫົວ ແລະ ເຄືອແດງດ່າງ ທີ່ຈະສົ່ງອອກໄປ ສປ ຈີນ ຕ້ອງມີມາດຕະການເຝົ້າລະວັງສັດຕູພືດກັກກັນ ແລະ ມີການຈັດການສວນແບບປະສົມປະສານ ດັ່ງນີ້:
1) ໃນຊ່ວງໄລຍະການຜະລິດ ຕ້ອງດໍາເນີນການຕິດຕາມເຝົ້າລະວັງ, ປ້ອງກັນ ແລະ ຄວບຄຸມສັດຕູພືດ.
2) ການຈັດການສັດຕູພືດກັກກັນ ໃນສວນປູກ ຕ້ອງມີການຈັດການສັດຕູພືດແບບປະສົມປະສານ (IPM) ເຊັ່ນ: ການໃຊ້ກັບດັກເຟລາໂມນ ແລະ ກາວເຫຼືອງ, ການອານາໄມສວນປູກ ແລະ ຮັກສາຄວາມສະອາດ, ການເກັບທໍາລາຍຫມາກທີ່ລົ່ນຖິ້ມ, ການຕັດແຕ່ງກິ່ງງ່າ ແລະ ອານຸລັກແມງໄມ້ທີ່ເປັນປະ ໂຫຍດ, ຖ້າພົບ ເຫັນສັດຕູພືດ ຄວນນໍາໃຊ້ວິທີກາຍະພາບ ໂດຍການເກັບທໍາລາຍແມງໄມ້ສັດຕູພືດຖິ້ມ ແລະ ນໍາໃຊ້ວິທີ ການອື່ນທີ່ເຫມາະສົມ;
3) ຜູ້ປະກອບການຕ້ອງມີການບັນທຶກລະອຽດ ກ່ຽວກັບ ການຕິດຕາມ ແລະ ການຈັດການສັດຕູພືດ ເຊັ່ນ: ຊື່ ສານເຄມີ, ລະດູການນໍາໃຊ້, ສານອອກລິດ, ປະລິມານນໍາໃຊ້, ຈໍານວນຄັ້ງນໍາໃຊ້ ແລະ ຂໍ້ມູນອື່ນໆທີ່ ກ່ຽວຂ້ອງ. ການບັນທຶກເອກະສານຕ້ອງເກັບຮັກສາໄວ້ເປັນຢ່າງດີ ແລະ ໃຫ້ມີພ້ອມໃນເວລາກວດກາຂອງ ເຈົ້າຫນ້າທີ່;
4) ສະຖານທີ່ປະກອບການຜະລິດ ຕ້ອງມີມາດຕະການປ້ອງກັນ ແລະ ຄວບຄຸມການຕິດແປດຂອງພະຍາໂຄ ວິດ-19 ໃສ່ຜະລິດຕະພັນ ແລະ ຜູ້ປະຕິບັດຫນ້າທີ່.
4. ໂຮງເຮືອນຫຸ້ມຫໍ່ບັນຈຸ
ການຈັດການພາຍໃນໂຮງເຮືອນຫຸ້ມຫໍ່ບັນຈຸ ຕ້ອງປະຕິບັດ ດັ່ງນີ້:
1) ຢາຫົວ ແລະ ເຄືອແດງດ່າງ ທີ່ຈະສົ່ງອອກໄປ ສປ ຈີນ ຕ້ອງອົບແຫ້ງດ້ວຍເຄື່ອງອົບແຫ້ງ ໂດຍບໍ່ແມ່ນການຕາກແດດ;
2) ຕ້ອງຜ່ານການຮົມຢາ ດ້ວຍສານເຄມີ ຟົດສະຟິນ (PH3) ແລະ ປະຕິບັດຕາມວິທີດັ່ງນີ້:
ອຸນຫະພູມ
(C) ຄວາມເຂັ້ມຂຸ້ນ
(ກລາມ/m3) ກຳນົດເວລາ
(ມື້)
10 3 10
20 3 7
 
3) ຢາຫົວ ແລະ ເຄືອແດງດ່າງ ທີ່ຈະສົ່ງອອກ ຈາກ ສປປ ລາວ ໄປ ສປ ຈີນ ຕ້ອງບໍ່ປົນເປື້ອນ ແກ່ນຫຍ້າ, ດິນ, ເສດພືດ, ສິ່ງເຈືອປົນອື່ນ ແລະ ບໍ່ຕິດແປດສັດຕູພືດກັກກັນ ແລະ ສານພິດຕົກຄ້າງອື່ນ ຕ້ອງບໍ່ເກີນ ລະດັບການຕົກຄ້າງສູງສຸດ ທີ່ກໍານົດໄວ້ລະບຽບ ແລະ ກົດຫມາຍ ຂອງ ສປ ຈີນ;
4) ວັດສະດຸຫຸ້ມຫໍ່ບັນຈຸຕ້ອງສະອາດ, ບໍ່ເຄີຍນໍາໃຊ້ມາກ່ອນ ແລະ ຕ້ອງສອດຄ່ອງກັບເງື່ອນໄຂສຸຂານາໄມ ພືດທີ່ກ່ຽວຂ້ອງ ທີ່ ສປ ຈີນ ກໍານົດ;
5) ແຕ່ລະພາຊະນະຫຸ້ມຫໍ່ບັນຈຸ ຂອງຢາຫົວ ແລະ ເຄືອແດງດ່າງ ຕ້ອງພິມ ຫຼື ຕິດສະຫຼາກ ຂະຫນາດຕົວ ອັກສອນທີ່ຈະແຈ້ງ. ເນື້ອໃນສະຫຼາກຕ້ອງຂຽນ ຊື່ສາມັນ, ຊື່ວິທະຍາສາດ ແລະ ພາສາຈີນເຊັ່ນ: ລັກສະນະສະເພາະຂອງຜະລິດຕະພັນ, ວັນເດືອນປີຜະລິດ (ວັນທີ/ເດືອນ/ປີ), ຈໍານວນບັນຈຸ, ເງື່ອນໄຂ ການເກັບຮັກສາ, ວິທີການຜະລິດ (ໂຮງງານ), ສະຖານທີ່ຜະລິດ (ແຂວງ), ລະຫັດຖະບຽນສະຖານທີ່ ປະກອບການຜະລິດ, ປະເທດປາຍທາງ (The People's Republic of China Only);
6) ສະຫຼາກຂອງຢາຫົວ ແລະ ເຄືອແດງດ່າງ ທີ່ຈະສົ່ງອອກຈາກ ສປປ ລາວ ໄປ ສປ ຈີນ ຕ້ອງສອດຄ່ອງກັບ ມາດຕະຖານ ແລະ ລະບຽບການທີ່ ກ່ຽວກັບ ການຫຸ້ມຫໍ່ບັນຈຸ ຂອງ ສປ ຈີນ;
7) ພາຍຫຼັງຫຸ້ມຫໍ່ບັນຈຸສໍາເລັດ ໃຫ້ແຍກເກັບຮັກສາໄວ້ ສະຖານທີ່ສະອາດ ເພື່ອປ້ອງກັນການຕິດແປດຂອງ ສັດຕູພືດ ແລະ ການປົນເປື້ອນ.
5. ການຂື້ນທະບຽນ
ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງ ຂໍຂຶ້ນທະບຽນ ຫຼື ຂໍຕໍ່ໃບທະບຽນ ສວນປູກ, ໂຮງ ເຮືອນຫຸ້ມຫໍ່ບັນຈຸ ແລະ ສາງເຢັນ ແມ່ນປະຕິບັດຕາມລະບຽບການຂອງກະຊວງກະສິກໍາ ແລະ ປ່າໄມ້ທີ່ປະກາດໃຊ້ ແຕ່ລະໄລຍະ ໂດຍຍື່ນຄໍາຮ້ອງເຖິງກົມປູກຝັງ ໃນເດືອນ ມີຖຸນາ ຂອງທຸກປີ.
ຄໍາຮ້ອງຂໍຂຶ້ນທະບຽນ ປະກອບມີ:
1) ໃບຄໍາຮ້ອງ ຕາມແບບພິມທີ່ກົມປູກຝັງກໍານົດ;
2) ສໍາເນົາ ໃບອະນຸຍາດດໍາເນີນກິດຈະການກະສິກໍາ ແລະ ປ່າໄມ້;
3) ສໍາເນົາ ໃບຢັ້ງຢືນການມອບພັນທະອາກອນປະຈໍາປີສຸດທ້າຍ;
4) ການຢັ້ງຢືນການຊື້-ປູກ ແລະ ເອກະສານອື່ນທີ່ກ່ຽວຂ້ອງ ຈາກຂະແຫນງການສາທາລະນະສຸກ;
5) ການຢັ້ງຢືນດໍາເນີນທຸລາກິດ ແລະ ເອກະສານອື່ນທີ່ກ່ຽວຂ້ອງ ຈາກຂະແຫນງການປ່າໄມ້;
6) ຄູ່ມືດໍາເນີນງານ ກ່ຽວກັບ ການຈັດການດ້ານສຸຂານາໄມ ແລະ ສຸຂານາໄມພືດ;
7) ໃບມອບສິດ ແລະ ສໍາເນົາບັດປະຈໍາຕົວຂອງຜູ້ຍື່ນເອກະສານ ໃນກໍລະນີ ໃຫ້ຜູ້ອື່ນຍື່ນຄໍາຮ້ອງແທນ.
ອາຍຸຂອງໃບທະບຽນນໍາໃຊ້ໄດ້ ຫນຶ່ງ ປີ ແລະ ສາມາດຂໍຕໍ່ໄດ້. ຜູ້ທີ່ໄດ້ຮັບຂຶ້ນທະບຽນ ແລະ ຮັບຮອງໃຫ້ເປັນຜູ້ ສົ່ງອອກ ຈະຖືກເຜີຍແຜ່ ໃນເວັບໄຊ ຂອງອົງການບໍລິຫານ ພາສີ ແຫ່ງ ສປ ຈີນ ຊຶ່ງມີຂໍ້ມູນ ຊື່, ທີ່ຢູ່ ແລະ ເລກລະຫັດ.
 
6. ມາດຕະການ ສຸຂານາໄມພືດ ກ່ອນສົ່ງອອກ
ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ໄດ້ຮັບການຮັບຮອງໃຫ້ເປັນຜູ້ສົ່ງອອກ ຈາກອົງການບໍລິຫານພາສີ ແຫ່ງ ສປ ຈີນ ຕ້ອງປະຕິບັດ ດັ່ງນີ້:
1) ຕ້ອງຍື່ນຄໍາຮ້ອງ ຕາມແບບພິມທີ່ກົມປູກຝັງກໍານົດ ພ້ອມທັງຄັດຕິດເອກສານທີ່ກ່ຽວຂ້ອງ ເຖິງກົມປູກຝັງ ຫຼື ຂະແຫນງປູກຝັງຂັ້ນແຂວງ. ສໍາລັບ ເງື່ອນໄຂ, ຂັ້ນຕອນ ແລະ ວິທີການ ສະເຫນີຂໍໃບຢັ້ງຢືນສຸຂານາໄມ ພືດ ແມ່ນໃຫ້ປະຕິບັດ ຕາມບົດແນະນໍາ ຂອງກົມປູກຝັງ ເລກທີ 2880/ກປຝ, ລົງວັນທີ 11 ທັນວາ 2019;
2) ກໍລະນີ ກວດກາພົບສັດຕູພືດທີ່ໄດ້ກໍານົດໄວ້ໃນໂຣແມ໋ງ II, ຂໍ້ທີ 2 ຂອງຄໍາແນະນໍາສະບັບນີ້ ແມ່ນຫ້າມ ສົ່ງອອກຂູດສິນຄ້າດັ່ງກ່າວ ແລ້ວລາຍງານໃຫ້ກົມປູກຝັງ, ກະຊວງກະສິກໍາ ແລະ ປ່າໄມ້ ຊາບທັນທີ່ ເພື່ອ ໂຈະສະຖານທີ່ປະກອບການຜະລິດຊົ່ວຄາວ ພ້ອມຊອກຫາວິທີແກ້ໄຂ;
3) ໃນກໍລະນີ ເຈົ້າຫນ້າທີ່ກັກກັນພືດທີ່ຮັບຜິດຊອບ ກວດກາບໍ່ພົບເຫັນການຕິດແປດສັດຕູພືດຕາມ ໂຣແມ໋ງ II ຂໍ້ທີ 2 ຂອງຄໍາແນະນໍາສະບັບນີ້ ຕ້ອງອອກໃບຢັ້ງຢືນສຸຂານາມພືດ ສໍາລັບ ຊຸດສີນຄ້ານັ້ນ ແລະ ຕ້ອງ ພິມໃສ່ຂໍ້ມູນເພີ່ມຕື່ມ (Additional Declare) ຂອງໃບຢັ້ງຢືນສຸຂານາໄມພືດ ວ່າ:
ສໍາລັບຢາຫົວ "This consignment of Rhizoma Smilacis Glabrae complies with the Protocol of Phytosanitary Requirements for Export of Rhizoma Smilacis Glabrae from Laos to China and is free of soil and the quarantine pests concerned by China"
ເຄືອແດງດ່າງ "This consignment of Spatholobi Caulis complies with the Protocol of Phytosanitary Requirements for Export of Spatholobi Caulis from Laos to China and is free of soil and the quarantine pests concerned by China".
4) ເຈົ້າຫນ້າທີ່ກັກກັນພືດທີ່ຮັບຜິດຊອບອອກໃບຢັ້ງຢືນສຸຂານາໄມພືດ ຕ້ອງລະບຸຂໍ້ມູນດ່ານນໍາເຂົ້າ ທີ່ກໍາ ນົດ ໂດຍ ອົງການພາສີ ແຫ່ງ ສປ ຈີນ ໃນແຕ່ລະໄລຍະ.
7. ມາດຕະການກັກກັນພືດ ຢູ່ດ່ານຂາເຂົ້າ
ເມື່ອຊຸດສິນຄ້າຢາຫົວ ແລະ ເຄືອແດງດ່າງ ຈາກ ສປປ ລາວ ມາເຖິງດ່ານຂາເຂົ້າ ຂອງ ສປ ຈີນ, ເຈົ້າຂອງຊຸດ ສິນຄ້າຕ້ອງແຈ້ງເອກະສານ ຕໍ່ເຈົ້າຫນ້າທີ່ກັກກັນພືດ ຂອງ ສປ ຈີນ ເພື່ອດໍາເນີນການກວດກາເອກະສານທີ່ ກ່ຽວຂ້ອງ.
ການຂົນສົ່ງຊຸດສິນຄ້າທີ່ມາຈາກ ສະຖານທີ່ປະກອບການຜະລິດ ທີ່ບໍ່ໄດ້ຂຶ້ນທະບຽນ ແມ່ນ ຫ້າມນໍາເຂົ້າຢ່າງເດັດຂາດ.
ຖ້າກວດກາພົບສັດຕູພືດທີ່ໄດ້ກໍານົດໄວ້ໃນໂຣແມ໋ງ II, ຂໍ້ທີ 2 ຂອງຄໍາແນະນໍາສະບັບນີ້ ຊຸດສິນຄ້າດັ່ງກ່າວຈະ ຖືກສົ່ງກັບ, ທໍາລາຍ ຫຼື ນໍາໃຊ້ມາດຕະການທາງດ້ານກັກກັນ ແລະ ກໍາຈັດສັດຕູພືດ ທີ່ມີປະສິດທິພາບ. ຝ່າຍຈີນ ຈະແຈ້ງໃຫ້ຝ່າຍລາວຊາບທັນທີ ກ່ຽວກັບ ຊະນິດສັດຕູພືດ, ເລກທີໃບຢັ້ງຢືນສຸຂານາໄມພືດ ແລະ ຂໍ້ມູນຕ່າງໆທີ່ ກ່ຽວຂ້ອງ ພ້ອມທັງໂຈະການນໍາເຂົ້າ ຢາຫົວ ແລະ ເຄືອແດງດ່າງ ຈາກສວນປູກ ຫຼື ໂຮງເຮືອນຫຸ້ມຫໍ່ບັນຈຸ. ຜູ້ ປະກອບການຕ້ອງຊອກຫາສາຍເຫດ ແລະ ນໍາໃຊ້ມາດຕະການທີ່ເຫມາະສົມເພື່ອປ້ອງກັນບໍ່ໃຫ້ເກີດຂຶ້ນອີກ.
ຖ້າກວດພົບການນໍາໃຊ້ສານເຄມີ ຫຼື ສານພິດຕົກຄ້າງຢາປາບສັດຕູພືດເກີນຄ່າມາດຕະຖານ ທີ່ກໍານົດ ຊຸດສິນຄ້າດັ່ງກ່າວ ຈະຖືກສົ່ງກັບ ແລະ ທໍາລາຍຖິ້ມ ພ້ອມທັງ ແຈ້ງໃຫ້ຝ່າຍລາວຮັບຊາບທັນທີ ເຊັ່ນດຽວກັບກັບກວດພົບສັດຕູພືດ.
III. ການຈັດຕັ້ງປະຕິບັດ
1. ໃຫ້ ພະແນກກັກກັນພືດ, ຂະແຫນງປູກຝັງ ເປັນເຈົ້າການ ປະສານສົມທົບກັບຂະແຫນງການອື່ນທີ່ກ່ຽວຂ້ອງ ໂຄສະນາເຜີຍແຜ່, ຕິດຕາມ ແລະ ກວດກາ ການຈັດຕັ້ງປະຕິບັດຄໍາແນະນໍາສະບັບນີ້ ໃຫ້ໄດ້ຮັບຜົນດີ;
2. ໃຫ້ ພະແນກກັກພືດ ສົ່ງລາຍຊື່ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ໄດ້ສະເຫນີສົ່ງອອກຫມາກໂມ ໃຫ້ ສປ ຈີນ ພິຈາລະນາ ຫນື່ງ ຄັ້ງ/ປີ ໂດຍປະສານສົມທົບກັບ ຂະແຫນງປູກຝັງ ແລະ ສາຍຕັ້ງຂອງຕົນ ເພື່ອກວດກາ ແລະ ປະເມີນຄວາມສ່ຽງສັດຕູພືດ ຂອງສະຖານທີ່ປະກອບການຜະລິດ ໃນແຕ່ລະຊ່ວງລະດູການຜະລິດ;
3. ໃຫ້ ພະແນກກັກກັນພືດ ເປັນໃຈກາງປະສານສົມທົບກັບ ຂະແຫນງປູກຝັງ ແລະ ສາຍຕັ້ງຂອງຕົນ ສະຫຼຸບລາຍ ງານ ກ່ຽວກັບ ການສົ່ງອອກຫມາກໂມ ຈາກ ສປປ ລາວ ໄປ ສປ ຈີນ ໃຫ້ກົມປູກຝັງ ຊາບ ເປັນແຕ່ລະໄລຍະ;
4. ໃຫ້ ເຈົ້າຫນ້າທີ່ກັກກັນພືດ ເຂັ້ມງວດໃນການກວດກາ ເເລະ ຢັ້ງຢືນ ການສົ່ງອອກຢາຫົວ ແລະ ເຄືອແດງດ່າງ ຕາມຫຼັກວິຊາການ.
5. ໃນການຈັດຕັ້ງປະຕິບັດຕົວຈິງ ມີຂໍ້ສະດວກ, ຂໍ້ຫຍຸ້ງຍາກແນວໃດ ໃຫ້ຮີບຮ້ອນລາຍງານ ກົມປູກຝັງ ຕາມຂັ້ນ ຕອນ ເພື່ອພິຈາລະນາ ຫາວິທີແກ້ໄຂຢ່າງທັນການ.
ຄໍາແນະນໍາສະບັບນີ້ ມີຜົນສັກສິດ ນັບແຕ່ວັນລົງລາຍເຊັນເປັນຕົ້ນໄປ.
 
ຫົວໜ້າກົມ
ບຸນຈັນ ກົມບຸນຍະສິດ
 
 
ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.